Tub Nkeeg Yuav Tsis Tau Dabtsi – 30/4/2023

1125

 

 

Pajlug 20:4

4 Tus tswv teb uas nkees laij nws thaj teb rau lub caij laij teb

Yuav tsis muaj qoob nrog luag sau.

Peb kuj nyeem ntxiv hauv Phau Txhais Tshiab : 

“Tus tub nkeeg tsis laij liag rau lub caij laij, mas txog lub caij hlais nws yuav mus nrhiav qoob tiamsis tsis tau dabtsi li”

Lus nug rau sawvdaws xav:

–       Tus neeg tub nkeeg muaj kev xav licas thaum txog caij laij teb?

–       Tus neeg tub nkeeg yuav tau txais dabtsi?

–       Peb twb siv sijhawm tus Tswv muab pub zoo licas thiab siv los ntawm kev xav licas?

Nyob hauv Pajlug 20:4, Vajntxwv Xalumoos qhia pom txog lub keebtiv thiab teebmeem ntawm tus neeg tub nkeeg. Nqe lus lub caij laij muab tim rau lub caij hlais; thiab tsis laij liagmuab tim rau tsis tau dabtsi li. Yuav sau tau qoob loo, tus neeg ua teb yuav tsum tiv kev khwv, yuav tsum laij teb, yuav tsum tseb nplej raws li hauv Yaxayas 28:24 sau tseg hais tias, “Tus neeg uas laij teb tseb nplej, nws niaj hnub mus laij li xwb los? Nws niaj hnub mus laij thiab haiv kom tej av ntxheev xwb los?”

Huabcuab ntawm cheebtsam Palexatees muaj ob lub caij, caij ntuj sov txij hli 5 mus txog hli 10, muaj tshav kub mob, los nag tsawg heev. Caij ntuj no pib nrab hli 10 mus txog hli 4, yog caij los nag. Nyob rau lub caij no, tus neeg ua teb tos tej kob nag ntuj tshiab, thaum pom tias av phom lawm ces yuav tsum laij teb thiab tseb nplej, vim li ntawd lub caij ntuj no yog sijhawm tseemceeb kawg li rau cov neeg ua teb. Yog tseb qoob loo tsis raws caijnyoog, ces yuav ua khwv heev tiamsis sau tsis tau dabtsi. Tiamsis, thaum sawvdaws siv zog laij teb rau caij ntuj no ces tus neeg tub nkeeg tsis mus laij teb, tsis cog qoob loo, tiamsis thaum txog lub caij sau lawv ho xav tau qoob loo sau, tau zaub mov noj. Thaum kawg tus neeg tub nkeeg tsis yog tsuas raug tshaib plab thaum ntawd xwb, tseem tsis muaj noj muaj haus yav tomntej thiab vim lawv tsis muaj noob nplej rau lwm lub caij cog nplej. Tej kev xav ntawm tus neeg tub nkeeg, uas yog tsis xav ua tiamsis xav tau noj yog kev xav ntawm tus neeg ruam (Pajlug 12:11, 28:19), thaum ntawd nws mus thov khawv los tsis muaj neeg pub rau noj.

Nyob hauv sab ntsujplig los zoo ib yam nkaus li ntawd, xav tau sau yuav tsum tau cog. Tus sau Ntawv Nkauj hais tias: “Thov kom cov neeg uas quaj ntsuag thaum lawv cog qoobloo, tau qw zoo siab luag ntxhi sau tej qoob ntawd. Cov neeg uas quaj ntsuag thaum coj tej noob qoob mus cog, lawv yuav hu nkauj seev yees mus sau tej qoob ntawd los tsev” (Ntawv Nkauj 126:5-6). Txhob muaj leejtwg xob sijhawm rau cawv npias, rau kev sib cav sib ceg kom muaj yeej swb, lossis yws, chim thaum tsis muaj neeg pab, tiamsis yuav tsum paub tos “caijnyoog” kom siv zog ua haujlwm (Pajlug 20:1-4). Tus hluas yuav tsum lauj zias sijhawm thaum tseem hluas los kawm xyaum kom paub Vajtswv Txojlus thiab paub ntaub ntawv. Tus laus lossis tus hluas yuav tsum lauj zias sijhawm los tshajtawm tus Tswv Txojmoo Zoo cawmdim. Xav kom sau tau ntau tus ntsujplig rau tus Tswv ces peb sawvdaws yuav tsum ua neeg nquag tseb tawm Txojmoo Zoo, thiab ua Cawmseej Yexus tej tubtxib uas zoo.

 

Thov Vajtswv,

Tus Tswv, thov Koj zam txim rau nyuam yaus vim ntau zaug tso dhau tej sijhawm uas Koj muab pub rau nyuam yaus los txhim kho Koj lub tebchaws thiab txhim kho Koj Pawg Ntseeg. Thov qhia nyuam yaus paub nquag, tas siab ntsws ua haujlwm kom Koj tau koobmeej thiab coj Txojmoo Zoo mus rau coob leej. Amees.

Peb tos caijnyoog licas thiab ua haujlwm los ntawm kev xav licas?

Nyeem Vajluskub hauv peb lub xyoo: Mathais 5:13-6:4

Kênh Youtube BHKTHN:

https://www.youtube.com/c/bhkthn

Bài trướcĐăk Lăk: Trại Họp Mặt Và Bồi Linh Nhân Sự Mục Vụ Thể Thao
Bài tiếp theoKlei Alah Amâo Srăng Mâo Ya Mta Mnơ̆ng Ôh – 30/4/2023