Klei Aê Diê Blŭ: Klei Mphŭn Dơ̆ng 4:10-15
Êlan kliăng: “Y-Kain lač kơ Khua Yang, “Klei bi kmhal kâo jing prŏng hĭn kơ kâo dưi tŭ” (Klei Mphŭn Dơ̆ng 4:13)
Klei êmuh ksiêm mĭn: Leh ngă soh, ya klei bi kmhal Y-Kain srăng tŭ leh anăn si ñu lŏ wĭt ngă? Ya klei hriăm drei mâo kơ Aê Diê mơ̆ng klei Ñu bi êdah leh klei pap kơ Y-Kain?
Aê Diê jing Pô doh jăk leh anăn kpă ênô, Ñu amâo srăng lui amâo bi kmhal klei soh ôh. Êrah Y‑Aƀel ur mơ̆ng lăn truh kơ Aê Diê akâo kơ klei phat kđi kpă (êlan 10). Kyuanăn Aê Diê phat kđi Y-Kain. Ñu tăm pah kơ lăn amâo brei lăn lŏ mboh lu ôh, leh anăn Y-Kain, mơ̆ng sa čô mnuih ngă hma jing hĕ mnuih đuĕ hiu rưng nanao ti lăn ala (êlan 12). Y-Kain pô lač kơ Aê Diê klei bi kmhal anei jing ktrŏ snăk: “Nĕ anei, Ih suôt kâo leh hruê anei mơ̆ng lăn anei, leh anăn mdăp kâo mơ̆ng ƀô̆ mta Ih; kâo srăng jing sa čô pô đuĕ nanao leh anăn hiu rưng ti lăn ala, leh anăn hlei pô tuôm hŏng kâo srăng bi mdjiê hĕ kâo” (êlan 14). Klei bi kmhal anăn jing prŏng đei kyuadah amâo djŏ Y-Kain knŏng luč anôk dôk, klei duah ƀơ̆ng huă ôh, ƀiădah wăt ñu srăng hdĭp hŏng klei huĭ, đuĕ dăp nanao mơh. Ñu huĭ srăng mâo pô bi mdjiê hĕ ñu kyuadah ñu jing sa čô mnuih bi mdjiê mnuih. Klei huĭ anăn jing hĕ sa mnơ̆ng bi ktrŏ, sa klei bi huĭ guôm klei mĭn Y-Kain, tơl ñu amâo lŏ dưi wơr ôh. Sĭt nik, mnuih ngă soh amâo dưi mâo klei êđăp ênang ôh hlăm klei hdĭp.
Ti anăp klei huĭ Y-Kain, Aê Diê lač Ñu amâo srăng lui arăng bi mdjiê Y-Kain ôh. Aê Diê lač hlei pô bi mdjiê Y-Kain, pô anăn srăng tŭ klei bi kmhal ktrŏ snăk, leh anăn Ñu ngă sa klei bi knăl kơ Y-Kain (êlan 15). Klei bi knăl anăn čiăng răng mgang Y-Kain mơ̆ng klei djiê. Drei amâo thâo klă ôh si jing klei bi knăl anăn, ƀiădah drei thâo klă anăn jing klei bi knăl kơ klei pap Aê Diê. Klei bi knăl anăn brei ƀuh Aê Diê amâo lui tha mnuih dôk hlăm klei soh leh anăn kơ klei bi rai ôh. Klei pap Aê Diê tui hlue Y-Kain nanao ti anôk ñu nao. Tơdah Y-Kain ngêñ leh anăn ăl, Aê Diê pap brei leh kơ ñu, Aê Diê hưn kơ ñu thâo klei soh dôk kăp guôn ñu nanao. Tơdah Y-Kain ngă klei soh bi mdjiê mnuih, Aê Diê pap brei leh kơ ñu, Aê Diê brei kơ ñu mmông myun čiăng kơ ñu thâo kral klei soh ñu. Wăt hlăm klei Aê Diê phat kđi, Ñu ăt pap leh anăn răng mgang Y-Kain mơ̆ng klei djiê mơh. Leh anăn kyua klei pap prŏng anăn, tơdah lăn ala tui hlue êlan Y-Kain (Y‑Yut êlan 11), snăn Anak Aê Diê mâo knŏng sa čô hriê jing mnuih ti lăn ala, tŭ klei djiê ti kyâo bi kal. Tơdah êrah Y-Aƀel tuh leh ur krao kwưh akâo kơ klei phat kđi kpă, snăn êrah Khua Yang Yêsu jing “êrah jăk hĭn” (Hêbrơ 12:24) kyuadah êrah anăn tuh leh čiăng kơ hlei pô kmhal kơ klei soh, đăo kơ Khua Yang Yêsu mâo klei pap brei sơăi kơ klei soh leh anăn mâo klei hdĭp hlŏng lar.
Si ngă drei srăng kmhal kơ klei soh čiăng mă tŭ klei Khua Yang pap brei hĕ amâodah ăt srăng ruah êbat hlăm êlan soh srăng tŭ klei bi kmhal bŏ hŏng klei ktrŏ?
Wah lač: Ơ Khua Yang, kâo thâo klei soh lui boh jhat ktrŏ snăk. Akâo Khua Yang đru kâo weh đuĕ mơ̆ng “êlan Y-Kain” leh anăn brei kâo êbat nanao hlăm klei huĭ mpŭ kơ Ih. Tơdah kâo ngă soh, đru kâo thâo kmhal hĕ leh anăn akâo kơ Ih pap brei. Bi mni kơ Ih Khua Yang kyuadah klei pap Ih jing prŏng hĭn kơ jih jang klei bi kmhal prŏng hĭn kơ klei soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êskiêl 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
