I Pêtrô 2:4-6
“Bơ̆n athei oei jê̆ Sư ling lang, yua kơ tơdrong arih lu bơ̆n đơ̆ng Sư ăn. Sư thoi lĕ kơ tơmo đe man hnam tŭk boih; lu kon bơngai ưh kơ gĭt kơ Sư, mă ‘Bok Kei-Dei…” (I Pêtrôs 2:4)
Nơ̆r jet tơchĕng pơwao:
– Pêtrôs yua rup “tơmo arih” wă bơtho tơdrong kiơ?
– Pơm thoi yơ wă kơ Khul Bơngai Lui pôm jơhngơ̆m đon kiơ̆ thoi Kră Yang wă?
– Lu bơ̆n kăl kơ pơm tơdrong kiơ wă tơiung jing minh jơhngơ̆m lăm Khul Bơngai Lui?
Khul Bơngai Lui ‘noh bơih mă đe pơgơ̆p băl tơduă lu bơngai lui kơ Kră Yang Yêsu Krist, jing minh khul ‘măn lê̆ pha đơ̆ng ala teh, pôm jơhngơ̆m wă kơkuh păng bơ̆jang kơ Pêng Anăn Yang ‘Bok Kei-Dei. ‘Bok Pêtrôs yua rup “tơmo arih” noh Kră Yang Yêsu, na kon pơlei Kră Yang rim ‘nu ‘noh thoi lu tơpei tơmo arih, Kră Yang wă pơjing hnam Sư. Na Sư khan yua kơ iĕm ‘bôh bơih Kră Yang Yêsu Krist Sư ‘mêm mơnat kơ bơ̆n tơpă (I Pêtrôs 2:3). Nơ̆r “oei jê̆ Sư” pơma kơ tơdrong tơ’bưh juăt băl. “Oei jê̆ Sư ling lang” wă khan oei hơdai lăm Kră Yang Yêsu, tơklep hăm Sư thoi tơ’bla păng tơm hơmu.
Thoi noh, Khul Bơngai Lui đei tơdrong tơchĕng phara băl, tơdrong ‘maih wă kŭm phara băl mălei đei pơgơ̆p băl jing minh, lui gơnang kơ Kră Yang Yêsu Krist, băl kơnăl kơ Kră Yang noh “tơmo arih”. Sư thoi lĕ kơ tơmo đe man tŭk lê̆, lu kon bơngai ưh kơ gĭt kơ Sư, mă ‘Bok Kei-Dei gĭt kơ Sư na iŏk Sư.” (trong 4). Kơlih kơ thoi noh, Bơngai Lui noh thoi tơpei tơmo “’Bok Kei-Dei yua wă pơjing hnam Sư” wă khan hnam gah bơhngol Kră Yang Yêsu bơih hơnă, rim bơngai lui thoi lu tơpei tơmo wă pơjing tơiung đon lui dih băl, pôm jơhngơ̆m đon lăm hnam Kră Yang.
Lơ bơngai hlôh hơwơ̆l kơ tơdrong pôm jơhngơ̆m khan ăp mă minh jơhngơ̆m đon tơchĕng lei lăi băl, dah ưh khan “ưh kơ minh jơhngơ̆m đon” kơlih kơ thoi noh na đei tơdrong truh khan ưh kơ pôm jơhngơ̆m kiơ̆ thoi Kră Yang wă. Nơ̆r Kră Yang bơtho minh jơhngơ̆m lăm Khul Bơngai Lui noh minh jơhngơ̆m đon lăm Kră Yang. Ưh kơ trŏ tơduă lu bơ̆n, thoi lĕ rup tơmo arih wă yua pơjing hnam. Wă kơ Khul Bơngai Lui pôm jơhngơ̆m đon trŏ, rim ‘nu kơ bơ̆n athei thoi “tơpei tơmo arih” đei Yang Bơhngol ‘Lơ̆ng pơgơ̆r lăm jơhngơ̆m. Athei pơ’lơ̆ng yua kơ nơ̆r Kră Yang đei tơbăt tơ ala teh âu đei triu păng bơbe, đei ‘nhĕt jơla păng tơnơm ‘ba, ‘bok bơtho tơpă păng ‘bok bơtho ưh kơ tơpă. Lu bơ̆n ưh kơ gơh pơgơ̆p hơdai hăm lu bơngai năm akŭm mă ưh kơ trŏ thoi “tơmo arih”. Lu bơgai lui tơpă, mă đei tơdrong jang kiơ, athei iŏk đon ala hơdai băl “pơjing hnam ‘Bok Kei-Dei” ưh kơ trŏ khan wă pơjing kiơ̆ kơ kon bơngai bơ̆n. Rim ‘nu bơngai lui kơ Kră Yang tơpă noh. “Kư̆m thoi lu bơngai soi kơ ‘Bok Kei-Dei sơ̆, lu sư pơyơ̆r kơ ‘Bok Kei-Dei tơmam.” Hăm minh tơdrong arih ‘lơ̆ng rơgoh, ‘mêm mơnat băl đơ̆ng nơ̆r pơma truh kơ tơdrong pơm tơ’bôh ‘bơ̆t anăp Kră Yang păng ‘bơ̆t anăp ‘nhŏng oh bơngai lui. Dôm tơdrong bơ̆n bơ̆jang, tơdrong akŭm kơkuh athei “gơnang kơ Yêsu Krist bơ̆n kư̆m pơyơ̆r kơ ‘Bok Kei-Dei tơdrong mă Sư lăp đon mơ̆n.” (trong 5). Krao apinh Kră Yang mơ̆t pơgơ̆r pơm ‘Bok Dŏng pơklaih lăm chăl arih bơ̆n, đơ̆ng nơ̆r pơma truh tơ tơdrong pơgơ̆r, pơm tơ’bôh athei đei plei Yang Bơhngol ‘Lơ̆ng, wă pơyơ̆r kơ Kră Yang tơmam arih pơm kiơ̆ kơ Sư đĕch ‘noh na Sư lăp đon.
Ơ Kră Yang, inh apinh Ih mơ̆t pơgơ̆r lăm chăl arih inh. Apinh Ih tơgŭm inh tơ’bôh tơdrong arih ‘lơ̆ng rơgoh, pôm jơhngơ̆m hăm ‘nhŏng oh bơngai lui wă tơrô̆ tơiung pơjing hnam Ih, pơư pơang anăn Ih tơ ala teh âu. Krao khan yua anăn Kră Yang Yêsu Krist, Amen.
Lu bơ̆n hăm trŏ thoi lĕ tơpei tơmo arih mă ‘Bok Kei-Dei yua wă pơjing hnam Sư ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 6
Kênh Youtube BHKTHN:
