Bơtho Khôi Juăt 10:15-19
“Sư tơgŭm lu bơngai mơti păng bơngai adro po, ‘mêm mơnat kơ bơngai tơmoi, ăn tơmam sa păng hơbĕn ao kơ lu sư. Lu iĕm athei ‘mêm mơnat kơ lu bơngai tơmoi yua kơ lu iĕm kư̆m jing bơngai tơmoi lăm dêh Êyiptơ.” (Bơtho khôi juăt 10:18-19)
Nơ̆r jet tơchĕng pơwao:
– Kră Yang pơm tơ’bôh ‘lơ̆ng tơpăt păng ‘mêm mơnat thoi yơ?
– Yua kơ kiơ kon pơlei Kră Yang kăl kơ arih ‘lơ̆ng păng ‘mêm mơnat?
– Lăm năr blung a lăm sơnăm 2026 âu, lu bơ̆n pơkă hăm Kră Yang gô arih ‘lơ̆ng tơpăt păng ‘mêm mơnat thoi yơ ?
‘Lơ̆ng tơpăt păng ‘mêm mơnat noh jơ̆ lăm ‘Bok Kei-Dei đei. Tơdrong ‘lơ̆ng tơpăt Kră Yang lăm tơdrong “Sư gô sek tơlang tơpăt” kơ rim ‘nu bơngai (trong 18). Kră Yang ‘lơ̆ng tơpăt gô pơm tơpăt hơnơ̆ng, ưh kơ pơdê, wei lăng lu bơngai rơdu tơrăn, lu đe pơm kơnê̆ lăm kon pơlei. Đei pơm tơ’bôh hăm lu bơngai tơmoi, lu mơti păng lu yă adro, ‘bok Môis đei pơm tơ’bôh jơhngơ̆m ‘Bok Kei-Dei kơ lu bơngai mơti mơtuei lăm kon pơlei. ‘Lơ̆ng tơpăt ưh kơ sĭ khan kiơ̆ tơdrong juăt mă noh lăm jơhngơ̆m Kră Yang đei. Yua thoi noh, Kră Yang bơtho kon pơlei Sư athei pơm tơ’bôh jơhngơ̆m ‘lơ̆ng tơpăt ‘noh lăm tơdrong arih.
Gah cheng kơ jơhngơ̆m ‘lơ̆ng tơpăt, Kră Yang jơ̆ Tơ’ngla ‘Mêm Mơnat. Lăm trong 15, Kră `Yang pơm tơ’bôh tơdrong ‘mêm ăn kơ kon pơlei Sư hlôi dôm jơhnơr, mă lei tơdrong ‘mêm Kră Yang noh ba ăn lanh kơ rim bơngai, rim adrĕch adrŭng, mă hơgei dah kơtul. Tơdrong ‘mêm Kră Yang ưh kơ sĭ pơmơ̆ng, Sư adrin wei lăng lu bơngai đe tôn teh pơjuă pơđep, lu bơngai mơti, lu yă adro păng lu bơngai tơmoi. Tơdrong ‘mêm Kră Yang ‘noh sĭt tơpă, Sư gô tơgŭm ăn dôm tơdrong kăl lăm tơdrong arih, tơgŭm ăn tơmam sa păng hơbăn ao kơ lu bơngai đei tơdrong anat truh. Kră Yang ‘Bok Kei-Dei đei pơm kơmĭl kơ kon pơlei Sư rok kiơ̆ băt ‘mêm mơnat kơ bơngai nai ưh kơsĭ hăm nơ̆r pơma đĕch mă noh hăm tơdrong tơchĕng tơtăm păng tơgŭm tơpă hloi.
Chăl arih Bơngai Lui kơ Yêsu Krist athei pơm tơ’bôh tơdrong ‘lơ̆ng tơpăt păng ‘mêm mơnat yua kơ Kră Yang lu bơ̆n jơ̆ Kră Yang ‘lơ̆ng tơpăt, ‘mêm mơnat. Lu bơ̆n athei pơm kiơ̆ tơdrong juăt Kră Yang ăn păng rim năr tơplih wă kơ roi nhen thoi Kră Yang. Gah cheng kơ gah bơhngol, lu bơ̆n kư̆m jơ̆ “bơngai tơmoi ” tơ ala teh. Kră Yang pơm tơ’bôh jơhngơ̆m ‘mêm mơnat Sư lăm tơdrong Sư lôch duh tang ăn kơ lu bơ̆n, wă kơ đơ̆ng bơngai yoch, lu bơ̆n gơh jing kon Sư, yua thoi noh lu bơ̆n athei arih ‘lơ̆ng tơpăt, ‘mêm mơnat kơ bơngai nai. Kră Yang bơtho lu bơ̆n ưh kơ wă pơmơ̆ng đĕch, mălei wă kơ lu bơ̆n wang hơdai hăm rim ‘nu bơngai kăl kơ tơdrong ‘mêm păng tơdrong trŏ ‘lơ̆ng. Lu bơ̆n athei arih rai sĭn to ‘biơ̆ noh ưh kơsĭ lăp đei jơhngơ̆m ‘mêm đĕch. Athei pơm tơpă hloi thoi Kră Yang wă kơ bơ wei lu bơngai tơ’bơ̆p tơdrong gleh glăn truh,athei iung yua kơ rơdrong trŏ ‘lơ̆ng, păng ‘mêm mơnat kơ bơngai nai.
Năr blŭng a lăm sơnăm 2026, lu bơ̆n athei krao khan kơ bơ̆n kơdih wă kơ đei jơhngơ̆m thoi Kră Yang, băt ơh sơ’ngon ‘bơ̆t anăp lu bơngai đei tơdrong truh jum dăr kơ lu bơ̆n, athei adrin pơm hloi tơdrong ‘lơ̆ng tơpăt păng jơhngơ̆m ‘mêm mơnat. Athei pơkăm pơkă arih ‘lơ̆ng tơpăt păng ‘mêm mơnat dĭng truh tơ năr Kră Yang jur.
Ơ Kră Yang inh bơnê kơ Ih đei ‘mêm mơnat, chu lôch tang tơdrong yoch inh. Yak năm lăm sơnăm ‘nao 2026, apinh Ih bơtho tơ’bôh kơ inh, ăn kơ inh băt arih ‘lơ̆ng tơpăt păng ‘mêm mơnat rim ‘nu bơngai lăm đĭ chăl arih lăm teh đak. Krao khan yua anăn Kră Yang Yêsu Krist, Amen.
Lu bơ̆n pơm tơ’bôh tơdrong ‘mêm păng ‘lơ̆ng tơpăt đơ̆ng Kră Yang hăm rim ‘nu bơngai lăm khei ‘năr brei mơsơ̆ thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 20
Kênh Youtube BHKTHN:
