Pajlug 27:22
Nqe cim zaj kawm:
“Txawm yog koj yuav muab tus neeg ruam ntaus tshuav tuag los nws tseem ruam nws li qub.” (Pajlug 27:22)
Nyeem ntxiv Phau Txhais Tshiab HMOWSV:
“Txawm yog muab tus neeg ruam tuav xyaw qoob rau hauv qhov cos los nws txojkev ruam tsis tawm mus.”
Lus nug xav:
– Vajntxwv Xalumoos siv daim duab dabtsi los piav txog tus neeg ruam lub siab tawv?
– Yam dabtsi ua rau tibneeg tsis pom lawv tej kev txhaum thiab tsis kam txais yuav kev qhuab ntuas?
– Peb yuav ua li cas thiaj tau hloov dua tshiab?
– Peb yuav coj zaj kawm no los siv hauv peb lub neej li cas?
Nqe Pajlug no siv ib daim duab uas pom tseeb heev los piav txog tibneeg lub siab tawv: Daim duab ntsiav txhuv raug muab rauj tuav rau hauv lub qhov cos qhia txog kev raug nias hnyav heev thiab kev qhuab qhia uas nruj heev. Tiamsis, txawm raug ntaus hnyav npaum li ntawd los, tus neeg ruam tseem tsis tso nws txojkev ruam tseg. Hauv phau Pajlug, “tus neeg ruam” tsis yog hais txog tus uas tsis muaj kev kawm xwb, tiamsis yog tus uas tsis kam txais kev txawj ntse, saib tsis taus Vajtswv txojkev qhuab qhia, thiab tawv ncauj tsuas taug nws tus kheej txojkev. Nqe Vajluskub no ceebtoom hais tias thaum tibneeg pheej tsis kam txais qhov tseeb, txojkev ruam yuav nkag tob zuj zus hauv lawv lub siab, tsis yoojyim tshem tawm mus li.
Lo lus hais tias “nws txojkev ruam tsis tawm mus” qhia hais tias txawm plhaub nplej yuav cais tawm ntawm cov noob lawm, los tus neeg ruam tseem tsis tso nws tej kev txhaum tseg thiab tseem tsis kam txais kev qhuab ntuas. Nyob hauv lub neej, Vajtswv siv Nws Txojlus, cov thawjcoj sab ntsujplig, tsevneeg, phoojywg, thiab tej lub tsamthawj txomnyem los coj kev thiab qhuab ntuas peb. Kev qhuab ntuas yog lub sijhawm uas pab kom peb loj hlob thiab hloov dua tshiab. Tiamsis yog ib tug neeg tsis kam mloog thiab pheej ua siab tawv, ces txawm raug qhuab ntuas ntau zaus los yeej tsis hloov li. Kev khavtheeb ua rau tibneeg tsis pom lawv tej kev txhaum thiab dhau los ua neeg uas tsis kam txais kev qhuab ntuas.
Bruce Waltke tau sau tseg hais tias: “Vajtswv txoj koob hmoov hlub uas yug tus neeg ruam dua tshiab nkaus xwb thiaj yog txojkev cia siab uas yuav hloov tau nws los ua ib tug neeg muaj nqis.” Kev hloov tiag yuav tsum pib ntawm lub siab tuaj. Kev raug nias sab nraud lossis kev qhuab ntuas nruj tsiv xwb tsis muaj peevxwm ua kom muaj kev txawj ntse tiag. Vajtswv tib leeg xwb thiaj hloov tau tibneeg lub siab. Thaum peb txo hwjchim tabmeeg Vajtswv xubntiag thiab ua raws Nws Txojlus, Nws yuav hloov peb lub siab thiab kho peb tus yamntxwv. Yog li ntawd, tus neeg txawj ntse yog tus uas muaj lub siab mos muag, npaj txhij mloog thiab txais kev qhuab ntuas. Tsis txhob tawmtsam Vajtswv txojkev taw qhia, tiamsis cia Vajtswv hloov peb lub neej dua tshiab.
Thov kom Vaj Ntsujplig niaj hnub ceebtoom peb rov tshuaj xyuas peb lub siab. Tsis txhob tsuas saib pom lwm tus txojkev ruam xwb, tiamsis cia li nug peb tus kheej saib peb puas kam txais Vajtswv txojkev qhuab ntuas lossis tsis kam. Lub siab txo hwjchim thiab yoojyim txais yuav kev qhuab ntuas yuav pab kom Vajtswv txojkev txawj ntse cog ruaj hauv peb lub neej, ua rau peb loj hlob thiab vam meej sab ntsujplig.
Thov Vajtswv,
Tus Tswv, thov Koj pab kom nyuam yaus lub siab mos muag thiab mloog Koj lus, kom nyuam yaus paub txais tej kev qhuab ntuas dhau ntawm txhua yam xwm txheej hauv lub neej. Thov pub rau nyuam yaus muaj lub siab npaj txhij txais kev qhuab ntuas thiab lub tswvyim uas niaj hnub nrhiav Koj txojkev txawj ntse. Nyuam yaus tuav Tswv Yexus Khetos lub npe thov, Amees.
Peb yuav ua li cas kom muaj lub siab mos muag thiab tso tej kev txhaum tseg?
Nyeem Vajluskub hauv peb lub xyoos: II Kauleethaus 3
Kênh Youtube BHKTHN:
