Galati 2:11-21
“Dah ‘Bok Kei-Dei jô̆ bơ̆n bơngai ‘lơ̆ng tơpăt hăm Sư yua kơ bơ̆n lui kiơ̆ tơdrong juăt Môis đĕch, lei Yêsu Krist lôch tang bơ̆n tơ ‘long pơglang noh ưh kơ yua kiơ ôh kơ bơ̆n. Gah inh, inh băt tơpă ‘Bok Kei-Dei jô̆ inh bơngai ‘lơ̆ng tơpăt hăm Sư yua kơ Kon Sư lôch tang yua kơ tơdrong yoch inh.” (Galati 2:21)
Nơ̆r jet tơchĕng pơwao:
– Jơ̆ng ‘bang Sêpha pơm kiơ na pơm kơ ‘bok Pôl chrih kơ sư tơm măt lơ bơngai?
– Tơdrong sư pơm jang trăp thoi yơ păng ‘bơm ưh kơ ‘lơ̆ng kơ bu na ‘bok Pôl ưh kơ iŏk nơ̆r sư pơma noh?
– Bơ̆n pơhrăm iŏk tơdrong tơ’bưh lăm tơdrong jô̆ bơ̆n đei đon lui păng tơ’bôh đon lui thoi yơ?
Dah lăm nơ̆r ‘Bok Kei-Dei hơdrol, ‘bok Pôl đei năm tơ Jêrusalem tơ’bơ̆p lu bơngai mă đe jô̆ khan bơngai lui kơjăp lăm khul bơngai lui, lăm noh đei jơ̆ng ‘bang Sêpha, wă khan Pêtrôs, wă kơ băt hơđăl Tơdrong ‘Nao ‘Lơ̆ng Sư đei bơtho păng Tơdrong ‘Nao ‘Lơ̆ng jơ̆ng ‘bang nai bơtho lăm minh đĕch, lei na lăm chăl ‘bai pơhrăm năr ‘nâu pơma gah Sêpha bơngai jơ̆ng ‘bang, ‘bok Pôl đei chrih kơ sư tơm măt lơ bơngai. Tơdrong truh kơplah ‘bok Pôl năm tơ dêh Antiôs. Anih wă ‘bok Pôl juăt kơ bơtho lơ sơnăm lăm tơdrong năm ngôi tơ khul bơngai lui ưh kơ trŏ khul Juđê, ‘bok Pôl hơdai hăm “lu bơngai Juđa nai” hơ oei sŏng sa hơdai hăm lu bơngai tơmoi mă ưh kơ khul Juđê tam mă kăt tơdra akar. Mă khan, thoi ei ră, kơplah “lu buăl Yakơ” wơh năm truh, na sư “ưh kơ pơ̆n”, “yua kơ sư hli kơ buăl sư mă ‘nao truh noh hil kơ sư. Lu bơngai noh athei đĭ đăng lu bơngai lui kơ Yêsu kăt tơdra akar”. Pơm trong thoi noh ưh kơ trŏ, “hơlĕnh” na đei ‘bơm truh kơ ‘Barna’ba păng đĭ “lu bơngai Juđa nai”. Thoi noh, ‘bok Pôl chrih kơ Pêtrôs, jơ̆ bơngai mă arih kiơ̆ kơ tơdrong juăt ưh kơ gơh pơm kơ ‘nhŏng oh jing yoch (I Kôrintô 8:9), sư chrih tơm măt lơ bơngai tơpă.
Thoi jơ̆ng ‘bang đei tơblang pơtrơp dơ̆ng noh, ‘bok Pôl pơm thoi noh, ưh kơ đei pha kiơ kơ tơdrong mă sư đei pơm yoch tơpă (trong 18), dah “pơm kơ tơdrong Kră Yang ‘Bok Kei-Dei ăn đĕch jing ưh kơ yua kiơ ôh (trong 21), yua kơ pơm thoi noh đei pơm tơ’bôh kơ đe gơh jô̆ ‘lơ̆ng tơpăt yua kơ đon lui đĕch tam mă tôm ôh. Mă băt ră tơdrong ‘bok Pêtrôs đei bơtho, roi tơbăt păng khan hơđăl hăm ‘bok Pôl hơdrol ki, tơdrong sư pơm đei tơ’bôh hơđăl tơdrong bơtho đơ̆ng lu bơngai bơtho hơlĕnh khan lui kơ Kră Yang đĕch tam mă tôm ôh, kăl kơ kăt tơdra akar dah lu bơngai lui tơmoi mă ưh kơ khul Juđê wă kơ lăng gĭt găl thoi lu bơngai Juđê. Thoi ei, ‘bok Pêtrôs păng lu bơngai bơtho hơlĕnh lui kơ minh tơdrong lei lăi mă tơdrong arih pơm tơ’bôh phara ră.
Dah lu bơngai bơtho hơlĕnh kăl kơ tơbăt wă kơ tơ’bôh tơdrong ưh kơ ‘lơ̆ng sư, lei na ưh kơ lăp đon Tơdrong ‘Nao ‘Lơ̆ng khan gơh jô̆ ‘lơ̆ng tơpăt yua kơ đon lui. Pêtrôs kư̆m kăl kơ tơ’blŏk mă hơđăl, ‘nĕ kơ hơmet tơdrong glăi noh kiơ̆ kơdih. Yua kơ tơdah ưh, tơdrong ‘noh gô tơgŭm kơ tơdrong pơm ưh kơ trŏ dơ̆ng ning mônh. Tơdrong bơ̆n jô̆ ‘lơ̆ng tơpăt yua kơ bơ̆n lui kơ tơdrong kiơ gĭt găl. Mălei tơdrong gĭt găl hloh bơ̆n pơm tơ’bôh tơdrong bơ̆n lui noh đơ̆ng tơdrong kiơ bơ̆n pơm.
Kơkuh kơ Ih Kră Yang, inh bơnê kơ Ih yua kơ nơ̆r Ih đei bơtho kơ inh kăl kơ bơwei Tơdrong ‘Nao ‘Lơ̆ng mă ‘lơ̆ng rơgoh păng tơpăt tơpă. Apinh Kră Yang tơgŭm inh wei tơdrong arih minh jơhngơ̆m đon hăm đon lui inh jô̆ inh gah Ih. Yua anăn Kră Yang Yêsu Krist, Amen!
Tơdrong arih bơ̆n hăm pơm tơ’bôh trŏ thoi dôm tơdrong lu bơ̆n lui ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 14
Kênh Youtube BHKTHN:
