Chivkeeb 4:10-15
Nqe cim:
“Ka-ees hais rau tus Tswv hais tias, “Koj rau txim rau kuv hnyav tshaj qhov kuv yuav ris taus lawm” (Chivkeeb 4:13).
Lus nug xav:
– Tom qab uas ua txhaum, Ka-ees yuav raug lub txim twg thiab nws hais li cas?
– Peb kawm tau dabtsi hais txog Vajtswv dhau los ntawm qhov Nws ua rau Ka-ees?
Vajtswv yog tus uas dawbhuv, ncaj ncees Nws yuav tsis cia tus neeg txhaum dim. Anpees cov ntshav lub suab twb nrov mus txog Vajtswv tus uas ncaj ncees (nqe 10), yog li ntawd, Nws rau txim rau Ka-ees. Vajtswv foom tsis zoo ua rau tej qoobloo loj hlob tsis taus, thiab Ka-ees khwv cog qoobloo ntau npaum li cas los tej av ntawd yuav ua rau koj tej qoobloo hlob tsis taus, ua neeg lojleeb mus thoob qab ntuj tsis muaj vaj tsis muaj tse nyob (nqe 12). Ka-ees tus kheej hais rau tus Tswv hais tias kuv lub txim hnyav dhau lawm: “Koj ntiab kuv tawm ntawm thaj av no thiab tawm ntawm koj lub xubntiag mus. Kuv yuav ua neeg lojleeb mus thoob qab ntuj tsis muaj vaj tsis muaj tse nyob, thiab leejtwg ntsib kuv los yuav tua kuv povtseg” (nqe 14). Lub txim no hnyav dhau vim Ka-ees tsis yog tsis muaj chaw nyob xwb, nws tseem poob kev ua noj ua haus, dua li tseem ua neej ntshai rwg, khiav rau ub rau no. Ka-ees txhawj tsam nws raug tua rau qhov nws yog tus uas tua neeg. Txojkev txhawj no dhau los ua lub nra hnyav, txojkev txhawj niaj hnub nyob puagncig Ka-ees, ua rau nws tsis kaj siab li. Tseeb tiag, tus neeg uas ua txhaum yeej tsis muaj kev kaj siab hauv kev ua neeg li.
Thaum Ka-ees txhawj ntshai, Vajtswv hais tias Nws yuav tsis cia leejtwg ua phem rau Ka-ees. Vajtswv hais tias yog leejtwg tua Ka-ees ces yuav raug txim hnyav heev, thiab tus Tswv ntaus cim rau Ka-ees lub cev (nqe 15). Lub homphiaj ntawm lub cim yog tiv thaiv kom Ka-ees tsis raug tua. Peb tsis paub lub cim ntawd meej yog hais txog dabtsi, tiamsis yam uas peb paub meej yog lub cim uas Vajtswv nplooj siab hlub. Lub cim ntawd qhia paub Vajtswv tsis muab tus neeg txhaum tso tseg thiab ua kom puastsuaj. Vajtswv nplooj siab yeej tseem niaj hnub nrog nraim Ka-ees txojkev ua neej. Thaum Ka-ees chim thiab npautaws, tus Tswv hlub, Nws hais ceebtom tias kev txhaum yuav tos ntsoov nws. Thaum Ka-ees ua txhaum tua neeg, tus Tswv hlub, cia Ka-ees muaj sijhawm zeem paub nws qhov txhaum. Kiag lub sijhawm Vajtswv rau txim, Nws yeej tseem hlub thiab tiv thaiv tsis pub Ka-ees raug tua tuag. Thiab twb yog vim tibneeg nplooj siab taug Ka-ees txojkev (Yudas nqe 11), ces Vajtswv Leej Tub thiaj los hauv ntiajteb no ua neeg thiab tuag saum ntoo khaublig. Yog Anpees cov ntshav lub suab nrhiav kev ncaj ncees, ces Tswv Yexus cov ntshav yog cov ntshav uas muaj nqis dua (Henplais 12:24) rau qhov Nws cov ntshav ntws los cawm cov neeg uas tso kev txhaum tseg, txais yuav Tswv Yexus thiab tau txojsia ntev ibtxhis.
Thov Vajtswv,
Vajtswv, nyuam yaus paub tias kev txhaum coj mus raug lub txim hnyav heev. Thov Koj tswj kom nyuam yaus tsis taug Ka-ees txojkev tiamsis taug txojkev uas hwm Koj. Thaum nyuam yaus yuam kev ua txhaum, thov Koj qhia lees txim kom tau Koj txojkev zam txim. Nyuam yaus ua tsaug vim Koj muaj nplooj siab hlub loj dua kev rau txim. Nyuam yaus tuav Tswv Yexus lub npe thov, Amees.
Peb puas txaus siab hlo lees txim kom tau txais Vajtswv txojkev hlub, lossis pheej xaiv taug txojkev txhaum kom raug lub txim hnyav?
Nyeem Vajluskub hauv peb lub xyoos: Exekees 12
Kênh Youtube BHKTHN:
