Klei Aê Diê Blŭ: Bruă Phung Khua Ƀĭng Kna 4:36-37, 9:26-28
Êlan kliăng: “Snăn bi mđĭ ai leh anăn bi kjăp hdơ̆ng diih, msĕ si diih dôk ngă ară anei.” (I Têsalônik 5:11)
Klei êmuh ksiêm mĭn: Si mblang anăn Y-Barnabas? Si klei hdĭp ñu hdĭp djŏ hŏng anăn iêô kơ ñu? Si ngă brei drei jing mnuih bi mđĭ ai hlăm Phung Sang Aê Diê leh anăn hlăm êpul êya phung đăo kơ Krist?
Hdruôm hră Bruă Phung Khua Ƀĭng Kna lač kơ bruă jao yuôm kơ Y-Barnabas hlăm Phung Sang Aê Diê tal êlâo. Anăn sĭt gơ̆ pô jing Y-Yôsep, ƀiădah jih jang mnuih iêô kơ gơ̆ Y-Barnabas, mblang jing “anak êkei klei bi juh”. Ñu čhĭ jih ngăn drăp ñu, myơr kơ Khua Yang čiăng đru phung knap mñai (Bruă Phung Khua Ƀĭng Kna 4:36-37). Êdei tinăn, leh Y-Sôl bi tuôm hŏng Khua Yang Yêsu, đăo kơ Khua Yang leh, leh anăn nao kơ ƀuôn Yêrusalem čiăng bi mguôp mbĭt hŏng phung khua ƀĭng kna, ƀiădah diñu ăt adôk đing, snăn Y-Barnabas yơh jing msĕ si kban bi mguôp ti krah diñu (Bruă Phung Khua Ƀĭng Kna 9:26-28).
Y-Barnabas dôk hdĭp leh djŏ tui si klei mblang anăn iêô kơ ñu. Ñu jing pô kăp đru rŭ, bi mđĭ ai pô mkăn găn gao klei lông dlăng čiăng dôk kjăp mă bruă kơ Khua Yang. Ñu hưn bi sĭt kơ klei jăk Y-Pôl ti anăp phung khua ƀĭng kna ti ƀuôn Yêrusalem. Kyua mâo ñu yơh arăng dưi thâo bruă khua ƀĭng kna Y-Pôl ngă leh anăn tŭ ư. Êdei anei jih diñu dua arăng tiŏ nao brei hiu hưn Klei Mrâo Mrang Jăk sơăi (Bruă Phung Khua Ƀĭng Kna 13:1-13). Klei hdĭp Y-Barnabas êdah kdlưn hŏng klei bi knăl kơ ñu msĕ si sa čô mnuih bi juh, bi mđĭ ai leh anăn rŭ mdơ̆ng pô mkăn. Ktuê hlăm gưl hiu hưn Klei Mrâo Mrang Jăk, tuôm mâo sa blư̆ khua ƀĭng kna Y-Pôl amâo tŭ ư brei Y-Yôhan Markôs nao mbĭt ôh, kyuadah êlâo anăn ñu tuôm lui leh bruă krah wah (Bruă Phung Khua Ƀĭng Kna 13:13). Čiăng đru rŭ, bi mđĭ ai êkei hlăk ai ka kjăp klei mĭn anei, Y-Barnabas tŭ klei bi ktlah hŏng khua ƀĭng kna Y-Pôl čiăng nao mbĭt hŏng Y-Markôs (Bruă Phung Khua Ƀĭng Kna 15:36-40). Kyua klei bi mđĭ ai êkei hlăk ai Y-Markôs mâo klei bi mlih. Truh hlăm thŭn knhal tuč klei hdĭp pô, khua ƀĭng kna Y-Pôl ƀuh klă yơh klei tŭ dưn Y-Markôs hlăk mphŭn dô (II Y-Timôthê 4:11). Y-Barnabas sĭt suôr mă bruă kơ Khua Yang hlăm klei ñu jing mnuih bi juh, bi mđĭ ai arăng tŭ jing êdi.
Hruê anei, ti krah lu lĭn klei gun kpăk mtŭk mtŭl hlăm klei hdĭp, mbĭt hŏng klei lua kăp ksŭng mblah mơ̆ng “phung mtao lăn ala mmăt tĭt anei”, phung anak ƀuôn sang Aê Diê čiăng snăk mâo klei bi mđĭ ai, bi juh leh anăn bi đru rŭ hdơ̆ng pô, dưi găn gao klei lông dlăng hlăm klei hdĭp, čiăng mâo boh tŭ dưn kơ Khua Yang ti krah lăn ala. Bruă jao jing mnuih bi mđĭ ai jing yuôm leh anăn čiăng snăk hlăm Phung Sang Aê Diê leh anăn hlăm êpul êya phung đăo kơ Krist hruê anei. Wăt tơdah knŏng sa boh blŭ bi mđĭ ai, sa bruă ngă hŏng klei khăp, amâodah knŏng klei mâo ƀô̆ mta mbĭt hrăm hlăm klei mă bruă, ăt dưi jing klei bi mđĭ ai prŏng kơ pô mkăn mơh. Tơdah drei amâo sa ai ôh, amâo bi mđĭ ai hdơ̆ng pô ôh snăn srăng brei mmông găl kơ lăn ala ksŭng mblah leh anăn dưi hĭn kơ drei. Akâo Khua Yangbrei drei jng mnuih bi mđĭ ai leh anăn đru rŭ ayŏng adei čiăng mđrăm mbĭt dưi găn gao leh anăn mă bruă kơ Khua Yang mâo boh tŭ dưn.
Si ngă drei yua bi jăk hruê mmông Khua Yang brei čiăng ba klei bi mđĭ ai kơ pô mkăn mơ̆?
Wah lač: Ơ Khua Yang, ti krah klei hdĭp yang jhat dôk lua kăp leh anăn duah nanao mmông găl čiăng ksŭng mblah, brei kâo dôk kjăp hlăm Khua Yang, hŏng jih ai tiê sĭt suôr jing mnuih bi juh, bi mđĭ ai pô mkăn, čiăng bi đru rŭ bruă mă hdơ̆ng pô leh anăn hrăm mbĭt ngă bruă kơ Khua Yang mâo boh tŭ dưn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
