Klei Aê Diê Blŭ: Y‑Yêrêmi 31:7-14
Êlan kliăng: “Hmư̆ bĕ klei Yêhôwa blŭ, Ơ phung găp djuê mnuih, leh anăn hưn klei anăn kơ phung plao ksĭ kbưi; ‘Pô prah prŭng leh phung Israel srăng lŏ bi kƀĭn digơ̆, leh anăn srăng răng kriê digơ̆ msĕ si sa čô mgăt biăp răng kriê biăp ñu.” (Y‑Yêrêmi 31:10).
Klei êmuh ksiêm mĭn: Ya mta phŭn phung ƀuôn sang Israel dưi mâo klei hơ̆k mơak prŏng? Kơ hlei pô Khua pô hưn êlâo Y‑Yêrêmi lač leh anăn si knuih phung wĭt? Ya klei brei ƀuh klei kkuh mpŭ kơ Aê Diê dưi kơrŭ wĭt leh anăn phung ƀuôn sang Aê Diê lŏ mâo klei hơêč hmưi êbeh dlai mơ̆ng Yêhôwa?
Klei mơak truh leh hŏng phung ƀuôn sang Israel, leh anăn klei hơ̆k mơak anăn dưi hưn kơ tar ƀar dŭm ala čar mkăn thâo Yêhôwa bi mtlaih leh phung ƀuôn sang diñu, diñu lŏ mâo Aê Diê atăt wĭt kơ anôk diñu dlưh rai, Aê Diê lŏ iêô diñu jing anak leh anăn Aê Diê jing Ama kơ diñu (êlan 9). Yêhôwa srăng atăt phung ƀuôn sang Ñu wĭt hlăm ktuê êlan dap ktuê dŭm hang krông, diñu srăng amâo lĕ buh ôh. Klă sĭt Yêhôwa bi mtlaih leh diñu mơ̆ng phung ktang hĭn, brei diñu wĭt, bi mlih klei ênguôt diñu jing klei mơak, Aê Diê bi juh leh ai tiê diñu.
Hlăm êpul wĭt mâo “…phung bum ală leh anăn phung êwiên, phung mniê ba tian leh, leh anăn mniê đih pui, sa phung lu snăk srăng lŏ wĭt tinei” (êlan 8), amâo mâo ôh hlei pô lui ti tluôn wăt tơdah digơ̆ dôk dleh dlan kyua kƀah sa kdrêč asei mlei, amâodah hlăm klei dleh dlan. Diñu wĭt hŏng Aê Diê hŏng êa ală mơ̆ng ai tiê mčah leh anăn Yêhôwa srăng bi mlih klei ênguôt hnĭng jing klei hơ̆k mơak. Mơ̆ng anei, phung mniê êra hrông srăng hơ̆k êjai kdŏ čiăng bi êdah klei hơ̆k mơak êbeh dlai hlăm ai tiê, leh anăn klei mơak anăn hlăm jih jang phung ƀuôn sang Aê Diê mơ̆ng phung êkei hlăk ai leh anăn phung êkei mduôn (êlan 13). Klei mơak dưi bi mđĭ lu hĭn hŏng klei jăk mơak Yêhôwa brei diñu ƀuh leh êlâo, hlăk anăn “…phung khua ngă yang mnơ̆ng ƀơ̆ng huă jăk hĭn”, lač kơ klei phung ƀuôn sang Aê Diê mơak myơr mnơ̆ng hŏng ai tiê kmah kơ Aê Diê, kyua klei kkuh mpŭ diñu tuôm čang hmăng ti čar arăng ară anei Aê Diê lŏ kơrŭ wĭt leh. Leh anăn hjăn klei hdĭp phung ƀuôn sang Aê Diê lŏ “…srăng trei hŏng klei jăk kâo” (êlan 14).
Phung ƀuôn sang Aê Diê ruah tuôm kơŭ kyăm hlăm klei ênguôt hnĭng kyua klei soh ba anăn klă sĭt thâo klei jăk mơak prŏng prĭn leh diñu dưi bi mtlaih mơ̆ng klei kpĭ jing phung mnă, diñu mơak hdơr knga kơ Aê Diê hlăm klei kkuh mpŭ kơ Aê Diê, myơr mnơ̆ng hŏng ai tiê kmah. Phung ƀuôn sang Aê Diê hruê anei ăt mâo leh Khua Yang Yêsu yua êrah Ñu bi tui drei mơ̆ng hlŭn kơ klei soh, tlaih mơ̆ng klei satan krư̆ kđăl, akâo kơ Khua Yang đru drei “myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê” (Rôm 12:1).
Drei thâo klei mơak mơ̆ng klei hdĭp êngiê kkuh mpŭ kơ Aê Diê leh mơ̆ ka?
Wah lač: Ơ Aê Diê bŏ hŏng klei khăp, Pô bi tui leh anăn bi mtlaih phung ƀuôn sang Ih mơ̆ng kngan phung ktang, bi mlih klei ênguôt jing mơak, kâo bi mni lač jăk kơ Ih kyua kâo ăt dưi dưn klei hơ̆k mơak anei, akâo Ih đru kâo bi êdah klei hdĭp hdơr knga kơ Khua Yang mơ̆ng klei sĭt suôr kkuh mpŭ kơ Ih jih klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 28:9 – 29:11
Kênh Youtube BHKTHN:
