Tơdrong Pơđơ̆k 25:23-24
“Ơ Kră Yang, apinh wei ‘bơ̆r inh. Păng lăng ‘bơ̆r inh mưh inh ha.” (Hơriso 141:3)
Nơ̆r jet tơchĕng pơwao:
– Nơ̆r pơma kơnê̆ ôn hlơp đei pŭ iŏk tơdrong kiơ?
– Bơngai drŏ-kăn ngăl pơjah pơjăng pơm ăn kơ hnam dơnŏ thoi yơ?
– Lu bơ̆n ngăl pơ̆k kơ tơih lu tơdrong glăi kiơ lăm nơ̆r pơma?
‘Bar trong lăm hla bơar Tơdrong Pơđơ̆k năr ‘nâu pơma gah tơdrong răm lĕch đơ̆ng nơ̆r pơma, Pơtao Salômôn pơtih tơdrong răm ‘băm ưh kơ tam kơ băt “Hơpiĕt ayơ roi sa pơma krŭl” hăm kial thu đơ̆ng gah yă nơ̆m ‘bônh kơ truh, Kon pơlei bơngai Juđê chang gô noh kial đơ̆ng gah bơmơ̆t, yua kơ kial đơ̆ng gah bơmơ̆t ba ăn đak ‘mi ‘lơ̆ng, kial rơngơp (Luka 12:54). Mă-lei tơplơ̆ dơ̆ng, kon pơlei ngăl tơ’bơ̆p tơdrong răm kơplah kial đơ̆ng yă nơ̆m thu, đei ‘mi prĕl jur ưh kơ tam kơbăt đơ̆ng yă nơ̆m pơm ăn kơ kon pơlei wă hơmet ưh kơ tam, pha ra kiơ kơ ‘mi kial pơhoch đĭ ‘ba hơ’bo (Tơdrong Pơđơ̆k 28:3) kư̆m lei lăI thoi noh, lu nơ̆r pơma kơnê̆ ôn hlơp, wă khan pơma roi ‘bơm , pơma ưh kơ ‘lơ̆ng, kư̆m đei hloi tơdrong ưh kơ ‘lơ̆ng kơ bơngai nai.
Trong 24 tơ’bôh thim minh tơdrong, tơdrong rŭng răng rai lơ kơplah lăm bơngai akăn, oei hơdai hăm bơngai drŏ-kăn hrăn tơhil jŏk, pơma kơnê̆, mă minh ‘bar nơ̆r pơma thoi noh đơ̆ng minh ‘nu akăn kư̆m pơm pơrăm tơdrong hiôk hơđơ̆ng, chơt hiôk lăm hnam dơnŏ, hnam dơnŏ noh anih pơdơh, hiôk hian, mă-lei yua kơ đơ̆ng nơ̆r minh ‘nu akăn pơjah pơjăng na mă klo kư̆m jing “Kơtrơ̆m oei ‘bơ̆t chaih jih bơbŭng hnam” noh bơih anih ưh kơ đei pĕng drang wă huei ‘bơm ‘mi kial, mă-lei jing ‘lơ̆ng hloh dă ‘biơ̆ kơ sơ’ngon (lăng thim Tơdrong Pơđơ̆k 21:19). Noh trŏ kơ tơdrong truh tơ lăm hnam dơnŏ kơplah đei bơngai, mă khan klo dah akăn păng kon hơ’lơ̆p ưh kơ bơwei ‘bơ̆r nơ̆r pơma.
Chăl dang ei, lơ bơngai yua tơdrong rơngei pơma pơđah glăi, thoi noh jing đei nơ̆r pơma ưh kơ trŏ tơdrong, lu bơ̆n hăm đei ưh pơma pă pơyom pơm pơjĭ jơhngơ̆m klo, akăn dah kon hơ’lơ̆p lăm hnam dơnŏ jing ưh kơ hiôk? Lu bơ̆n hăm đei ưh yua nơ̆r pơma hơnul hloh kơ ai hnang pơm ăn bôl buăl jing đei mơlâu? Lu bơ̆n hăm đei ưh yua nơ̆r pơma pơm kơ bơngai mơ̆ng mơlâu dah ba ăn jing tơklah, dah pơm ăn tơdrong arih jing hiong tơdrong hơmĕng? athei bơwei ‘bơ̆r nơ̆r pơma, pơ’lơ̆ng lăm nơ̆r pơma! Pôl bơtho “ Bơ̆n athei pơma pơhiôk lu sư ling lang, wă kơ bơ̆n gơh drơ̆ng lu sư mă trŏ ” (Kôlôse 4:6). Apinh Kră Yang ăn kơ lu bơ̆n gơnang kơ Kră Yang wă kơ pơ’lơ̆ng lăm nơ̆r pơma bơ̆n kơdih thoi pơtao Đawĭt pơma dơnuh hăm Kră Yang “Ơ Kră Yang, apĭnh wei ‘bơ̆r inh, păng lăng ‘bơ̆r inh mưh inh ha” (Hơriso 141:3). hơpơi kơ lu bơ̆n tơplih rai ‘net lăm nơ̆r ‘bơ̆r bơ̆n kơdih pơma tơpăt, băt yua nơ̆r ‘lơ̆ng rơgoh kư̆m truh tơ gơh pơma rơngơp, iŏk đon ala, trŏ tơdrong, trŏ kơ bơngai wă ba ăn chơt hiôk lăm hnam dơnŏ, tơgŭm tơiung lăm Khul Bơngai Lui, wă pơ-ư pơ-ang anăn Kră Yang lăm kon pơlei.
Kơkuh kơ Ih ơ Kră Yang, inh bơnê kơ Ih mơnat ăn păng dŏng pơklaih inh, apĭnh Yang Bơhngol ‘Lơ̆ng Ih wei ‘bơ̆r nơ̆r pơma wă kơ pơma pơdah tơ’bôh tơdrong ‘mêm mơnat, tơdrong ‘lơ̆ng rơgoh Kră Yang ba ăn chơt hiôk păng đei pơyua ăn kơ bơngai mơ̆ng. krao khan yua anăn Kră Yang Yêsu Krist. Amen.
Lu bơ̆n krao khan apĭnh Kră Yang tơgŭm tơplih thoi yơ wă kơ nơ̆r bơ̆n kơdih pơma pơyua bơngai mơ̆ng?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Jang 2
Kênh Youtube BHKTHN:
