Mathais 26:14-16
Nqe cim zaj kawm:
“Txij hnub ntawd los Yudas txawm nrhiav sijhawm muab Yexus rau lawv” (Mathais 26:16)
Lus nug xav:
– Timthawj Mathais qhia txog tej yam dabtsi uas ua rau Yudas Ixakali-us ntxeev siab rau tus Tswv?
– Niaj hnub nimno, peb “muag tus Tswv” li cas?
Timthawj Mathais qhia meej txog tus uas ntxeev siab rau tus Tswv, yog Yudas Ixakali-us, uas yog ib tug hauv kaum ob tug Timthawj (nqe 14). Mathais piav qhia tej yam uas ua rau Yudas ntxeev siab rau Tswv Yexus. Qhov xubthawj, txawm nws yog ib tug thwjtim, los nws saib tsis taus qhov koob hmoov loj uas tus Tswv pub rau nws. Tus Tswv tau xaiv nws, pub nws raws tus Tswv qab, hnov tus Tswv tej lus qhuab qhia thiab nrog tus Tswv nyob tas lub sijhawm uas tus Tswv ua haujlwm. Tiamsis hais txog Yudas, tej xyoo uas nws nrog tus Tswv nyob zoo li nkim zog xwb, vim nws mus raws ib tug neeg uas tsis pub txiajntsig sab nqaij tawv rau nws. Qhov ob, Yudas yog ib tug neeg ntshaw nyiaj ntshaw koob meej. Timthawj Mathais yog tus uas piav meej txog cov nyiaj uas Yudas tau txais thaum muag Tswv Yexus. Peb caug lub nyiaj tsis yog ib cov nyiaj ntau, rau qhov ntawd tsuas yog tus nqi them rau ib tug qhev xwb (Khiav Dim 21:32). Tu siab kawg li uas Yudas kam muag tus Vajntxwv saum ntuj kom tau nyiaj! Timthawj Mathais qhia peb pom Yudas lub siab ntshaw nyiaj thaum nws yog tus xub mus nrhiav cov thawj ntawm cov povthawj thiab hais tias: “Yog kuv muab Yexus rau nej, nej yuav muab dabtsi rau kuv?” Thaum lawv pom zoo them peb caug lub nyiaj rau nws lawm, Vajluskub hais tias: “Txij hnub ntawd los Yudas txawm nrhiav sijhawm muab Yexus rau lawv” (nqe 16). Qhov no qhia tias Yudas yog tus pib nrhiav lub zoo sijhawm kom muag tus Tswv thiaj tau nyiaj, thiab thaum kawg nws muag tus Tswv tau peb caug lub nyiaj xwb!
Niaj hnub nimno, peb tsis muag tus Tswv ib yam li Yudas, tiamsis kev ntxeev siab rau tus Tswv tseem muaj peevxwm tshwm sim hauv peb lub neej. Tu siab heev yog hnub no peb tseem ris lub npe hu ua cov ntseeg Yexus, tiamsis tsuas raws tus Tswv zoo li raws ib txojkev ntseeg xwb. Peb tsis paub tias qhov uas peb tau paub tus Tswv thiab tau nyob hauv Nws lub Tuamtsev yog ib txoj koob hmoov loj npaum li cas. Timthawj Paulus qhuab ntuas hais tias: “Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb” (Efexus 2:8). Vim li ntawd, yog peb saib koob meej, nyiaj txiag thiab hwjchim hauv ntiajteb muaj nqis dua tus Tswv, ces peb twb npaj siab muag tus Tswv kom tau txiajntsig rau peb tus kheej lawm. Tej zaum peb tseem mus pehawm Vajtswv, thov Vajtswv, fij nyiaj, txawm tuav haujlwm hauv Pawg Ntseeg los xij, tiamsis yog peb ua neej dag, hais tias hlub tus Tswv los tseem ntxeev siab rau Nws, hais tias hlub kwvtij nkauj muam los tseem ua phem rau lawv, lossis kam nrog kev txhaum sib haum kom tau txiajntsig, ces peb kuj tabtom muag tus Tswv ib yam li Yudas Ixakali-us thiab. Thov tus Tswv pab peb niaj hnub pom tias Nws txojkev hlub loj kawg nkaus, kom peb ua neej ua tus Tswv tsaug thiab tuav rawv txojkev ncaj ncees rau tus Tswv mus txog hnub kawg.
Thov Vajtswv,
Tswv Yexus uas hlub tshua, ua Koj tsaug uas Koj tau cawm nyuam yaus dim. Thov Koj pab kom nyuam yaus nco ntsoov Koj txojkev hlub, ua siab ncaj raws Koj mus txog hnub kawg, thiab tsis txhob cia nyuam yaus hais lus lossis ua ib yam dabtsi uas yog kev tsis lees paub Koj lossis muag Koj. Nyuam yaus tuav Tswv Yexus Khetos lub npe thov, Amees.
Peb qhia tshwm peb txojkev ua siab ncaj rau tus Tswv li cas?
Nyeem Vajluskub hauv peb lub xyoos: II Kauleethaus 2
Kênh Youtube BHKTHN:
