Klei Aê Diê Blŭ: Y-Yôsuê 4:1-14
Êlan kliăng: “Hlăk anăn diih srăng lač kơ diñu, Êa krông Yurdan khuôt hĕ ti anăp hip klei bi mguôp Yêhôwa; tơdah hip găn êa krông Yurdan, êa khuôt hĕ. Snăn yơh boh tâo anei srăng jing nanao sa klei bi hdơr kơ phung ƀuôn sang Israel” (Y-Yôsuê 4:7)
Klei êmuh ksiêm mĭn: Ya ngă Aê Diê mtă kơ Y-Yôsuê mă klŏ boh tâo? Hŏng ya klei kñăm? Ya ngă Aê Diê čiăng kơ phung ƀuôn sang Ñu hdơr nanao kơ bruă anei? Si klei hdĭp drei srăng jing tơdah amâo hdơr, kđăm hlăm ai tiê kơ ya bruă Aê Diê ngă leh kơ pô?
Leh phung ƀuôn sang Israel găn êa krông Yurdan, phung khua ngă yang dôk ti krah êa krông hŏng Hip Klei Bi Mguôp ti mra, snăn Aê Diê lač hŏng Y-Yôsuê mtô kơ pluh dua čô, bi ala kơ dŭm êpul Israel, mă pluh dua klŏ boh tâo ti krah êa krông, anôk jơ̆ng phung khua ngă yang dôk dơ̆ng, leh anăn klam ba ti hang krông, dưm ti anôk diñu srăng pĭt mlam. Klei kñăm jing čiăng kơ dŭm klŏ boh tâo anei jing sa klei bi knăl ti krah phung ƀuôn sang, grăp blư̆ ƀuh snăn phung ƀuôn sang Aê Diê lŏ hdơr kơ Aê Diê ngă leh kơ êa krông Yurdan ktlah ti anăp Hip Klei Bi Mguôp mơ̆ng Yêhôwa, leh anăn dŭm klŏ boh tâo anei srăng yua jing klei bi hdơr lă lar kơ phung ƀuôn sang Israel (êlan 7). Anei ăt jing klei bi knăl čiăng mtô kơ anak čô ênuk êdei anăp diñu kơ klei Aê Diê ngă leh kơ djuê ana pô. Phung ƀuôn sang Aê Diê brei hdơr kơ bruă myang Aê Diê ngă leh kơ diñu, amâo djŏ knŏng dŭm hruê ôh, dŭm thŭn ôh, ƀiădah jing lă lar. Kyua anăn, bruă klam mtô anak čô kơ ya bruă Aê Diê ngă leh čiăng hdơr knga kơ Aê Diê jing bruă brei ngă hlăm grăp gŏ sang.
Phung ƀuôn sang Aê Diê hlue ngă klei Aê Diê mtô leh čiăng bi hdơr kơ ya klei mâo leh. Y-Yôsuê ăt mdơ̆ng pluh dua klŏ boh tâo ti krah êa krông anôk phung khua ngă yang dôk dơ̆ng. Hlăm yan êa khuôt, arăng srăng ênưih ƀuh dŭm klŏ boh tâo anei êdah ti krah êa krông. Snăn, kăm boh tâo ti krah êa krông jing klei bi knăl kơ anôk klei myang ngă leh, bi kăm boh tâo ti hang bi hdơr kơ bruă Khua Yang ngă kơ phung ƀuôn sang Ñu.
Drei ênưih wơr kơ klei yuôm bhăn Aê Diê ngă leh kơ pô leh anăn gŏ sang pô. Kyua anăn tơdah mâo klei êđăp ênang, mdrŏng sah, drei khăng ngă ngơi mang, amâo hdơr knga leh anăn amâo hdơr ôh kyua mâo Aê Diê yơh, drei dưi mâo djăp mta klei. Tơdah amâo hdơr ôh kơ bruă Aê Diê ngă leh kơ pô snăn tlă anăp hŏng klei dleh dlan, drei ăt ênưih đing amâodah huĭ hyưt leh anăn amâo jhŏng truh kơ êlan Aê Diê čiăng pô nao amâodah bruă mrâo Aê Diê čiăng kơ pô ngă. Aê Diê čiăng kơ phung ƀuôn sang Ñu brei hdơr nanao kơ bruă prŏng Aê Diê ngă leh kơ diñu, Ñu ăt čiăng kơ drei hdơr nanao kơ bruă Ñu ngă leh kơ pô, Aê Diê pô mbĭt hŏng pô, leh anăn klei myang Ñu ngă leh hlăm klei hdĭp pô. Leh anăn knŏng tơdah drei hdơr kơ Aê Diê kơh, drei srăng hdĭp hdơr knga kơ ayŏng amai adei đru leh pô hlăm klei hdĭp.
Drei dôk hdĭp hŏng ai tiê hdơr knga kơ Aê Diê leh anăn hdơr nanao kơ klei Aê Diê ngă leh kơ pô mơ̆?
Wah lač: Ơ Khua Yang, akâo kơ Ih đru kâo đăm wơr ôh klei jăk Ih ngă leh kơ kâo. Akâo kơ Ih đru kâo kjăp ai tiê đăo knang kơ klei sĭt suôr leh anăn klei Ih dôk mbĭt hŏng kâo čiăng lŏ dơ̆ng hdĭp bi mơak kơ Ih leh anăn ngă ya klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 106
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
