II-Kevcai 12:5-14
Nqe cim:
“Thaum txog lub sijhawm ntawd, nej yuav tsis tau ua ywj siab ib yam li nej tau ua yav tas los. Txhij puag thaum ub los txog niaj hnub no, nej tsuas pehawm raws li nej lub siab nyiam xwb” (II-Kevcai 12:8).
Lus nug rau sawvdaws xav:
- Cov Yixalayees yuav tsum tuaj txoos ua ke pehawm Vajtswv rau qhov chaw twg?
- Tus Tswv haivneeg tau cai fij khoom rau Vajtswv qhov chaw twg xwb?
- Qhov ntawd xav qhia txog dab tsi?
- Peb kawm tau yam dabtsi thaum pehawm tus Tswv?
Ib tsoom cov mloog txhua tus,
Tom qab uas txwv cov neeg Yixalayees tsis txhob mus xyaum cov neeg Kana-as tej kev teev hawm tej mlom, Mauxes qhia qhov chaw pehawm Vajtswv thiab fij khoom rau Nws hauv lub tebchaws Kana-as rau tus Tswv haivneeg paub. Qhov ntawd yog thaum mus nyob hauv lub tebchaws uas Vajtswv coglus muab rau lawv lawd, Vajtswv xaiv ib qhov chaw tshwjxeeb rau Nws, uas yog qhov chaw Nws los xyeem (nqe 5). Qhov chaw ntawd, tus Tswv haivneeg yuav tuaj ua ke pehawm thiab fij khoom rau tus Tswv.
Qhov ntawd yog yam uas txawv cov neeg Kana-as tej kev pe mlom, vim cov neeg Kana-as pub cai rau lawv tej neeg fij txhua yam khoom raws li lawv nyiam, thiab fij ntawm txhua qhov chaw uas lawv xaiv, tiamsis cov neeg Yixalayees tsuas muaj tib qhov chaw dawbhuv thiab muaj tib lub thaj hlawv khoom fij xwb. Tus Tswv haivneeg tsuas tau cai pehawm Vajtswv ntawm qhov chaw uas Nws xaiv tseg. Tej khoom uas Vajtswv haivneeg fij rau Vajtswv uas haum Nws siab kuj yog nyob ntawm qhov chaw dawbhuv xwb. Thiab cov neeg uas sawvcev ntawm txhua tus fij khoom yog cov povthawj uas yog tus Tswv xaiv. Qhov uas tsuas muaj tib qhov chaw dawbhuv rau tus Tswv haivneeg pehawm Nws txhais tau hais tias, tsuas muaj tib tug Vajtswv, tib txojkev pehawm thiab tib haivneeg dawbhuv xwb. Qhov no kuj yog ib feem uas vim licas Vajtswv tsis pub Nws haivneeg rhawv ib txojkev ntseeg raws li lwm haivneeg tej kabke kev ntseeg, yog Nws xav kom lawv yuav tsum ua raws nraim li Nws tej lus samhwm hauv kev pehawm. Dhau ntawd, lwm haivneeg thiaj paub hais tias tsuas muaj tib tug Vajtswv thiab ib haivneeg dawbhuv xwb.
Ib qhov uas nimno txaus tu siab yog ntau zaus peb cia li muab qhov chaw pehawm tus Tswv ua ib lub samthiaj los piav xwm lawm. Peb xwb tim hloov tej kev pehawm mus raws li ntiajteb, muab tej kev lomzem zoo siab uas ntiajteb nyiam los ua hauv tus Tswv lub Tuamtsev dawbhuv, tsis ua tib zoo saib yam twg yog kev pehawm uas tus Tswv xav tau ntawm Nws haivneeg li. Peb nco ntsoov li no, kev pehawm yog cai yog pehawm vim tus Tswv thiab raws li Nws siab nyiam, tsis yog ua rau peb ib leejtwg txaus siab lossis ua raws li cov ntseeg nyiam. Yog li ntawd, ua ntej yuav hloov lossis ntxiv ib yam twg hauv kev pehawm Vajtswv, peb yuav tsum rov nug yus tus kheej hais tias qhov ntawd puas phim txojkev pehawm uas tus Tswv xav yuav los tsis phim? Puas yog peb tsuas coj tej uas sawvdaws nyiam thiab xav ua raws nyob hauv kev pehawm xwb?
Thov Vajtswv,
Tus Tswv, ua Koj tsaug uas Koj tau qhia nyuam yaus hauv zaj kawm no. Thov Koj pub rau nyuam yaus zeem paub txojkev pehawm yog cai, paub muab Koj ua tus thawj thiab ua raws li Koj siab nyiam. Thov Koj pub kom nyuam yaus pehawm haum koj siab. Amees.
Ib tsoom cov mloog uas hmov thiab tshua,
Peb tabtom pehawm tus Tswv raws li Nws siab nyiam lossis yog ua kom txaus peb lub siab xwb?
Nyeem Vajluskub hauv peb lub xyoo: Nehemis 6:1-7:3
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
