Klei Aê Diê Blŭ: Klei Mtô Mñă Klei Bhiăn 10:15-19
Êlan kliăng: “Ñu ngă klei djŏ kơ anak êrĭt leh anăn kơ mniê djiê ung, khăp kơ mnuih dôk jưh bhiâo, brei kơ gơ̆ mnơ̆ng ƀơ̆ng huă leh anăn čhiăm ao. Kyuanăn brei diih khăp kơ pô dôk jưh bhiâo; kyuadah diih jing phung dôk jưh bhiâo leh hlăm čar Êjip.” (Klei Mtô Mñă Klei Bhiăn 10:18-19)
Klei êmuh ksiêm mĭn: Si Khua Yang bi êdah klei kpă ênô leh anăn klei khăp Ñu? Ya ngă brei phung anak ƀuôn sang Aê Diê dôk hdĭp kpă ênô thâo bi khăp? Djŏ hruê akŏ thŭn 2026 anei, si drei ƀuăn hŏng Khua Yang srăng dôk kpă ênô leh anăn thâo bi khăp?
Klei kpă ênô leh anăn klei khăp jing knuih Aê Diê. Klei kpă ênô Aê Diê bi êdah hŏng bruă “Ñu ngă klei djŏ” kơ jih jang mnuih (êlan 18). Pô Kpă Ênô ngă nanao klei mtăp mđơr, amâo dlăng mnuih mdê mdê, răng mgang phung mnuih êdu awăt, phung arăng ktư̆ juă hlăm ƀuôn sang. Hŏng klei bi êdah rup phung tue dôk jưh bhiâo, phung anak êrĭt leh anăn phung mniê djiê ung, Y-Môis brei ƀuh ai tiê Aê Diê mđing uêñ kơ phung awăt êdu, kŏ krei asei hjăn hlăm ƀuôn sang. Klei kpă ênô amâo knŏng jing sa êlan hdră ôh ƀiădah jing knuih Khua Yang Pô. Kyuanăn, Khua Yang mtô phung ƀuôn sang Ñu brei bi êdah knuih kpă ênô anăn hlăm klei hdĭp.
Mbĭt hŏng knuih kpă ênô, Khua Yang jing Pô Khăp nanao. Hlăm êlan 15, Khua Yang bi êdah klei khăp Ñu pioh kơ phung ƀuôn sang Ñu ruah găn lu gưl ênuk, ƀiădah klei khăp Khua Yang adôk lar nanao kơ jih jang mnuih, kơ jih jang djuê ana, kơ jih jang êpul mnuih. Klei khăp Khua Yang amâo dôk ñăt ôh, ƀiădah ñu ngă bruă čiăng răng mgang phung mnuih djăl tŭ klei ruă êka, phung êrĭt êrin, phung mniê djiê ung leh anăn phung tue dôk jưh bhiâo. Klei khăp Khua Yang sĭt klă snăk, ñu wĭt lač hŏng klei brei mnơ̆ng yua kơ klei hdĭp, brei mnơ̆ng ƀơ̆ng huă leh anăn čhiăm ao čut hơô kơ phung dôk găn klei knap mñai. Aê Diê brei klei bi hmô leh kơ phung ƀuôn sang Ñu, brei thâo khăp kơ mnuih mkăn amâo djŏ knŏng hŏng klei blŭ, ƀiădah hŏng klei mđing uêñ leh anăn hŏng bruă đru dŏng sĭt êmĭt.
Klei hdĭp phung đăo kơ Krist brei bi êdah klei kpă ênô leh anăn klei khăp
kyua Khua Yang drei, jing Pô kpă ênô, Pô khăp. Brei drei gưt klei bhiăn Khua Yang mtă leh anăn grăp hruê mâo klei bi mlih čiăng jing msĕ si Khua Yang hĭn. Tĭng kơ klei hdĭp myang, drei ăt jing “phung tue dôk jưh bhiâo” ti lăn ala. Khua Yang bi êdah leh klei Ñu pap hŏng klei Ñu djiê hrô brei klei soh drei, čiăng kơ dơ̆ng mơ̆ng jing mnuih soh, drei dưi jing anak Ñu, kyuanăn, brei drei dôk hdĭp kpă ênô, thâo khăp kơ mnuih mkăn. Khua Yang mtô drei amâo khăng ai tiê ôh, ƀiădah brei thâo pap kơ jih jang mnuih dôk čiăng kơ klei khăp leh anăn klei kpă ênô. Brei drei dôk hdĭp kdlưn hĭn kơ klei knŏng djhưng ai tiê. Brei mâo bruă ngă bi êdah msĕ si Khua Yang čiăng răng mgang phung dôk găn klei dleh dlan, kgŭ dơ̆ng kyua klei kpă ênô, leh anăn khăp kơ mnuih mkăn.
Hruê akŏ thŭn 2026, wah lač kơ drei pô brei mâo ai tiê msĕ si Khua Yang, thâo ruă ênguôt ti anăp klei phung mnuih dôk ruă êka jŭm dar drei, leh anăn hur har ngă bruă hŏng klei kpă ênô leh anăn hŏng ai tiê thâo khăp thâo pap. Ƀuăn rơ̆ng bĕ dôk hdĭp kpă ênô leh anăn thâo bi khăp tơl truh hruê Khua Yang lŏ hriê.
Si drei bi êdah leh klei khăp leh anăn klei kpă ênô Khua Yang hŏng jih jang mnuih hlăm hruê êgao?
Wah lač: Ơ Khua Yang, bi mni kơ Khua Yang khăp leh, săn asei mlei djiê hrô brei leh kơ kâo. Mŭt hlăm thŭn mrâo 2026, akâo Khua Yang ƀư̆ mkra kâo, brei kâo thâo dôk hdĭp kpă ênô leh anăn thâo khăp kơ jih jang mnuih, ktuê jih hruê kâo dôk ti lăn ala. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
