Henplais 11:5-6
Nqe cim
“Enauj ua nws lub neej nrog Vajtswv sib raug zoo, ces nws txawm cia li ploj lawm, rau qhov Vajtswv coj nws mus lawm.” (Chivkeeb 5:24).
Lus nug rau sawvdaws xav:
– Enauj yog tus neeg zoo li cas?
– Nws txojkev ntseeg ua rau nws tau txais nqi zog dabtsi?
– Peb kawm tau dabtsi los ntawm Enauj kev ntseeg?
Enauj yog Adas xeebntxwv tiam xya, yog tus neeg thib ob uas tus sau tsab ntawv Henpais hais txog tomqab Anpees ua qauv tshwjxeeb rau txojkev ntseeg. Tus uas sau tsab ntawv Henplais qhia paub Enauj “yeej ua haum Vajtswv siab” (nqe 5b), qhov no yog timkhawv qhia paub Enauj txojkev ntseeg, rau qhov tsis ntseeg yeej ua tsis tau haum Vajtswv siab (nqe 6a). Enauj ntseeg tias muaj Vajtswv thiab nws nrhiav nqi zog ntawm Vajtswv (nqe 6b,c). Enauj qhia tshwm nws kev ntseeg los ntawm kev ua neej “nrog Vajtswv sib raug zoo” (Chivkeeb 5:24). Lo lus “nrog” no siv ntau zaus hauv Phau Vajluskub, yog hais txog kev ua neej ncaj ncees lossis sib raug zoo. Enauj ntseeg tus Tswv, ua lub neej nrog tus Tswv sib raug zoo, ua haum Nws siab. Nov yog yam uas Enauj pojkoob yawgkoob Adas thiab Evas ua tsis tau nkawd thiaj poob rau kev txhaum. Nov kuj yog yam uas tiam Enauj nyob tsis muaj, rau qhov lawv tsuas xav ua raws li lawv ntshaw xwb, lawv lub siab xav ua phem ua qias (Chivkeeb 6:5). Nyob lub tsamthawj zoo li ntawd, Enauj yog ib tug qauv qhia tawm kev ntseeg, ua haum Vajtswv siab.
Enauj kev ntseeg ua haum Vajtswv siab thiab Nws muab nqi zog tshwjxeeb rau Enauj. Tomqab uas ua haum Vajtswv siab tau 300 xyoo, Vajtswv “coj Enauj mus, nws tsis tuag” (Henplais 11:5a). Nov yog ib txoj koob hmoov loj heev rau Enauj, nws yog ib hauv ob tug neeg tshwjxeeb nyob hauv Vajtswv Txojlus hais tias tsis tuag vim tus tswv coj mus lawm. Tus txuas ntxiv yog tus cevlus Eliyas (II Vajntxwv 2:1-11).
Enauj kev ntseeg ua rau peb kawm tau ntau zaj tseemceeb hauv lub neej nrog tus Tswv mus. Xyaum Enauj tus qauv, peb ntseeg ruaj hais tias yeej muaj Vajtswv thiab peb muaj feem mus cuag tau Nws. Txojkev uas yuav mus cuag tau Vajtswv yog lees yus tej kev txhaum, txais yuav Tswv Yexus los ua tus Tswv. Peb kuj kawm Enauj tus qauv ntseeg nrog tus Tswv mus, txhais tau hais tias nrog tus Tswv sib raug zoo thiab ua haum Nws siab. Peb tabtom ua neej nyob rau lub ntiajteb uas muaj ntau yam zoo li tiam Enauj nyob, feem coob txhua tus neeg tsuas xav ua raws li nyias lub siab nyiam, kev ntshaw xwb, tsis kub siab rau tus Tswv zaj, “lawv tus Vajtswv yog lawv lub plab,… tsuas xav txog tej uas yog ntiajteb li xwb” (Filipis 3:19). Nyob rau lub tsamthawj ntawd, cia kom ua tau haum Vajtswv siab, peb yuav tsum vamkhom Vaj Ntsujplig tus uas nyob hauv peb lub neej lub hwjchim kawm paub qhov tseeb, nyiam qhov tseeb, thiab ua raws li qhov tseeb xwb.
Thov Vajtswv,
Tus Tswv, nyuam yaus ua Koj tsaug vim Koj siv Enauj tus qauv ntseeg los qhia nyuam yaus paub ua lub neej haum Koj siab. Thov Koj tus Ntsujplig pab kom nyuam yaus rau siab ntso nrhiav Koj, kawm paub, hlub thiab ua raws li Koj Txojlus txhua hnub. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb puas tabtom nrog tus Tswv mus txhua hnub lawm los tsis tau?
Nyeem Vajluskub hauv peb lub xyoo: I Yauhas 4-5
Kênh Youtube BHKTHN:
