Klei Aê Diê Blŭ: Klei Bi Hriêng 25:23-24
Êlan kliăng: “Ơ Yêhôwa, kiă kriê ƀăng êgei kâo; răng kơ kƀuê kâo tơdah ñu ha” (Klei Mmuñ Hđăp 141:3)
Klei êmuh ksiêm mĭn: Ya klei jhat klei blŭ êkŭt ba hriê? Si klei bi hmăi kơ gŏ sang mơ̆ng mniê kreh bi mneh msao? Ya klei soh drei khăng ngă mơ̆ng klei blŭ?
Dua êlan Klei Bi Hriêng hruê anei kñăm kơ klei jhat mâo kyua klei blŭ kbiă mơ̆ng ƀăng êgei. Mtao Salômôn bi msĕ klei bi jhat amâo yŏng thâo ôh “mơ̆ng êlah blŭ êkŭt” hŏng angĭn êăt mơ̆ng dưr brei adiê hjan. Phung Yuđa dôk čang guôn angĭn mơ̆ng yŭ kyuadah angĭn mơ̆ng yŭ brei adiê hjan djŏ yan (Y-Luk 12:54). Ƀiădah mdê hŏng angĭn mơ̆ng yŭ, phung ƀuôn sang srăng mâo klei jhat tơdah angĭn mơ̆ng dưr thut. Hjan klŏ êa êat mơ̆ng dưr truh bhiâo riâo rit tơl phung ƀuôn sang amâo hmao prăp êmiêt ôh, jing msĕ si êa hjan ktang bi rai jih mnơ̆ng pla (Klei Bi Hriêng 28:3). Msĕ snăn mơh, klei blŭ êkŭt, čiăng lač jing klei blŭ jhat êkŭt tluôn, klei kčŭt mčeh êkŭt tluôn, ăt srăng ba klei bi hmăi jhat amâo hmao thâo kơ pô mkăn mơh.
Êlan 24 lŏ brei ƀuh thiăm sa mta klei mơh, klei rŭng đĭ hriê kơ prŏng hĭn tơdah mô̆, sa čô mniê hlăm gŏ sang ngă nanao klei bi mneh msao, klei blŭ jhat. Knŏng blŭ dŭm anăn dưi leh mô̆ bi rai klei êđăp ênang, klei jăk jĭn, klei hơ̆k mơak hlăm gŏ sang. Gŏ sang jing anôk mdei êđăp ênang, hơ̆k mơak, ƀiădah kyua klei mô̆ bi tăng snăn ung lač “jăk hĭn dôk ti kiêng čuôr sang,” jing anôk amâo mâo mnơ̆ng mgang mơ̆ng angĭn hjan ôh, ƀiădah jăk snăn mơh ƀiă ƀiă mâo klei rŭng (dlăng thiăm Klei Bi Hriêng 21:19). Sĭt nik knap mñai êdimima tơdah gŏ sang mâo ung, mô̆ amâodah anak amâo thâo kiă kriê ôh ƀăng êgei.
Hruê anei, lu mnuih yua klei êngiê soh kơ klei blŭ snăn diñu mâo klei blŭ amâo guôp, amâo djŏ ôh. Tuôm mâo mơ̆ klei drei blŭ kƀah klei răng ngă klei bi ênguôt kơ ung, kơ mô̆ amâodah kơ anak hlăm gŏ sang drei? Tuôm mâo mơ̆ klei drei blŭ hlăp êgao hnơ̆ng bi hêñ kơ mah jiăng drei? Tuôm mâo mơ̆ klei drei blŭ bi ênguôt kơ pô dôk hmư̆, atăt truh kơ klei bi kah mbha, amâodah bi luč klei čang hmăng kơ pô mkăn? Răng kriê bĕ ƀăng êgei, răng bĕ kơ klei blŭ! Khua ƀĭng kna Y-Pôl mtă: “Brei diih blŭ hŏng klei jăk nanao, bi ƀăt hŏng hra, čiăng kơ diih dưi thâo si klei djŏ lŏ wĭt lač kơ grăp čô” (Kôlôs 4:6). Akâo klei pap Khua Yang đru drei thâo răng hlăm klei blŭ msĕ si Mtao Đawit lač leh kơ Khua Yang snei: “Ơ Yêhôwa, kiă kriê ƀăng êgei kâo; răng kơ kƀuê kâo tơdah ñu ha” (Klei Mmuñ Hđăp 141:3). Čang hmăng grăp čô drei ƀrư̆ ƀrư̆ bi mlih hĕ klei drei blŭ mơ̆ng klei kpă, doh jăk truh kơ klei blŭ êdu êun, djŏ mmông, djŏ mnuih čiăng mâo klei mơak hlăm gŏ sang, đru bi mđĭ Phung Sang Aê Diê, leh anăn bi guh kơang kơ Anăn Khua Yang ti krah phung ƀuôn sang.
Si drei akâo kơ Khua Yang bi mlih hĕ klei drei blŭ čiăng ba klei tŭ dưn kơ pô dôk hmư̆?
Wah lač: Ơ Khua Yang, bi mni kơ Ih pap brei leh anăn bi mtlaih kâo. Akâo Yang Mngăt Jăk kiă kriê ƀăng êgei kâo čiăng jih jang klei kâo blŭ bi êdah klei khăp, klei doh jăk Ih, čiăng ba klei mơak leh anăn klei tŭ dưn kơ pô hmư̆. Kâo wah lač hlăm Anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
