I Kôrintô 4:14-21
“Inh chih kơ iĕm thoi noh ưh kơ sĭ inh wă kơ iĕm mơlâu ôh. Inh wă bơtho iĕm yua kơ iĕm dang kon inh mă ‘mêm kơeng.” (I Kôrintô 4:14)
Nơ̆r jet tơchĕng pơwao:
– ‘Bok Pôl chih dôm nơ̆r bơtho khan, khă đơ̆ng blŭng a truh tơ jơ ‘nâu thoi yơ?
– Sư đei bơtho khan kơ lu bơngai lui tơ pơlei Kôrintô thoi yơ?
– Lu bơ̆n kăl kơ pơm kiơ hăm lu bơngai lui bơ̆n?
‘Bok Pôl rơih trong chih pơtrơp lăm puăn chăl pơma gah tơdrong tơklah băl lăm Khul Bơngai Lui tơ pơlei Kôrintô hăm jơhngơ̆m ‘bĕnh ‘mêm mơnat. Sư pơtơm hăm tơdrong ăn kơ lu sư hlôh tơdrong kơnhăm lăm dôm nơ̆r đei tơ’blŏk, đei Kră Yang pơma tơpă ưh kơ trŏ wă kơ lu sư mơlâu ôh, mălei lei wă “bơtho akhan” (trong 14, 16), jơ̆ bơngai oei ‘blŏk tơchĕng păng pơjing Khul Bơngai Lui tơ pơlei Kôrintô lăm mơjĭt hngam khei oei adrin (Tơdrong jang 18:1-11). Sư bơih bơngai mă sơ’ngon dêh kơplah kơtơ̆ng băt kơ Khul Bơngai Lui đei tơdrong ưh kơ tơproh ‘lơ̆ng. păng sư kư̆m bơngai jĭ jơhngơ̆m dêh kơplah sư pơma khă lu sư. Lu bơngai mă sư krao “dang kon Inh mă ‘mêm kơeng” (trong 14). ‘Bok Pôl bơtho tơ’bôh kơ lu bơngai dang lĕ kon lăm đon lui tơ pơlei Kôrintô, “pơm kiơ̆ kơ inh” (trong 16). Adrol kơ ‘noh, lăm I Kôrintô 11:1 sư đei pơma: “Na iĕm pơm kiơ̆ inh thoi inh pơm kiơ̆ Yêsu Krist”. ‘Noh bơih tơdrong mă ‘bok Pôl huay kơ kơdơ̆ păng mơlâu na bơtho lu bơngai dang lĕ kơ kon lăm đon lui athei pơm kiơ̆ kơ sư. Kư̆m thoi ‘bok Môis sơ̆, ‘bă kơ đĭ đăng adrĕch bơngai Isơrael đei tơ’blŏk kơ lu bơngai Isơrael păng jơ hnơr đơ̆ng rŏng gah tơdrong juăt Kră Yang. ‘Bok Pôl kư̆m ưh kơ dơ̆ng ‘bơ̆t tơdrong arih pơm kơmĭl ‘lơ̆ng đĕch ôh, sư oei wơh ‘bok Timôthê, bơngai mă sư krao “dang kon inh mă ‘mêm kơeng” năm tơ “lu kon inh mă ‘mêm kơeng” wă tơ’blŏk kơ lu sư ‘blŏk “dôm tơdrong inh kiơ̆ Yêsu Krist” (trong 17). Bơngai ‘bă arih ‘lơ̆ng pơm kơmĭl ăn kơ kon hơ’lơ̆p mălei kư̆m ‘nĕ kơ lăng hơi tơdrong bơtho lăm nơ̆r pơma. Păng ưh kơ sĭ bơtho minh ‘măng đĕch. ‘Bok Pôl oei chă trong wă tơ’blŏk ăn yua hli kơ lu sư hiơt dôm tơdrong mă đei hŏk pơhrăm bơih.
‘Nguaih kơ noh, lăm tơdrong pơm ‘bă gah bơhngol, tơ lu trong tuch luch. ‘Bok Pôl pơma ‘bơm minh tơdrong nai kư̆m kăl dêh lăm tơdrong pơm mĕ ‘bă ‘noh jơ̆ pơm trŏ ‘blep. Đei mơ’nah lu bơngai lui tơ pơlei Kôrintô oei tơchĕng khan ‘bok Pôl pơma ‘bơ̆r đĕch, chih lăm kơthơ đĕch, sư ưh kơ wăn năm ôh păng ưh kơ hiơ̆k wă năm tơ Khul Bơngai Lui ôh. (trong 17-21). Thoi minh ‘nu ‘bă oei adrin, kĕ chơ̆n hăm kon hơ’lơ̆p. ‘Bok Pôl pơma khan sư gô năm ngôi tơ lu sư ưh pă đunh bơih. Păng mưh truh, tơdah kăl sư năm thoi bơngai “chĕp sơnguĕt năm tơ lu sư”!
Rim ‘nu lu bơ̆n kư̆m đei bơngai mă bơ̆n chông anhăk sư wih brŏk tơ Kră Yang. Lu bơ̆n kư̆m kăl hiơ̆k tơgŭm lu bơngai “dang lĕ kon lăm đon lui” ‘noh đơ̆ng rŏng kơ lu sư pơm ‘Batem păng mă loi kơplah bơ̆n ‘bôh lu sư đei tơdrong arih ưh kơ trŏ thoi nơ̆r ‘Bok Kei-Dei. Wă kơ gơh tơgŭm lu ‘nhŏng oh bơ̆n, bơ̆n athei pơhrăm nơ̆r ‘Bok Kei-Dei, arih pơm kiơ̆ Kră Yang păng adrin wei rong hăm jơhngơ̆m ‘mêm mơnat thoi kơ ‘bă kon.
Ơ Kră Yang, apinh Ih tơgŭm inh huay kơ pơang păng huay kơ pơdê nơ̆r lu bơngai lui kơjăp đei tơ’blŏk ăn, apinh Ih tơgŭm inh chơ̆n jơhngơ̆m hiơ̆k tơgŭm lu bơngai mă inh chông anhăk lu sư năm tơ Ih. Krao khan yua anăn Kră Yang Yêsu Krist, Amen.
Bơngai chông anhăk bơ̆n năm tơ Kră Yang gô pơma kiơ kơplah ‘bôh nhen tơdrong arih gah bơhngol bơ̆n?
Đŏk lăp Sơ̆p Hla bơar ‘Bok Kei-Dei lăm pêng sơnăm: Đaniel 5
Kênh Youtube BHKTHN:
