Yelemis 31:7-14
Nqe cim:
“Tus Tswv hais tias, Txhua haivneeg, nej cia li mloog kuv hais thiab qhia kuv txojlus rau tej tebchaws deb uas nyob raws ntug hiavtxwv. Kuv ua rau kuv haivneeg tawg khiav mus nyob ua sab ua sua, tiamsis kuv yuav sau lawv rov los nyob ua ke thiab kuv yuav tsomkwm lawv ib yam li tus tswv yaj zov nws pab yaj.” (Yelemis 31:10).
Lus nug rau sawvdaws xav:
- Yog ua cas cov Yixalayees thiaj muaj kev zoo siab kawg nkaus?
- Tus cev lus Yelemis hais txog tej hom neeg twg tau Vajtswv coj rov los thiab lawv muaj kev zoo siab li cas?
- Yam dab tsi qhia hais tias rov pib muaj kev pehawm Vajtswv lawm thiab Vajtswv haiv neeg rov tau Vajtswb foom koob hmoov dua?
Cov Yixalayees tau txais kev zoo siab kawg nkaus, yuav tsum muab tshaj tawm rau tej tebchaws paub hais tias Vajtswv cawm Nws haiv neeg, uas coj lawv tawm hauv txhua lub tebchaws rov qab los ua Vajtswv menyuam thiab Vajtswv yog lawv txiv (nqe 9). Vajtswv yuav coj Nws haiv neeg rov los txog qhov dej ntshiab si thiab taug kev tiaj tus kom lawv tsis ntog. Tseeb tiag, tus Tswv tau cawm Nws haiv neeg dim ntawm haiv neeg muaj fwjchim txhais tes, sau lawv rov los nyob ua ke thiab hloov kev quaj ntsuag ua kev lomzem rau lawv.
Hauv cov neeg uas tau rov los muaj “…neeg tuag tes tuag taw, neeg digmuag, pojniam suab menyuam thiab tej uas twb yuav txog caij yug puavleej yuav los huv tibsi, lawv yuav los sib sau ua ib haiv neeg” (nqe 8). Txhais tau hais tias, txhua hom neeg tsis hais cov uas lub cev tsis txaus kom zoo log thiab cov neeg txomnyem lossis neeg pluag puavleej tau tus Tswv pab tso rov los. Lawv tau rov los cuag tus Tswv, lees lawv tej kev txhaum thiab quaj thov tus Tswv, ces tus Tswv hloov lawv kev quaj ntsuag los ua kev lomzem. Thaum ntawd tej ntxhais yuav seevcev luag ntxhi, cov txivneej, tsis hais laus thiab hluas yuav zoo siab kawg nkaus, vim tus Tswv nplig lawv siab (nqe 13). Kev zoo siab muaj ib npaug ntxiv thaum ua rau pom hais tias:“…Kuv yuav pub cov povthawj muaj noj muaj haus nplua mias”, qhov ntawd xav hais txog Vajtswv haiv neeg zoo siab hlo fij txhua yam rau tus Tswv, vim kev pehawm tus Tswv nimno tau txais li siab ntshaw lawm tiag. Thiab Vajtswv haiv neeg txhua tus:“…muaj txhua yam txaus lawv” (nqe 14).
Vajtswv haiv neeg tiv nyuaj siab quaj ntsuag vim tej kev txhaum uas lawv ua, tiamsis thaum tau tus Tswv pab lawv dim lawm, lawv kawm tau ntau yam thiab muaj kev zoo siab kawg nkaus. Lawv nco tus Tswv txiajntsig los ntawm pehawm Vajtswv thiab muaj lub siab dav rhawv fij txhua yam rau tus Tswv. Cov ntseeg Vajtswv niaj hnub nimno uas twb tau tus Tswv cawm dim ntawm kev ua dab qhev thiab ua kev txhaum qhev lawm, thov Vajtswv pab kom peb nco ntsoov hais tias; “…muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (Loos 12:1).
Peb puas tau txais kev lomzem zoo siab ntawm kev pehawm Vajtswv lawm?
Thov Vajtswv,
Leejtxiv uas muaj kev hlub! Koj yog tus txhiv thiab cawm nyuam yaus dim ntawm dab lub fwjchim, muab kev quaj ntsuag ua kev lomzem. Nyuam yaus ua Koj tsaug uas nyuam yaus tau txais kev zoo siab lawm. Thov Koj pab nyuam yaus ua lub neej nco Koj txiajntsig los ntawm kev pehawm Koj mus tas simneej. Amees.
Nyeem Vajluskub hauv peb lub xyoo: II.Xwmtxheej Vajntxwv 28:9-29:11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
