Klei Aê Diê Blŭ: Y‑Yakơ 3:2-6
Êlan kliăng: “Êlah mâo klei dưi bi hdĭp leh anăn bi mdjiê, snăn arăng srăng mă tŭ tui si klei ñu blŭ.” (Klei Bi Hriêng 18:21)
Klei êmuh ksiêm mĭn: Ya rup Y‑Yakơ yua čiăng bi hmô kơ klei dưi êlah? Ya ngă klei blŭ mâo klei hmăi prŏng snăn? Si klei mñă kơ drei kơ bruă yua klei blŭ pô?
Mblang kơ knuih hdĭp sa čô đăo kơ Khua Yang, Y‑Yakơ lač kơ sa bruă mưng hmư̆ jing klei blŭ tlao nao hriê. Ñu lač, “Kyuadah jih jang drei têč hnêč hlăm lu mta klei” (êlan 2), anei jing klei grăp čô thâo sơăi, ngă soh hlăm klei blŭ jing klei ênưih snăk. Klei drei blŭ hmăi ktang snăk kơ phung mkăn. Tơdah klei blŭ amâo dưi ktuê dlăng, ñu srăng ba klei truh kjham snăk.
Lač kơ klei hmăi mơ̆ng klei blŭ, Y‑Yakơ yua rup klă snăk. Ñu lač kơ klei arăng mgăt aseh dưm msei khơp hlăm ƀăng êgei aseh čiăng kơ diñu gưt kơ drei; kwih điêt dhiêt hlăm kŭm păn ƀiădah dưi gai jih sa boh kŭm păn prŏng snăk (êlan 3-4). Mơ̆ng anăn, Y‑Yakơ mñă klă tơdah dưi ksiêm dlăng êlah, răng yua boh blŭ snăn dưi gai klei hdĭp djŏ êlan. Êdei kơ dua rup lač kơ klei gai boh blŭ. Y‑Yakơ lŏ dơ̆ng lač kơ klei bi rai mơ̆ng boh blŭ hlăm rup sa boh čư̆ pui điêt bluh ƀơ̆ng kmrơ̆ng prŏng snăk, mjing sa klei bi rai huĭ hyưt snăk, pui ƀơ̆ng jih sa wăl dliê prŏng. Leh anăn êlah khăng blŭ ăt srăng “bi jhat jih ênuk drei dôk hdĭp” msĕ snăn mơh (êlan 5-6).
Si ngă klei blŭ mâo klei hmăi huĭ hyưt msĕ snăn? Boh sĭt bi mklă leh klei anei jing djŏ. Sa čô hưn bi sĭt luar ti anăp sang phat kđi srăng tuh klei soh kơ phung amâo mâo klei soh, bi lĕ digơ̆ hlăm klei phat kđi kjham hĭn. Klei hâo hưn amâo sĭt srăng ngă kơ sa čô mnuih truh kơ klei luč čang hmăng, rŭng răng leh anăn duah klei djiê. Drei ƀuh leh mâo lu klei bi êka ai tiê kyua klei blŭ. Tal êlâo, drei bi mĭn “klei blŭ angĭn thut jih” ƀiădah klei êka ñu ngă ăt mâo tơl truh jih klei hdĭp. Msĕ si Klei Bi Hriêng 18:21 lač, “Êlah mâo klei dưi bi hdĭp leh anăn bi mdjiê”, ya klei drei blŭ dưi ba klei hdĭp amâodah klei djiê.
Trăn Klei Aê Diê Blŭ anei jing klei mñă ktang đăm dlăng hơăi mang ôh klei blŭ pô. Jing phung anak čô Aê Diê, brei drei ksiêm dlăng êlah pô čiăng blŭ ba klei hdĭp hrô kơ klei blŭ ba klei bi rai. Riêng gah drei adôk lu mnuih ka mâo klei bi mtlaih, brei hưn Klei Mrâo Mrang Jăk kyua anăn jing klei blŭ ba klei hdĭp. Brei hưn Klei Aê Diê Blŭ čiăng đru kơ phung mkăn hriê kơ prŏng hlăm klei đăo. Brei blŭ “klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆” (Êphêsô 4:29).
Si klei blŭ drei dôk hmăi kơ phung riêng gah? Klei blŭ anăn ba klei hdĭp amâodah ngă kơ phung mkăn tơl djiê?
Wah lač: Ơ Khua Yang, kâo thâo kâo awăt leh anăn ngă soh hlăm lu klei, boh nik hlăm klei kâo blŭ. Akâo kơ Khua Yang pap brei kơ klei soh kâo leh anăn bi mlih kâo grăp hruê hŏng klei myang Yang Mngăt Jăk. Akâo kơ klei kâo blŭ dưi bi bŏ kyua klei khăp leh anăn klei sĭt nik, čiăng bi guh kơang Anăn Ama leh anăn bi mđĭ ai ayŏng adei kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 44-45
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
