Klei Aê Diê Blŭ: Y-Mathiơ 22:34-40
Êlan kliăng: “Brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’ Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh” (Y-Markôs 12:30-31)
Klei êmuh ksiêm mĭn: Ya klei phung Pharisi êmuh leh Khua Yang Yêsu? Si ngă Khua Yang Yêsu klah čŭn klei bhiăn Klei Bi Mguôp Hđăp? Ya klei hriăm drei mâo kơ drei pô mơ̆ng trăn Klei Aê Diê Blŭ anei?
Leh Khua Yang Yêsu “dưi leh hŏng phung Sadusi” (êlan 34), phung Pharisi bi kƀĭn mbĭt lŏ êmuh Khua Yang čiăng lông dlăng Ñu. Sa čô khua klei bhiăn hlăm phung diñu êmuh Khua Yang snei: “Ơ Nai, hlăm klei bhiăn ya klei mtă jing prŏng hĭn?” (êlan 36). Klei kñăm čiăng tơdah khua klei bhiăn êmuh klei êmuh anei jing čiăng lông dlăng Khua Yang Yêsu, mgô̆ Gơ̆ lŏ wĭt lač si klei Gơ̆ mĭn kơ klei bhiăn. Jih dua phung Pharisi leh anăn Sadusi mpŭ sơăi kơ Y-Môis leh anăn kơ êma pŏk hdruôm hră ñu čih, kyuanăn, tơdah Khua Yang lač klei bhiăn anei amâodah klei anăn jing yuôm hĭn, Ñu srăng tŭ klei phung Yuđa phat kđi leh anăn bi kdơ̆ng.
Khua Yang Yêsu lŏ wĭt lač amâo mâo klei kĭ kơ̆ ôh, klei lŏ wĭt lač bi djŏ kluôm dhuôm hŏng klei bhiăn Y-Môis wăt klei bhiăn phung Yuđa ênuk đưm kna ti klei bhiăn Klei Bi Mguôp Hđăp. Tal sa, “Ih srăng khăp kơ Khua Yang Aê Diê ih hŏng jih ai tiê, hŏng jih mngăt, leh anăn hŏng jih klei mĭn ih” (êlan 37), Aê Diê mtă kơ phung ƀuôn sang Ñu khăp kơ Ñu hŏng jih asei mlei, mngăt leh anăn ai mĭn, brei digơ̆ bi êdah klei sĭt suôr leh anăn klei gưt asăp kơ Ñu hŏng klei kluôm ênŭm kyuadah Ñu jing “Aê Diê prŏng hĭn leh anăn năng huĭ” (Y-Nêhêmi 1:5). Tal dua, “Ih srăng khăp kơ pô riêng gah ih msĕ si kơ ih pô” (êlan 39). Khua Yang mtă kơ phung anak Ñu knư̆ digơ̆ khăp kơ Ñu knư̆ digơ̆ bi khăp lu hĭn êjai mơh hdơ̆ng digơ̆. Ñu čiăng snăk ƀuh phung anak Ñu bi khăp hdơ̆ng digơ̆. Anei jing sa klei dleh snăk kơ phung Pharisi leh anăn Sadusi, kyuadah diñu jing phung čuôt klih, uêñ mă knŏng kơ diñu pô, leh anăn amâo tuôm dưm diñu pô hlăm klei truh kơ pô mkăn ôh kyuanăn dleh snăk kơ diñu khăp. Khua Yang Yêsu lač kơ khua klei bhiăn jih dua mta klei bhiăn Ñu mrâo lač jing yuôm msĕ sơăi, anăn yơh jing atur kơ jih jang klei bhiăn Y-Môis leh anăn klei phung khua pô hưn êlâo čih leh.
Phung đăo kơ Krist hruê anei ăt dôk tlă anăp mơh hŏng dua klei mtă prŏng jing khăp kơ Khua Yang leh anăn khăp kơ mnuih. Tơdah khăp kơ Khua Yang hŏng jih ai tiê, drei amâo srăng tui hlue leh anăn kkuh mpŭ kơ rup yang mkăn ôh, drei srăng hdĭp bi guh kơang kơ Khua Yang nanao, kkuh mpŭ kơ Ñu hŏng klei sĭt suôr leh anăn hŏng jih ai tiê. Leh snăn tơdah drei khăp leh kơ Khua Yang hŏng jih ai tiê, sĭt nik drei srăng khăp mơh kơ mnuih mkăn, amâo srăng lŏ mâo ôh “klei phĭ, klei ăl, klei ngêñ, klei ngă rŭng răng, klei mčeh luar, mbĭt hŏng jih klei ƀai” (Êphêsô 4:31), drei srăng dôk jăk hdơ̆ng drei bŏ hŏng klei thâo pap, bi pap brei hdơ̆ng drei msĕ si Aê Diê pap brei leh kơ drei hlăm Krist (Êphêsô 4:32). Sa phung đăo kơ Krist khăp kơ Aê Diê leh anăn bi khăp hdơ̆ng găp jing sa phung jing hra kơ lăn, klei mngač kơ lăn ala, leh anăn srăng bi mơak kơ Khua Yang.
Si ngă drei khăp kơ Aê Diê leh anăn bi khăp hdơ̆ng drei hŏng klei khăp Aê Diê brei mơ̆?
Wah lač: Ơ Khua Yang, brei klei khăp Ih kiă kriê hlăm ai tiê kâo. Đru kâo hŏng jih ai tiê khăp kơ Ih leh anăn khăp kơ phung ayŏng amai adei riêng gah kâo čiăng kơ klei hdĭp kâo bi mơak kơ Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 37
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
