Blŭng a 13:14-18
“Iung bĕ, chă nơnăm jơ̆p kơ lăm dêh char, wơ̆l, tor; yua kơ Inh wă ăn kơ ih dêh char âu. Na Abram yuih bơsŭn sư năm oei ala tơm ‘long kôih tơ Mamrê, gah Hêbrôn păng sư kư̆m đei pơm tơ noh minh pôm chơnang soi kơ Kră Yang.” (Blŭng a 13:17-18)
Nơ̆r jet tơchĕng pơwao:
– Đơ̆ng rŏng kơ ‘bok Abraham tơklah đơ̆ng Lot, ‘Bok Kei-Dei pơkă hăm Abraham tơdrong kiơ?
– Abraham tơwih thoi yơ?
– Bơ̆n gơh tơ’bôh jơhngơ̆m lui kơjăp kơ Kră Yang liơ?
Đơ̆ng rŏng kơ đơ̆ng dêh Êyiptơ wih brŏk dơ̆ng tơ dêh Kanaan noh, ‘bok Abraham tơklah hĭ đơ̆ng mon sư Lot noh. Lot rơih iŏk teh mơ̆r tơ tơring gah hơlĕch kơ teh dơnă đak krong Jôrđăn jing anih sư arih sa, na ‘bok Abraham oei oei ‘bơt dei ‘mơ̆i. ‘Bok Abraham hlôi năm kiơ̆ Kră Yang chông anhăk, năm tơ anih mă Kră Yang tơhlâu tơ’bôh. Mă khan lei ră, hlôi hlôi kơ lơ sơnăm, sư oei tam mă mơn ‘bôh, tam mă mơn đei đêl Kră Yang pơkă noh. Dêh mă Kră Yang pơkă wă ăn kơ sư noh oei tam mă đei kơ sư thoi nơ̆r Kră Yang pơkă yua kơ tơ dêh noh đei bơngai oei bơih, tơ anih noh đei tơdrong pơngot rơwĕt truh. Păng tơ anih noh jơ ‘nei Abraham tŏk-bŏk oei lăm tơdrong tơklah noh, sư mơn‘bôh tơdrong sư hăm mon sư tơklah băl noh đei anat thoi yơ hloi bơih. Kơplah jơhngơ̆m Abraham tơ’bơ̆p tơdrong anat noh, Kră Yang năm tơ sư, roi pơsĭt ming dơ̆ng đêl nơ̆r sư pơkă bơih hăm Abraham ki sơ̆. Kră Yang khan: “Yua kơ đĭ dêh ayơ mă ih ‘bôh, Inh gô ăn kơ ih păng adrĕch adrung ih ling lang hloi.” (trong 15).
Kră Yang pơkă wă ăn sư teh, ưh kơ minh tơring đĕch ôh, mă-lei đĭ dêh ei hloi, đơ̆ng gah hơlĕch truh tơ gah bơmơ̆t, truh tơ yă nơ̆m păng truh tơ gah gơal mă măt Abraham tơmang ‘bôh noh. Kră Yang pơkă khan Abraham gô đei “adrĕch adrung”, nơ̆r ‘nâu hei đei roi tơ lăm âu hơlơ̆k hơle truh tơ pêng ‘măng. Roi wă mă rơđah hơđăl ‘nâu đei tơ’bôh ăn kơ bơ̆n kơplah ‘bơ̆t dei sơ̆ akâu jăn Abraham sơnăm arih sư đĭ kră bơih, akăn sư oei hơwŏng hloi đĕch, ưh kơ đei hơ’lơ̆p, na Lot mon sư kơdih noh ‘nao tơklah đơ̆ng sư. Kră Yang kư̆m athei sư: “Iung bĕ, chă nơnăm jơ̆p kơ lăm dêh char, wơ̆l, tor; yua kơ Inh wă ăn kơ ih dêh char âu.” (trong 7) wă kơ mơn kơnăl tơpă hloi dêh teh mă Kră Yang ăn thoi yơ noh.
Đơ̆ng rŏng kơ nơ̆r Kră Yang pơma khan noh, ‘bok Abraham: “Na Abram yuih bơsŭn sư năm oei ala tơm ‘long kôih tơ Mamrê, gah Hêbrôn păng sư kư̆m đei pơm tơ noh minh pôm chơnang soi kơ Kră Yang.” (trong 18).
Abraham hlôi năm bơih thoi nơ̆r Kră Yang bơtho khan, tơ’bôh pơsĭt sư lui kơjăp kơ nơ̆r Kră Yang pơkă mă khan sư tam lah hlôh băt tôm tơdrong gô đei kơ sư thoi yơ yơ. Abraham pơdơ̆ng chơnang soi wă tơ’bôh jơhhngơ̆m sư kơkuh păng gơnang kơ Kră Yang.
Dang ei, trong năm kiơ̆ Kră Yang, rim ‘nu kơ bơ̆n phŏ kơnh đei tơ’bơ̆p tơdrong anat anot thoi ‘bok Abraham noh, bơ̆n năm kiơ̆ kơ nơ̆r Kră Yang pơkă mă-lei oei tam mă mơn đei tơdrong mă đêl Kră Yang pơkă wă ăn kơ bơ̆n noh. Mă khan thoi ei ră, bơ̆n băt sĭt tơpă Kră Yang Sư Tơ’ngla pơkă sĭt, ưh kơ jor ôh, tơdrong kiơ mă đêl Sư pơkă wă ăn kơ bơ̆n noh, ‘blep kơ jơ năr Sư ăn noh ‘lơ̆ng ngơ ngei kơ bơ̆n. Lei na bơ̆n kư̆ kơ lui gơnang kơ Sư păng pơtrơp pơtrơp arih kiơ̆ kơ nơ̆r Kră Yang krao, bơ̆n jang, pơm dôm tơdrong mă Kră Yang wă kơ bơ̆n jang,pơm. Tơ anih bơ̆n arih păng tơ anih bơ̆n jang, bơ̆n athei kơkuh ư-ang kơ Kră Yang hăm đĭ jơhngơ̆m tơdrong arih bơ̆n. Đơ̆ng bơ̆n kơkuh kơ Kră Yang, kơkuh trŏ, kơkuh đĭ jơhngơ̆m noh dang tơmam ‘bâu phu, ‘bâu phu noh păr ataih jơ̆p jang anih mă đêl tơpang jơ̆ng bơ̆n juă bơih.
Ơ Kră Yang, inh bơnê kơ Ih yua kơ Ih ling-lang oei hơdai inh păng hơlơ̆k pơsĭt ming dơ̆ng dôm tơdrong đêl Ih pơkă wă ăn kơ inh kơplah jơhngơ̆m inh rơdu tơrăn, rŭng răng. Mă khan dang ei tơ’bơ̆p tơdrong kiơ, thoi yơ, inh khŏm kơkuh ư-ang kơ Ih đĭ jơhngơ̆m bơhngol inh. Inh krao khan yua anăn Kră Yang Yêsu Krist, Amen!
Tơdrong kiơ tơ’bôh bơ̆n ling-lang lui kơjăp kơ Nơ̆r Kră Yang pơkă?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 126-128
Kênh Youtube BHKTHN:
