Klei Aê Diê Blŭ : Klei Bi Hriêng 20:4
Êlan kliăng: “Mnuih alah amâo kai hma djŏ yan, snăn ti yan puôt ñu amâo srăng mâo boh ôh.” (Klei Bi Hriêng 20:4)
Klei êmuh ksiêm mĭn : Si knuih phung alah tơdah truh yan puôt wiă ? Ya klei phung alah srăng mâo ? Si drei ba yua leh klei găl Aê Diê brei leh anăn ngă hŏng si ai tiê ?
Hlăm Klei Bi Hriêng 20:4, Mtao Salômôn brei ƀuh mta phŭn leh anăn boh jhat mơ̆ng phung alah. Boh blŭ “yan puih” bi mklăk hŏng “yan puôt”; leh anăn “amâo kai hma djŏ yan” jing “amâo srăng mâo boh ôh”. Čiăng dưi hrui pĕ mnơ̆ng dhơ̆ng, ƀĭng ngă lŏ hma brei tŭ lu klei dleh dlan suăi êmăn, kai hma, buh pla msĕ si Y‑Êsai 28:24 čih leh, “Djŏ mơ̆ pô kai hma čiăng rah dôk kai nanao? Djŏ mơ̆ ñu tlăng leh anăn bi ƀhĭ nanao lăn ñu?”
Yan adiê krĭng Palestin mâo dua yan, yan bhang mơ̆ng mlan 5 truh mlan 10, yan adiê mđiă ktang, ƀiă hjan. Yan puih mơ̆ng krah mlan 10 truh mlan 4, jing yan hjan. Hlăm wưng anei, phung ngă lŏ hma čang hmăng dŭm gưl adiê hjan akŏ yan, tơdah ƀuh lăn êun snăn mphŭn hnêč kai hma leh anăn buh pla, kyua anăn yan puih jing wưng bŏ hŏng yuôm bhăn hŏng ƀĭng ngă lŏ hma. Tơdah buh pla amâo djŏ yan, bruă ngă srăng dleh dlan leh anăn amâo mâo klei tŭ dưn ôh. Tơdah grăp čô mnuih ruăt kuăt tuh ai kai hma hlăk yan puih truh snăn phung alah amâo nao kai hma ôh, kăn buh pla rei, ƀiădah tơdah yan hrui wiă snăn lŏ čiăng mâo mdiê, čiăng mâo mnŏng ƀơ̆ng. Klei knhal tuč kơ phung alah amâo djŏ jing êpa ară anei ôh, ƀiădah lŏ kƀah hlăm êdei anăp kyua diñu amâo mâo asăr mjeh kơ yan êdei ôh. Klei mĭn phung alah, amâo čiăng mă bruă ôh ƀiădah čiăng mâo mnơ̆ng ƀơ̆ng jing klei mĭn phung mluk (Klei Bi Hriêng 12:11, 28:19), hlăk anăn nao akâo kăn mâo mnuih brei mơh.
Hlăm bruă mngăt msĕ snăn mơh, čiăng mâo wiă snăn brei buh pla. Pô čih hră Klei Mmuñ Hđăp lač leh:“Phung buh mdiê hŏng êa ală, srăng puôt wiă hŏng klei hơ̆k mơak. Hlei pô djă mjeh nao buh hŏng klei hia, srăng lŏ wĭt hŏng klei ur hơ̆k djă ba čăp mdiê mbĭt”(Klei Mmuñ Hđăp 126:5-6). Đăm bi liê mang ôh hruê mmông hlăm kpiê ƀiêr, hlăm klei bi mneh msao amâo tŭ jing, amâodah ƀuah ăl tơdah arăng amâo đru pô, ƀiădah brei pai mă mmông găl čĭng mă bruă (Klei Bi Hriêng 20:1-4). Phung mda asei brei ba yua ênuk hlăk ai čiăng hriăm hră, hriăm Klei Aê Diê Blŭ, klei dhar kreh. Phung khua thŭn amâodah phung mda asei brei thâo yua mmông găl, klei găl čiăng hâo hưn Klei Mrâo Mrang Jăk. Čiăng mâo lu mngăt mnuih wĭt kơ Aê Diê snăn jih jang drei brei jing phung kriăng rah mjeh Klei Mrâo Mrang Jăk, leh anăn jing phung wiă mbruă kơ Khua Yang Yêsu Krist.
Si drei ba yua mmông găl leh anăn si ai tiê drei mă bruă?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo lui hĕ mmông găl Aê Diê brei ciăng mđĭ kyar Lăn Adiê leh anăn đru mkŏ mjing Sang Aê Diê. Akâo kơ Aê Diê bi hriăm kâo thâo kreh kriăng, jih ai tiê mă bruă čiăng bi guh kơang Anăn Ih leh anăn ba Klei Mrâo Mrang Jăk kơ lu mnuih.
Dlăng Klei Aê Diê Blŭ Hlăm Tlâo Thŭn: Y‑Mathiơ 5:13-6:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
