Klei Aê Diê Blŭ: Y‑Mathiơ 12:38‑40
Êlan kliăng: “Kyuadah msĕ si Y‑Yôna dôk hlăm tian kan prŏng tlâo hruê tlâo mlam, msĕ snăn mơh Anak Mnuih srăng dôk hlăm lăn êlam tlâo hruê tlâo mlam.” (Y‑Mathiơ 12:40)
Klei êmuh ksiêm mĭn: Ya klei phung Pharisi akâo kơ Khua Yang Yêsu ngă? Ya ngă diñu akâo msĕ snăn lĕ? Si ngă Khua Yang Yêsu lŏ wĭt lač kơ phung Pharisi? Hlăm ya mta klei drei akâo leh kơ Khua Yang Yêsu msĕ si phung Pharisi?
Phung khua čih hră leh anăn phung Pharisi jing phung ƀuh mơ̆ng akŏ klei myang Khua Yang Yêsu suôt leh yang jhat (Y‑Mathiơ 12:22). Ƀiădah lĕ, diñu ăt lŏ akâo thiăm sa klei bi knăl mdê mơh. Klei diñu akâo thiăm klei bi knăl mdê anăn amâo djŏ čiăng bi kjăp klei diñu đăo kơ Yêsu jing Yang Mêsi hlăm Klei Bi Mguôp Hđăp hưn leh ôh, ƀiădah diñu čiăng lông dlăng Khua Yang Yêsu. Snăn yơh, diñu lač: “Ơ nai” amâo djŏ diñu mpŭ kơ Khua Yang ôh, ƀiădah čiăng djik djak kơ Gơ̆, diñu čiăng mčhur Gơ̆ ngă sa klei bi knăl mdê prŏng čiăng kơ diñu dưi tŭ ư Khua Yang Yêsu jing Yang Mêsi. Khua Yang Yêsu thâo jih jang klei Ñu ngă djăp leh kơ phung khua čih hră leh anăn phung Pharisi thâo kral Ñu jing Yang Mêsi.
Khua Yang Yêsu bi êdah knuih diñu jing “ƀai” leh anăn “knhông” brei ƀuh diñu knŏng mâo mă hmôk klei đăo ti êngao bi hlăm lam amâo mâo huĭ mpŭ kơ Aê Diê ôh, leh anăn jih jang bruă diñu ngă jing jhat ƀai ti anăp Aê Diê. Kyuadah ai tiê diñu khăng, tơdah lŏ mâo thiăm sa klei bi knal mdê snăn kăn mâo klei tŭ dưn rei kyuanăn Khua Yang lač amâo srăng ngă sa mta klei bi knăl mdê ôh kơ phung găp djuê anei êngao kơ klei bi knăl mdê Khua pô hưn êlâo Y‑Yôna ngă leh, Khua Yang čiăng lač kơ klei djiê, klei dơr, leh anăn klei Ñu kbiă lŏ hdĭp tloh tlâo hruê. Jih jang phung Yuđa thâo sơăi kơ klei kan lun leh anăn ô̆ Khua pô hưn êlâo Y‑Yôna (Y‑Yôna 2:1,11). Klei truh anei jing rup kơ klei Yang Krist djiê leh anăn kbiă lŏ hdĭp, leh anăn Khua Yang lač anei yơh jing klei bi knăl mdê prŏng hĭn leh anăn yuôm hĭn.
Bi hŏng phung đăo hruê anei, klei Khua Yang tŭ klei djiê kyua klei soh drei leh anăn kbiă lŏ hdĭp leh rơ̆ng kjăp kơ drei mâo klei hdĭp hlŏng lar djăp leh kơ drei hdơr knga bi mni leh anăn myơr jih klei hdĭp kơ Ñu. Drei srăng jing msĕ si phung Pharisi yơh tơdah drei dlăng kơ Khua Yang amâo mdê ôh hŏng yang bi mdrŏng amâodah mniê myang, mơ̆ng Ñu ngă klei bi knăl mdê brei kơ drei ya mta klei drei čiăng kơh drei đăo kơ Ñu. Tơdah drei ăt dôk akâo klei bi knăl mdê jing klei čoh čuăn kơ klei drei đăo, klei anăn bi êdah kơ klei drei đăo êkoh snăk. Drei amâo ƀuh ôh ênoh kơ klei bi tui jing prŏng snăk kyuadah Anak Aê Diê pô tŭ leh klei djiê kyua drei, jing phung amâo năng ôh. Đăm čoh čuăn ôh Khua Yang bi êdah klei Ñu khăp hŏng lu klei bi knăl mdê, amâodah brei Khua Yang wĭt lač klei drei akâo tui si drei čiăng, ƀiădah brei drei dlăng kơ kyâo bi kal čiăng ƀuh boh prŏng klei khăp Khua Yang Yêsu brei leh kơ drei čiăng lač jăk kơ Ñu nanao leh anăn myơr jih klei hdĭp kyua klei bi tui drei mă tŭ leh.
Drei dôk thâo kral mơ̆ klei khăp prŏng prĭn Aê Diê brei kơ pô?
Wah lač: Ơ Khua Yang, kâo bi mni kơ Ih kyua klei pap prŏng hĭn Ih brei leh kơ kâo, đru kâo amâo dlăng hơăi mang ôh kơ klei pap klei bi tui, leh anăn đru kâo thâo hdơr knga kơ Ih nanao, myơr jih klei hdĭp pioh mă bruă kơ Ih.
Dlăng Klei Aê Diê Blŭ hlăm tlâo thŭn: Y‑Ôsê 11:1‑12:14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
