Blŭng a 4:10-15
“Kain tơl Kră Yang thoi âu: Tơdrong phak inh trăp dêh, pŭ ưh kơ kĕ.” (Blŭng a 4:13).
Nơ̆r jet tơchĕng pơwao:
– Đơ̆ng rŏng kơ pơm yoch, Kain đei tơ’bơ̆p hăm tơdrong phak ayơ na jơhngơ̆m sư thoi yơ?
– Lu bơ̆n đei pơhrăm iŏk tơdrong kiơ gah tơdrong Kră Yang pơma dơnuh hăm Kain?
Kră Yang ‘Bok Kei-Dei jơ̆ Yang ‘lơ̆ng rơgoh, tơpăt ưh kơ đei layơ lê̆ ôh tơdrong phak, inh ‘bôh pham oh ih ôr đơ̆ng teh păng nơ̆r sư krao kơtơ̆ng truh tơ Inh, wă kơ băt tơdrong tơpăt (trong 10). Thoi noh, Kră Yang tơbăt tơdrong yoch Kain, Kră Yang hiap pơtê̆ teh jang sa ưh pă pơjing tơmam sa kơ ih bơih, Kain đơ̆ng minh ‘nu bơngai choh pơtăm phe ‘ba na jing thông mang huang jơ̆p kơ teh đak (trong 12). Kain khan kơ Kră Yang dôm tơdrong phak âu trăp dêh: “Âu, năr ‘nâu, Ih pơpuh inh đơ̆ng teh âu, inh weh đơ̆ng muh măt Ih, gô thông mang huang jơ̆p kơ teh đak, đơ̆ng noh dah đei bu tơ’bơ̆p inh, sư gô pơlôch inh.” (trong 14). Tơdrong phak noh trăp tơpă, yua kơ Kain ưh kơ sĭ hiong teh đak đĕch ôh, hiong hloi tơdrong jang sa, mălei arih lăm tơdrong hli hlơt, chă ôn klĕnh, sư hli kơ đe pơlôch sư yua kơ bơih minh ‘nu bơngai đêl pơlôch đe. Tơdrong hli hlơt noh jing minh tơdrong pŭ trăp dêh, minh tơdrong pơm kơ sư tơchĕng ‘blŏk, pơm kơ sư ưh kơ layơ hiơt. Tơpă, bơngai pơm yoch gô ưh kơ đei layơ hiôk hơđơ̆ng lăm chăl arih.
‘Bơ̆t tơdrong hli hlơt Kain noh, Kră Yang ‘Bok Kei-Dei đei tơbăt hơđăl bơih thoi âu Kră Yang ưh kơ ăn tơdrong lôch truh kơ sư ôh. Kră Yang khan thoi âu dah bu pơlôch ih đe gô pơm ‘mong plơ̆ kơ sư tơpơh wơ̆t, Kră Yang đei ăn tơdra tơ akâu Kain (trong 15). Tơdra ‘noh wă kơnhăm bơwei sư huay kơ lôch. Lu bơ̆n ưh kơ băt tơdra noh trŏ ‘blep sư thoi yơ, mălei tơdrong mă bơ̆n băt hơđăl Kră Yang ‘Bok Kei-Dei ưh kơ achăng tŭk kon bơngai lăm yoch păng pơrăm ôh. Tơdrong ‘mêm Kră Yang oei bơwei Kain đĕch kơplah yak năm. Mưh Kain sơ’ngon păng ơh blĕk, Kră Yang ‘mêm mơnat kơ sư. Na Kră Yang đei roi tơbăt lê̆ tơdrong yoch oei răp gô sư, kơplah Kain pơlôch bơngai. Kră Yang oei ‘mêm mơnat kơ sư đĕch ‘măn kơ sư jơ năr wă băt kơ sư bơngai pơm yoch. Na mă lăm năr Kră Yang tơbăt tơdrong sư pơm yoch. Kră Yang oei ‘mêm mơnat bơwei Kain wă huay kơ đei bu pơlôch. Yua kơ tơdrong ‘mêm tih tin noh bơih, kơplah kon bơngai yak kiơ̆ trong Kain (Jut trong 11), lei na Kon Pôm ‘Bok Kei-Dei jur tơ ala teh jing kon bơngai bơ̆n, chu lôch tơ ‘long pơglang. Dah pham ‘bok Abel krao ôr tơdrong tơpăt, lei pham Kră Yang Yêsu noh “pham ‘lơ̆ng hloh” (Hêbrơ 12:24), yua kơ pham noh tuh ăn kơ bu mă băt tơbral, lui sơng iŏk Kră Yang Yêsu Krist na Kră Yang Sư gơh mơnat huay kơ jô̆ yo păng gơh arih ling lang.
Ơ Kră Yang, inh băt kơ lĕch yua kơ đơ̆ng tơdrong yoch jing pơm ăn trăp dêh. Apinh Kră Yang tơgŭm inh weh đơ̆ng “trong năm Kain” păng ăn kơ inh yak kiơ̆ trong hli yom kơ Ih. Mưh inh pơm ‘bơm yoch, apinh Ih ăn kơ inh băt tơbral păng ăn tơdrong ‘mêm mơnat đơ̆ng Ih. Bơnê kơ Ih ‘mêm mơnat tih tơpă pơting hăm tơdrong phak trăp tih hloh kơ tơdrong yoch, krao khan yua anăn Kră Yang Yêsu Krist, Amen.
Lu bơ̆n hăm wă tơbral yoch na wă sơng iŏk tơdrong ‘mêm đơ̆ng Kră Yang, dah mă oei rơih iŏk yak kiơ̆ tơdrong kơnê̆ na pŭ iŏk tơdrong phak?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 12
Kênh Youtube BHKTHN:
