Klei Aê Diê Blŭ: Rôm 15:1-13
Êlan kliăng: “Akâo kơ Aê Diê, Pô jing klei gĭr leh anăn klei bi juh, brei diih dôk sa ai hdơ̆ng diih, tui si Krist Yêsu, čiăng kơ mđrăm mbĭt hŏng sa asăp diih dưi mpŭ mni kơ Aê Diê, Ama kơ Khua Yang drei Yêsu Krist” (Rôm 15:5-6)
Klei êmuh ksiêm mĭn: Khua ƀĭng kna Y-Pôl iêô mthưr si phung ƀuôn sang Aê Diê srăng hdĭp? Ya ngă phung ƀuôn sang Aê Diê srăng hdĭp msĕ snăn lĕ? Si Phung Sang Aê Diê srăng hdĭp hlăm klei bi mguôp jing sa?
Khua ƀĭng kna Y-Pôl mtă brei phung ktang hlăm klei đăo, jing phung đĭ hriê kơ prŏng leh hlăm klei hdĭp myang đru gui klei ktrŏ phung awăt, jing phung awăt hlăm klei đăo. Mnuih ktang amâo bi mơak kơ ñu pô ôh, ƀiădah bi mơak kơ pô awăt hlăm klei đăo leh anăn ngă klei bi hmô jăk čiăng đru gơ̆ đĭ hriê kơ prŏng hlăm klei đăo. “Gui” lŏ mblang jing klam, mdiăng, tŭ klei ktrŏ, yŏng brei. Brei phung ktang hlăm klei đăo gĭr đru phung awăt đĭ hriê kơ prŏng hlăm klei đăo (êlan 1-2). Ñu mă sa klei bi hmô jăk klă brei jih jang mnuih tui. Khua Yang Yêsu, Aê Diê Yang Tal Dua amâo ngă tui si klei Ñu pô čiăng ôh ƀiădah ngă tui si klei Aê Diê Ama čiăng, săn asei mlei čiăng bi mtlaih jih jang mnuih soh. Khua Yang Yêsu jum leh drei êjai drei jing mnuih soh jŭ jhat. Ñu tŭ jih knuih jhat drei, gĭr bi hriăm mjuăt drei čiăng kơ drei jing msĕ si Ñu (êlan 3-6). Phung đăo ti čar Rôm mâo lu djuê ana, mâo klei mĭn mdê mdê ƀiădah jih jang mâo klei Khua Yang pap leh anăn bi mtlaih, leh anăn iêo kơ Khua Yang jing Ama sơăi. Snăn yơh, brei phung ayŏng adei hlăm gŏ sang Khua Yang dôk sa ai hdơ̆ng ayŏng adei “tui si Krist Yêsu” (êlan 5), čiăng lač bi mguôp jing sa hlăm Yang Krist amâo djŏ dôk sa ai tui si klei mĭn pô mkăn ôh.
Tơdah bi mguôp jing sa hlăm Khua Yang snăn “bi jum bĕ hdơ̆ng diih” (êlan 7). Êlưih snăk drei bi lui hdơ̆ng drei kyua jing mdê hlăm hnơ̆ng klei hdĭp myang amâodah mdê hlăm klei mĭn, ƀiădah tơdah drei hdĭp msĕ snăn hdơ̆ng drei si ngă “drei dưi bi guh kơang kơ Aê Diê” lĕ! Y-Pôl mñă, Aê Diê jing Pô sĭt suôr, Ñu bi sĭt sơăi klei Ñu ƀuăn leh kơ aê phŭn Y-Abraham, mơ̆ng phung găp djuê anăn srăng kkiêng kơ sa čô Pô Bi Mtlaih leh anăn mơ̆ng phung găp djuê anăn mơh jih jang phung găp djuê mnuih srăng mâo klei jăk jĭn (Klei Mphŭn Dơ̆ng 22:18). Mơ̆ng êlan 9-12, ñu lŏ hrêč yua lu êlan Klei Aê Diê Blŭ čiăng hưn bi sĭt kơ klei khăp leh anăn hdră bi mtlaih Aê Diê mkra leh wăt kơ phung tue amâo mâo klei bi kah ôh.
Jih jang phung đăo jing phung bi tui leh hŏng êrah Yêsu Krist leh anăn jing yuôm sơăi ti anăp Aê Diê. Kyuanăn, brei phung ayŏng amai adei hlăm klei đăo hdĭp bi mơak kơ Aê Diê, bi jum hdơ̆ng ayŏng amai adei mơ̆ng klei jing mdê mdê. Drei čiăng snăk kơ Klei Aê Diê Blŭ atăt gai leh anăn mtrŭt drei kơ klei wah lač, đru bi wah lač brei hdơ̆ng drei čiăng kơ grăp čô mâo klei ktang bi mguôp jing sa hlăm Yang Mngăt Jăk, sa ai mă bruă leh anăn bi guh kơang kơ Aê Diê, bi đru čiăng đĭ hriê kơ prŏng hlăm klei hdĭp myang.
Drei dôk bi mguôp jing sa hlăm Yang Mngăt Jăk hĕ amâodah bi mguôp hŏng mnuih tui si klei mĭn drei pô?
Wah lač: Ơ Khua Yang, kâo bi mni kơ Ih kyua klei Ih khăp leh anăn klei Ih pap kâo dưi jing anak Ih. Thiăm kơ kâo klei đăo, klei khăp, klei thâo mĭn leh anăn klei gĭr čiăng kơ kâo hdĭp hơ̆k mơak leh anăn bi mguôp hŏng phung ayŏng amai adei kâo hlăm klei kkuh mpŭ kơ Ih, leh anăn bi đru hdơ̆ng hmei čiăng đĭ hriê kơ prŏng hlăm klei hdĭp myang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 46
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
