2 Kevcai 10:15-19
Nqe cim:
“Nws tsomkwm cov menyuam ntsuag thiab tej pojntsuam tsis pub leejtwg ua phem rau lawv; nws hlub txhua haivneeg uas nrog peb nyob, nws pub lawv muaj ris tsho hnav thiab muaj zaub mov noj. 19Yog li ntawd, nej yuav tsum hlub lwm haivneeg, rau qhov yav tas los uas nej nyob nram tebchaws Iziv, luag hu nej ua neeg txawv tebchaws” (2 Kevcai 10:18-19)
Lus nug rau sawvdaws xav:
– Tus Tswv qhia tawm kev ncajncees thiab kev hlub li cas?
– Vim li cas Vajtswv cov menyuam yuav tsum ua neej ncajncees sib hlub?
– Ncaj rau lub hauv xyoo 2026 no, peb coglus rau Vajtswv yuav ua neej ncaj ncees thiab sib hlub li cas?
Kev ncajncees thiab kev hlub yog Vajtswv tus yam ntxwv. Vajtswv kev ncajncees qhia tawm dhau ntawm “Nws tu plaub ncaj” rau txhua tus (nqe 18 HMOWSV). Tus Tswv ncajncees Nws ibtxwm ua ncajncees, tsis xaiv ntsej muag, tiv thaiv cov neeg pluag txomnyem uas raug luag quab yuam. Los ntawm qhov uas qhia pom tus duab ntawm cov neeg tsis muaj tebchaws, cov menyuam ntsuag, cov pojntsuam, Mauxes qhia pom Vajtswv lub siab hlub tshua tshwjxeeb pub rau cov neeg txomnyem ntawd. Ncajncees tsis yog ib txoj cai xwb tiamsis nws tseem yog Vajtswv tus yam ntxwv. Vim li ntawd Vajtswv xav kom Nws cov menyuam yuav tau qhia tawm tus yam ntxwv ncajncees ntawd rau hauv kev ua neej.
Dua li ntawm tus yam ntxwv ncajncees, mas Vajtswv ibtxwm yog Tus muaj kev hlub. Hauv nqe 15, Vajtswv qhia tawm Nws hlub Nws haivneeg ntau tiam dhau los, tsis tas li ntawd Nws txoj kev hlub tseem nthuav dav mus rau txhua tus, txhua haivneeg, txhua hom neeg. Vajtswv txoj kev hlub tsis nyob twbywm, Nws npaj siab rawv tiv thaiv cov neeg uas muaj kev nyuaj siab, cov menyuam ntsuag, cov pojntsuam thiab cov neeg txawv tebchaws. Vajtswv txoj kev hlub yog rau qhov kev cheemtsum thiab tseeb tiag tiag, Nws pub tej yam uas cheemtsum rau kev ua neej, Nws pub zaub mov noj thiab ris tsho hnav rau cov neeg uas ntsib kev txomnyem. Vajtswv ua qauv rau Nws haivneeg kawm paub hlub lwm tus tsis yog los ntawm lolus hais xwb tiamsis los ntawm kev hlub tshua pab tiag tiag rau lwm tus kev cheemtsum.
Ib tug ntseeg lub neej yuav tau qhia tawm kev ncaj ncees thiab kev hlub, vim peb Tus Vajtswv yog Tus ncajncees thiab muaj kev hlub. Peb yuav tsum coj raws li Vajtswv txoj Kevcai uas Nws pub kom ib hnub peb hloov pauv dhau mus zuj zus zoo li Vajtswv. Los ntawm sab ntsujplig peb kuj yog cov neeg uas “tsis muaj teb muaj chaw” hauv ntiajteb no. Vajtswv tau qhia tawm Nws txoj kev hlub tshua dhau los ntawm Tswv Yexus kev tuag theej peb kev txhaum, kom ib tug neeg txhaum dhau los ua Vajtswv menyuam, vim li ntawd peb kuj yuav tau ua neej ncaj ncees thiab muaj kev hlub lwm tus. Vajtswv qhia peb tsis txhob ua neeg tsis muaj kev hlub, tiamsis yuav tsum muaj kev hlub rau txhua tus uas cheem tsum kev hlub thiab kev ncaj ncees. Peb yuav tsum ua neej mus deb dua qhov uas peb lub siab xav. Yuav tsum ua haujlwm meej tseeb li Tswv Yexus, tiv thaiv cov neeg ntsib kev txomnyem, sawv los tiv thaiv kev ncajncees thiab hlub tshua lwm tus.
Thawj hnub hauv xyoo 2026, peb cia li thov Vajtswv pub rau yus muaj lub siab zoo li Vajtswv, paub mob siab rau cov neeg uas raug txomnyem ib ncig ntawm peb, thiab rau siab ua haujlwm hauv lub siab hlub tshua thiab ncaj ncees. Cia li coglus ua neej ncajncees thiab muaj kev hlub mus txog hnub uas Tswv Yexus rov qab los.
Thov Vajtswv,
Vajtswv nyuam yaus ua Koj tsaug uas tau hlub thiab tuag theej nyuam yaus lub txhoj. Hla rau xyoo 2026 thov cob qhia nyuam yaus paub ua neej ncaj ncees thiab muaj kev hlub pub rau txhua tus thaum tseem ua neej nyob hauv lub ntiajteb no. Nyuam yaus tuav Tswv Yexus Khetos lub npe thov, Amees.
Peb qhia tawm txoj kev hlub thiab kev ncajncees ntawm Vajtswv rau tibneeg txhua tus lub sijhawm dhau lawd li cas?
Nyeem Vajluskub hauv peb lub xyoos: Tes Haujlwm 20
Kênh Youtube BHKTHN:
