Klei Aê Diê Blŭ: Hêbrơ 11:5-6
Êlan kliăng: “Y‑Ênŏk êbat mbĭt hŏng Aê Diê, êdei tinăn arăng amâo lŏ ƀuh ñu ôh, kyuadah Aê Diê mă ba ñu leh” (Klei Mphŭn Dơ̆ng 5:24).
Klei êmuh ksiêm mĭn: Si ngă mnuih Y‑Ênŏk jing? Ya boh tŭ dưn mâo mơ̆ng klei đăo ñu? Ya klei hriăm ih mâo mơ̆ng klei đăo Y‑Ênŏk?
Y‑Ênŏk jing čô Y‑Ađam ênuk tal kjuh, jing pô tal dua êdei ti Y‑Aƀel hră mơĭt kơ phung Hêbrơ bi êdah jing msĕ si sa klei bi hmô klă kơ klei đăo. Pô čih hră mơĭt kơ phung Hêbrơ brei thâo Y‑Ênŏk mâo klei “hưn bi sĭt kơ ñu bi mơak leh kơ Aê Diê” (êlan 5b), anei jing klei hưn bi sĭt brei ƀuh klei đăo Y‑Ênŏk, kyuadah tơdah amâo mâo klei đăo, amâo dưi bi mơak kơ Aê Diê ôh (êlan 6a). Y‑Ênŏk đăo mâo Aê Diê leh anăn tui duah klei mưn mơ̆ng Aê Diê (êlan 6b,c). Ñu bi êdah klei đăo hlăm klei dôk dơ̆ng ƀơ̆ng huă “êbat mbĭt hŏng Aê Diê” (Klei Mphŭn Dơ̆ng 5:24). Boh blŭ “êbat mbĭt” yua lu blư̆ hlăm hdruôm hră Klei Aê Diê Blŭ čiăng lač kơ klei dôk dơ̆ng ƀơ̆ng huă hŏng klei sĭt suôr amâodah klei bi mguôp sĭt suôr. Y‑Ênŏk đăo kơ Aê Diê, bi mguôp kjăp hŏng Khua Yang leh anăn bi mơak kơ Ñu. Anei jing klei aduôn aê ñu Y‑Ađam leh anăn H’Êwơ bi luč leh hlăk digơ̆ ngă soh. Anei jing klei phung hdĭp ênuk Y‑Ênŏk amâo uêñ mĭn mơh kyuadah diñu hdĭp knŏng čiăng bi hrăp klei kđeh diñu pô čiăng đuč, klei mĭn ai tiê diñu bŏ hŏng klei jhat (Klei Mphŭn Dơ̆ng 6:5).
Hlăm ênuk anăn, Y‑Ênŏk jing msĕ si sa klei bi hmô êdah klă mngač kơ sa cô mnuih mâo klei đăo, êbat mbĭt hŏng Aê Diê. Klei đăo Y‑Ênŏk bi mơak kơ Aê Diê leh anăn Aê Diê brei leh sa klei mưn yuôm bhăn kơ gơ̆. Leh tlâo êtuh thŭn êbat mbĭt hŏng Aê Diê, “Aê Diê pŭ ba ñu kơ adiê čiăng kơ ñu amâo djiê ôh” (Hêbrơ 11:5a). Jăk mơak êdimima kơ Y‑Ênŏk tơdah ñu jing sa hlăm knŏng dua čô mnuih Klei Aê Diê Blŭ čih bi êdah amâo tuôm găn klei djiê ôh kyuadah Aê Diê pô pŭ ba leh diñu kơ adiê, sa čô mkăn jing Khua pô hưn êlâo Y‑Êli (II Bruă Mtao 2:1-11).
Klei đăo Y‑Ênŏk lui pioh kơ drei lu klei hriăm yuôm ktuê êlan êbat mbĭt hŏng Khua Yang. Tui knuih Y‑Ênŏk, brei drei đăo mâo Aê Diê sĭt čiăng drei dưi nao giăm Ñu. Knŏng sa bĭt êlan drei dưi nao kơ Aê Diê anăn jing kmhal hĕ klei soh, jum Yêsu mŭt hlăm ai tiê drei. Msĕ mơh, brei drei hriăm knuih klei đăo Y‑Ênŏk hlăm klei drei êbat mbĭt hŏng Aê Diê, si tô hmô dôk hlăm klei bi mguôp hŏng Aê Diê leh anăn hdĭp bi mơak kơ Ñu. Drei dôk hdĭp hlăm ênuk lăn ala mâo lu anôk msĕ hŏng ênuk Y‑Ênŏk tơdah păt čiăng jih jang mnuih hdĭp knŏng čiăng bi hrăp klei kđeh diñu pô čiăng sơăi, amâo uêñ mĭn kơ Aê Diê ôh, “tian diñu pô jing yang kơ diñu … êjai mĭn kơ mnơ̆ng ti lăn ala” (Philip 3:19). Hlăm jih jang klei anăn, čiăng êbat mbĭt hŏng Khua Yang, brei drei knang kơ Yang Mngăt Jăk, Pô dôk hlăm klei hdĭp drei čiăng thâo kral klei sĭt nik, khăp kơ klei sĭt nik, leh anăn ngă tui si klei sĭt nik.
Drei dôk êbat mbĭt hŏng Aê Diê grăp hruê mơ̆?
Wah lač: Ơ Khua Yang, kâo lač jăk kơ Ih kyuadah Ih yua leh knuih klei đăo Y‑Ênŏk pioh bi hriăm kâo čiăng kâo tui tiŏ knhuah dôk dơ̆ng ƀơ̆ng huă bi mơak kơ Ih. Akâo Yang Mngăt Jăk đru kâo čiăng kâo tui duah Ih hŏng jih ai tiê, hriăm, khăp leh anăn ngă tui si Klei Ih Blŭ grăp hruê. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Yôhan 4-5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
