Tơdrong Pơđơ̆k 23:4-5
“Măt ih nŏng kơ lăng ‘bloh tơ mơdrŏng hă? Ưh pă đei boih! Yua kơ sư đĭ chăt pơnăr păr tŏk tơ plĕnh thoi sem kring.” (Tơdrong Pơđơ̆k 23:5)
Nơ̆r jet tơchĕng pơwao:
– Yua kơ kiơ kon pơlei Kră Yang ưh kơ pơgleh kơdih wă chă mơdrŏng?
– Tơdrong gĭt lăm teh đak đei lăp biơ̆ đĕch thoi yơ?
– Lu bơ̆n tơchĕng thoi yơ gah jên wă kơ gơh yua liơ pơm ăn kơ Kră Yang lăp đon?
Pơtao Salômôn bơtho kon hơ’lơ̆p gah jên nhen thoi tơmam yua, ưh kơsĭ kơnhăm lăm hăl arih kon hơ’lơ̆p. Kơplah kon “chu gleh hrat” dah “jang gleh pơmat”, pơpôi đĭ ơhngơ̆m pran, tơchĕng pơwao lăm tơdrong jang chă jên kơplah đei mơdrŏng bơih, kon gô dan jên noh gĭt kăl hloh, lăng mŭk drăm wă kơnhăm lăm chăl arih, kon đei yak năm bơih lăm trong glăi mă ưh kơ băt, Kră Yang bơtho kon pơlei Kră Yang athei pơnam “Ti lu bơngai jang apah jing dơnuh hin, ti lu bơngai pơnam đei mŭk tơmam mơdrŏng” (Tơdrong Pơđơ̆k 10:4), mă khan thoi noh kơplah kon bơngai tơchĕng kơdih khan đei jên yua kơ đơ̆ng kĕ pran, tơdrong gơh hơgei kơdih akâu arih kơ băt bơnê kơ Kră Yang, dah yua nơ̆r pơma nai noh tho hơngah kơ Kră Yang, kơplah noh yua kơ jên mă jing weh ataih puh pơ̆k lăm yoch kơnê̆ dah tơhiong lê̆ jơhngơ̆m gơnang kơ Kră Yang păng yoch glăi hăm Sư.
Nơ̆r “măt nŏng kơ lăng” pơma kơ tơdong hưch ham dah ‘bloh lăng chơchă, măt wă tơ’bôh kơ lăm jơhnơ̆m bơngai, thoi noh “nŏng kơ lăng ‘bloh tơ mơdrŏng” tơ’bôh lăm to hưch ham ‘maih chă mơdrŏng, mă-lei tơpă noh tơ’bôh lơ lăm tơdrong mơdrŏng đei păr hrĕnh hiong hiach phara kiơ kơ sem kring păr tŏk tơplĕnh. Sem păr hrĕnh, păr đông kơjung, păng pran, anat kơ wă adrin rôp sư, jên kư̆m ‘bônh kơ hiong hiach hlŏng hloi thoi noh.
Kră Yang Yêsu bơtho kon pơlei pơla Sư ‘nĕ kơ chă mong mŭk tơmam ala teh, đei sang sa mua reh păng lu tơtông tơgar iŏk, mă-lei chă mong mŭk tơmam tơ plĕnh ti, yua kơ mŭk tơmam tơ yơ jơhngơm đon iĕm tơ noh (Mathiơ 6:19-21). Jên kăk, mŭk tơmam noh nhen thoi tơmam wă yua đĕch, dang ei oei đei dơning hiong, kon pơlei Kră Yang ‘nĕ mah tơchĕng dêh, pơgleh kơdih, chă mong mŭk tơmam lơ, păng kư̆m ‘nĕ lăng mŭk tơmam noh hloh kơ đĭ đăng wă gơnang mă hiong gah bơhngol. Lu bơ̆n kơnhăm noh arih ling lang. Tơdrong mơdrŏng ưh kơ hiong tôch, thoi noh athei krao apĭnh Kră Yang ăn kơ lu bơ̆n băt kơ gơh tơng lăm tơdrong jang sa chă jên, ưh kơ đơ̆ng jên tơmam na pơm yoch.
Lu bơ̆n hăm ‘blŏk kơ Kră Yang hơnơ̆ng ưh păng gơnang kơ Sư kơplah tơdrong arih tơproh ‘lơ̆ng, đei ‘bônh?
Kơkuh kơ Ih ơ Kră Yang, Ih bơih Tơ’ngla pơjing lu nhôn, dŏng pơklaih lu nhôn, apĭnh tơgŭm lu nhôn arih hăm jơhngơ̆m băt bơnê kơ Ih, ling lang năm kiơ̆ tronh Ih wă mă khan tơdrong arih pơmat dah đei‘bônh, yua anăn Kră Yang Yêsu Kris, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 21.
Kênh Youtube BHKTHN:
