Pajlug 25:23-24
Nqe cim:
“Tus Tswv, thov koj tswj kuv lub qhoyncauj thiab kuv ob daim dincauj!” (Phau Ntawv Nkauj 141:3)
Lus nug rau sawvdaws xav:
– Lo lus taug xaiv ua rau tau nqi zog dabtsi?
– Tus pojniam uas yws taus ua hiam rau lub tsevneeg zoo li cas?
– Peb pheej ua txhaum yam twg los ntawm tej lus hais?
Ob nqe Pajlug hnub no hais txog qhov uas txaus ntshai ntawm tej lus hais tawm hauv qhovncauj los. Vajntxwv Xalumoos muab qhov uas tus nplaig “taug xaiv” piv rau kob cua tuaj sab qaumteb tuaj. Cov neeg Yudais tos ntsoov cov cua sab hnub poob tuaj, vim cov cua tuaj sab hnub poob tuaj yog cov cua coj nag los (Lukas 12:54). Tiamsis cov pejxeem pheej ntsib kev txomnyem thaum cua tuaj sab qaumteb tuaj. Kob nag los sab qaumteb tuaj ua rau cov neeg ua noj haus npaj tsis yeej, zoo ib yam li kob nag xob nag cua ntsawj qooloo puas tas (Pajlug 28:3). Kuj ib yam nkaus, cov lus taug xaiv, uas yog lus zais lossis hais phem rau neeg, lus nkaug tsis ncaj kuj tsis zoo rau lwm tus thiab.
Nqe 24 qhia paub ntxiv ib yam, kev cov nyom tseem muaj ntxiv thaum tus niamtsev, uas yog tus pojniam nyob hauv tsevneeg pheej yws taus, taug xaiv. Qee lo lus hais ntawm tus pojniam kuj muaj peevxwm rhuav tshem txojkev kaj siab, zoo siab, sib hlub hauv tsevneeg. Kev sov siab hauv tsevneeg yog qhov chaw kaj siab, zoo siab, tiamsis vim tej lus yws taus ntawm tus pojniam ua rau tus txiv yeem mus “nyob saum rutsev”, qhov chaw uas tsis muaj dabtsi thaiv cua, nag, ua li ntawd los tseem tsis ntxhov siab cuag (saib ntxiv Pajlug 21:19). Yog ib qhov kev puas tsuaj raug rau tsevneeg thaum muaj ib tug neeg, txawm yog tus txiv, pojniam lossis menyuam tsis tswj ceev lub qhovncauj nyob hauv tsevneeg.
Nimno, muaj ntau leej siv txojkev ywjpheej hais lus los hais tej lus tsis yog, tsis tsimnyog. Puas muaj ib zaug twg tej lus uas peb hais ua rau tus txiv, pojniam, menyuam hauv tsevneeg tu siab lawm tau? Puas muaj ib zaug twg tej lus hais tso dag ntawm peb coj txojkev txajmuag, poob ntsejmuag mus rau cov phoojywg? Puas muaj tej zaug cov lus peb hais ua rau tus mloog hnov txajmuag, lossis faib cais pab pawg, lossis ua rau lwm tus qaug zog ua neej? Cia li tswj ceev qhovncauj, ua tib zoo hais lus! Timthawj Paulus qhia tias: “Tej lus uas nej hais, nej yuav tsum ua tib zoo hais kom sawvdaws xav mloog” (Kaulauxais 4:6). Thov Vajtswv pab kom peb vamkhom Nws hais tau tej lus ib yam li Vajntxwv Daviv hais rau tus Tswv: “Tus Tswv, thov koj tswj kuv lub qhoyncauj thiab kuv ob daim dincauj!” (Phau Ntawv Nkauj 141:3). Xav kom peb hloov pauv los ntawm tej lus hais ncaj ncees, dawbhuv, mos muag, txo hwjchim, yog chaw, phim rau neeg kom ua rau tsevneeg muaj kev zoo siab, txhim tsa Pawg Ntseeg, thiab ua rau Vajtswv tau ntsejmuag.
Thov Vajtswv,
Vajtswv, ua tsaug qhov Koj hlub thiab cawm nyuam yaus. Thov Vaj Ntsujplig pab kom nyuam yaus tswj tau lub qhovncauj hais tej lus qhia tawm kev hlub, dawbhuv, coj kev zoo siab thiab muaj nqis rau cov mloog. Nyuam yaus tuav Tswv Yexus lub npe thov, Amees.
Peb thov Vajtswv pab kom hloov tau qhovtwg ntawm tej lus peb hais muaj nqis rau cov mloog?
Nyeem Vajluskub hauv peb lub xyoo: Tes Haujlwm 2
Kênh Youtube BHKTHN:
