Titus 2:3-5
Nqe cim:
“kom thiaj cob qhia tau cov pojniam hluas kom hlub lawv tus txiv thiab lawv tej menyuam, thiab paub tswj lawv lub siab, ua neeg dawb huv, tu vaj tu tsev zoo, muaj siab khuvleej, nyob hauv tus txiv qab kev tswjhwm, kom Vajtswv txojlus thiaj tsis raug luag thuam” (Titus 2:4-5)
Lus nug rau sawvdaws xav:
– Leejtwg muaj feem xyuam qhuab ntuas cov pojniam hluas?
– Yuav tsum qhia rau cov pojniam hluas tej cwjpwm twg?
– Peb thiab Pawg ntseeg nqis tes ua qhov feem xyuam no zoo li cas?
Timthawj Paulus qhia Titus hais tias nws muaj feem xyuam ntuas cov pojniam laus kom yuav tsum ua lub neej yog ib tug qauv zoo nyob hauv pawg ntseeg, tiamsis ntawm cov pojniam hluas ces cov pojniam laus yuav tsum qhuab ntuas, cob qhia. Vim cov ua niam, cov pog, cov niamtais yeej ibtxwm muaj feem xyuam tseemceeb hauv kev ua qauv kom tej menyuam xeebntxwv xyaum ua raws. Tshwjxeeb yog hauv kev noj nyob txhua hnub, yeej zam tsis dhau tej kev tsis sib haum, nyuaj siab, tsis zam txim, tsis ua siab ntev,… yoojyim dhau mus ua ib tug cwjpwm phem ua qauv tsis zoo rau cov pojniam hluas hauv tsev neeg xyaum. Feem xyuam cob qhia no yog txoj haukev los cob tej yam zoo hauv tus Tswv ib phaum neeg dhau ib phaum. Timautes muaj kev ntseeg tseeb thiab dhau los ua ib tug tubtxib ua tus Tswv haujlwm feem ntau twb yog vim nws niam pog thiab nws niam txojkev ntseeg (2 Timautes 1:5).
Cov ua niam, cov ua pog uas hwm tus Tswv thiab muaj tswvyim ua neej, “qhia yam zoo, yam yog”, qhia cov pojniam “yuav tsum hlub lawv tus txiv, lawv cov menyuam,…” (nqe 3-4). Paub tsab zam rau lawv tus kheej dhau los ntawm “kev tswj siab, dawbhuv” txhais hais tias ua ncaj, muaj tswvyim, paub tswj siab hauv kev hais lus, kev ua rau lwm tus. Ntawm lub tsev neeg, tus pojniam, leej niam yuav tsum yog tus leg lub cuabyig, qhuab qhia “nquag tu vaj tu tsev, ua siab dawb siab zoo thiab mloog lawv cov txiv lus,…” (nqe 5). Ntawm cov tsev neeg hluas niaj hnub nimno, txawm yog tes haujlwm tu vaj tu tsev tsis yog feem xyuam ntawm tus niam tsev lawm xwb, tiamsis tus txiv kuj muaj feem xyuam los koom tes, pab tus pojniam thaum muaj kev cheem tsum zoo li thaum muaj mob, thaum yug menyuam, lossis thaum muaj haujlwm ntau,… Tiamsis tus pojniam, leej niam cheem tsum hmov tshua, nquag tu vaj tu tsev, hlub tshua, tu kom tus txiv nrog tej menyuam muaj zog sis. Ntawd yog tus cai kom tuav tau lub tsev neeg nyob kaj siab, thiab “thiaj yuav tsis muaj leejtwg thuam Vajtswv txojlus” (nqe 5). Vim dhau ntawm peb kev ua neej, lwm tus yuav paub tus Tswv yog Tus zoo li cas!
Feem xyuam ceev kom ruaj kev muaj nqis ntawm sab ntsujplig thiab kev ua neej zoo ntawm cov ntseeg Yexus yog tagnrho txhua tus tibneeg li feem xyuam. Cov neeg laus yog tus qauv zoo rau cov hluas xyaum, cov hluas yuav tsum kawm xyaum lub neej muab siab rau ntseeg ntawm pog yawg, niamtxiv kom lub tsev neeg thiaj kaj siab, Vajtswv Txojlus thiaj tsis raug txob thuam. Cov neeg tsis tau ntseeg saib peb kev ua neej los ntaus nqi rau peb txojkev ntseeg, yog li Pawg ntseeg yuav tsum tau qhia thiab txhawb txhua hom neeg uas muaj hnub nyoog sib txawv los koom tes ceev “tej yam zoo” “uas raws li Vajtswv Txojlus”, kom ntau tug paub thiab los ntseeg tus Tswv, kom peb txojkev ntseeg tsis raug txob thuam, kom tus Tswv lub npe tau koob meej.
Thov Vajtswv,
Ua Vajtswv uas yog tus thawj hauv nyuam yaus lub tsev neeg tsaug. Nyuam yaus ua koj tsaug vim koj txojlus ntuas nyuam yaus xyaum ua thiab ceev tej cwjpwm zoo ntawm tus ntseeg kom lub tsev neeg muaj kev kaj siab, ua qauv rau tej menyuam xeebntxwv xyaum, thiab tus Tswv koj lub npe tau koob meej. Nyuam yaus tuav Yexus Khetos lub npe thov, A-mees.
Peb lub neej nyob hauv tsev neeg tau cov neeg tsis ntseeg nyob ib ncig ntaus nqi zoo li cas?
Nyeem Vajluskub hauv peb lub xyoo: 2 Xamuyees 22
Kênh Youtube BHKTHN:
