Yakaunpaus 3:2-6
Nqe cim:
“Tej lus uas koj hais cawm tau txojsia lossis txov txojsia. Yog li ntawd, koj yuav tau sau raws li tej lus uas koj hais.” (Pajlug 18:21)
Lus nug rau sawvdaws xav:
– Yakaunpaus siv cov duab twg los piv txog tus nplaig lub zog?
– Ua li cas lo lus hais muaj zog tas npaum li ntawd?
– Peb kawm tau yam twg ntsig txog kev siv yus tus nplaig?
Hais txog tus ntseeg kev ua neej, Yakaunpaus hais txog ib seem uas nyob hauv peb lub neej yog kev hais lus. Yakaunpaus zeem paub, “Peb txhua tus pheej ib sij ua yuam kev ib zaug” (nqe 2), nov yog yam uas muaj tseeb leejtwg kuj paub, yuam kev tej lus hais yog yam uas yoojyim ntsib. Tej lus uas peb hais muaj lub zog mus rau lwm tus. Yog tsis tswj kev hais lus, nws yuav dhau mus ua qhov uas txaus ntshai heev.
Tham txog lub zog ntawm tus nplaig, Yakaunpaus siv cov duab los pib txog. Yakaunpaus hais txog qhov uas tibneeg kev tswj tus nees los ntawm ib yam khoom uas yog muab xam xauv rau nees lub qhov ncauj; thiab tus duav tsav nkoj me me tiamsis muaj peexwm tsav tau lub nkoj loj mus (nqe 3-4). Dhau qhov ntawd, Yakaunpaus hais tias yog tias tswj tau tus nplaig, ua zoo siv tej lus hais ces yuav coj yus mus qhov yog. Thaum muab ob tug duab no los hais txog kev tswj tus nplaig, Yakaunpaus hais ntxiv txog qhov uas tus nplaig rhuav kom puastsuaj zoo nkaus li ib qhov hluavtaws me me kub tas ib lub hav zoov, txaus ntshai heev. Thiab tus nplaig lossis tej lus hais kuj muaj peevxwm “kub thoob plaws lub cev” (nqe 5-6).
Ua li cas tej lus hais yuav txaus ntshai ua luaj li ntawd? Qhov tseeb twb ua timkhawv qhia tias qhov no yog. Ib tug neeg ua timkhawv cuav rau rooj tu plaub yuav ua tus neeg txhaum yim raug lub txim hnyav dua xwb. Cov ntseeg Yexus tiag yeej tsis xav ua rau lwm tus tas kev cia siab, kawg kev thiab nrhiav kev tuag li. Peb twb pom muaj yam tsis zoo txog qhov uas hais tej lus mob siab ua puas neeg. Thaum thawj, peb pheej xav tias “hais lus cua tshuab tas” tiamsis lub qhov txhab tseem muaj nyob tsis ploj. Muaj tseeb raws li Pajlug 18:21 hais “Tej lus uas koj hais cawm tau txojsia lossis txov txojsia. Yog li ntawd, koj yuav tau sau raws li tej lus uas koj hais.”
Ntu Vajluskub no yog cov lus qhia rau peb kom tsis txhob saib tsis taus yus txojkev hais lus. Yog Vajtswv cov neeg, peb yuav tsum tswj yus tus nplaig hais lus kom tej lus coj mus tau txojsia, tsis yog rhuav kom puastsuaj. Nyob ib ncig peb tseem muaj ntau tus neeg tsis tau kev cawm dim, cia li qhia Txojmoo Zoo rau lawv, vim tej lus ntawd yog lus ua rau ciaj sia. Cia li hais tus Tswv tej lus kom pab tau lwm tus kev ntseeg loj hlob. Cia li hais “tej lus zoo thiab muaj nqis rau cov mloog” (Efexus 4:29).
Thov Vajtswv,
Tus Tswv, nyuam yaus paub tias nyuam yaus qaug zog thiab ua txhaum ntau yam, tshwjxeeb yog tej lus hais. Thov zam txim rau tej uas nyuam yaus ua yuam kev thiab hloov nyuam yaus los ntawm Vaj Ntsujplig lub hwjchim. Kom tej lus uas nyuam yaus hais yog lus kev hlub thiab qhov tseeb, ua rau Vajtswv tau ntsejmuag thiab txhawb tau cov ntseeg zog. Nyuam yaus tuav Tswv Yexus lub npe thov, Amees.
Tej lus uas peb hais puas hiam cov neeg uas nyob ibncig peb? Cov lus ntawd puas ua rau muaj txojsia lossis yog lus tsuj lwm tus mus txog thaum tuag?
Nyeem Vajluskub hauv peb lub xyoo: Phau Ntawv Nkauj 44-45
Kênh Youtube BHKTHN:
