Klei Aê Diê Blŭ: I Y-Timôthê 2:1-7
Êlan kliăng: “Kyuadah mâo knŏng sa čô Aê Diê leh anăn knŏng sa čô Pô ti krah Aê Diê hŏng mnuih, jing Krist Yêsu, mnuih” (I Y-Timôthê 2:5)
Klei êmuh ksiêm mĭn: Leh mtô brei kwưh, akâo leh anăn wah lač brei kơ grăp čô mnuih hŏng phung khua kiă kriê, ya klei Khua ƀĭng kna Y-Pôl lŏ dơ̆ng mtô? Ya ngă ñu mñă mâo knŏng sa čô Aê Diê leh anăn knŏng sa čô Pô ti krah Aê Diê hŏng mnuih? Ya klei brei drei đru kơ phung thâo kral kơ Khua Yang thâo săng?
Leh mtô brei kwưh, akâo leh anăn wah lač brei kơ grăp čô mnuih hŏng phung khua kiă kriê, Khua ƀĭng kna Y-Pôl brei thâo Aê Diê čang hmăng grăp čô mnuih mâo klei bi mtlaih leh anăn thâo săng klă sĭt nik. Phung ƀuôn sang Aê Diê brei mđing wah lač brei kơ phung ka mâo klei bi mtlaih kyua klei anăn djŏ guôp hŏng klei Khua Yang čiăng. Êngao anăn, Khua Yang lŏ čiăng grăp čô mnuih “thâo săng klei sĭt nik” čiăng luă gŭ tŭ mă klei bi mtlaih Aê Diê brei (êlan 1-4).
Yap mơ̆ng leh ngă soh, anak mnuih bi mĭn leh lu hdră leh anăn klei kkuh kơ lu yang čiăng lŏ duah klei bi mtlaih, ƀiădah Klei Aê Diê Blŭ bi mklă sĭt leh, “knŏng sa čô Aê Diê leh anăn knŏng sa čô Pô ti krah Aê Diê hŏng mnuih, jing Krist Yêsu, mnuih” (êlan 5). Khua ƀĭng kna Y-Pêtrôs pô ăt jhŏng hưn ti anăp Sang Phat Kđi snei: “Amâo mâo klei bi mtlaih hlăm pô mkăn ôh, kyuadah ti gŭ adiê amâo mâo ôh anăn mkăn arăng brei leh kơ mnuih čiăng kơ hŏng Ñu yơh drei dưi mâo klei bi mtlaih” (Bruă Phung Khua Ƀĭng Kna 4:12). Amâo djŏ knŏng snăn ôh, ƀiădah ăt knŏng mâo sa čô Pô ti krah Aê Diê hŏng anak mnuih jing Khua Yang Yêsu Krist ti krah Aê Diê leh anăn anak mnuih. Boh blŭ “Pô ti krah Aê Diê hŏng anak mnuih” lač kơ Pô bi grăng. Anak mnuih ngă soh leh kyua anăn klei soh bi kgăn hŏng Aê Diê. Khua Yang Yêsu jing Aê Diê jing mnuih, Ñu jing Aê Diê êjai leh anăn jing anak mnuih êjai kyua anăn knŏng Khua Yang Yêsu jing Pô sa anăn bi grăng anak mnuih hŏng Aê Diê kyua klei Ñu djiê ti kyâo bi kal bi mtlaih anak mnuih.
Hruê êlâo, Khua Yang yua Khua ƀĭng kna Y-Pôl “pô mtô leh anăn khua ƀĭng kna” čiăng hâo hưn klei đăo leh anăn klei sĭt nik kơ phung tue (êlan 7). Hruê anei, grăp čô drei ăt dưi iêô mthưr čiăng hưn mdah Klei Mrâo Mrang Jăk kơ lăn ala soh jhat (Y-Mathiơ 28:19-20; Y-Markôs 16:15). Drei “kwưh, akâo, wah lač brei kơ arăng, phung mtao leh anăn kyua jih jang phung khua kiă kriê” (êlan 1-2). Mbĭt anăn brei đru kơ grăp čô mnuih dưm klei đăo hlăm sa Pô sa anăn jing Aê Diê, hrăm mbĭt thâo săng klei sĭt nik kơ klei bi mtlaih hlăm Khua Yang Pô Bi Mtlaih Yêsu. Ñu jing Pô ti krah Aê Diê hŏng anak mnuih sa anăn tuh leh êrah čiăng bi mtlaih anak mnuih. Tơdah phung đăo hriê kơ Khua Yang knŏng kyua klei bi ƀuh hlăm ai tiê êjai snăn dleh snăk dôk kjăp. Knŏng tơdah nao kơ Khua Yang hŏng sa klei đăo djŏ klă leh anăn klei thâo săng wăt tơdah ƀiă dưn ƀiădah klă mngač snăn kơh dưi bi mguôp hŏng Khua Yang leh anăn Phung Sang Aê Diê, leh anăn klei đăo grăp knhuang srăng hriê kơ prŏng.
Drei đru pô mkăn ka thâo Khua Yang thâo săng klei sĭt nik leh anăn klei đăo djŏ mơ̆?
Wah lač: Ơ Khua Yang, akâo kơ Ih pap brei kơ kâo kyua kâo ka jih ai tiê hưn kơ Khua Yang leh anăn klei kƀah hlăm bruă hưn klei sĭt nik kơ phung ka đăo. Akâo kơ Ih đru kâo jih ai tiê wah lač leh anăn hưn klei sĭt nik bi mtlaih klă mngač, djăp ênŭm. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
