Klei Aê Diê Blŭ: Klei Kbiă 35:1-3
Êlan kliăng: “Brei diih mă bruă năm hruê, ƀiădah hruê tal kjuh srăng jing hruê sabat doh jăk pioh mdei kơ Yêhôwa. Hlei pô ngă sa mta bruă hruê anăn, arăng srăng bi mdjiê ñu” (Klei Kbiă 35:2)
Klei êmuh ksiêm mĭn: Si klei yuôm bhăn bruă phung ƀuôn sang brei pioh hjăn hruê Sabat jing doh jăk kơ Yêhôwa Aê Diê? Ya klei bi kmhal kơ klei ngă soh kơ hruê Sabat? Ya klei yuôm bhăn tơdah drei djă pioh hruê mdei?
Pioh hjăn hruê Sabat kơ Yêhôwa Aê Diê jing yuôm bhăn snăk hŏng phung ƀuôn sang Aê Diê; hlăm hdruôm hră Klei Kbiă mâo truh năm blư̆ čih kơ bruă pioh hruê Sabat. Aê Diê mkăp leh djăp mnơ̆ng ƀơ̆ng huă čiăng yua hlăm hruê Sabat mơ̆ng bruă bi êdah klei duñ mana (Klei Kbiă 16:26-30). Aê Diê brei klei hơêč hmưi kơ hruê Sabat leh anăn mjing doh jăk kyua Ñu hrih mjing leh lăn adiê hlăm năm hruê, truh hruê tal kjuh snăn Ñu mdei (Klei Kbiă 20:8-11). Aê Diê čiăng kơ phung ƀuôn sang Aê Diê, phung dĭng buăl êkei mniê, phung ti êngao leh anăn wăt hlô mnơ̆ng dưi mdei hlăm hruê Sabat čiăng pioh ai mă bruă (Klei Kbiă 23:12). Pioh hruê Sabat jing sa klei kuôl kă lă lar Aê Diê hŏng phung ƀuôn sang Israel (Klei Kbiă 31:12-17). Phung ƀuôn sang Aê Diê brei mdei hlăm hruê Sabat wăt tơdah mâo lu mta bruă hlăm yan buh amâodah wiă (Klei Kbiă 34:21). Klei čih hlăm Klei Kbiă 35:2-3 brei thâo thiăm bruă kuč pui tŭk knă ăt kăn dưi ngă rei hlăm hruê Sabat. Hlăm hruê tal năm, phung ƀuôn sang Aê Diê duñ mana lu hĭn dua blư̆ mkă hŏng yang đar leh anăn tŭk mana čiăng pioh kơ hruê Sabat. Klei bi kmhal kơ phung ngă soh hŏng hruê Sbat jing arăng suôt mơ̆ng phung ƀuôn sang amâodah arăng mdjiê (Klei Kbiă 31:12-17; 35:2).
Hlăm Klei Bi Mguôp Mrâo, Khua Yang Yêsu leh anăn phung ƀĭng kna amâo lač ôh bruă phung đăo brei djă pioh hruê Sabat ƀiădah mtô phung đăo đăm lui ôh klei kkuh mpŭ (Hêbrơ 10:25). Sang Aê Diê tal êlâo bi kƀĭn hlăm hruê Kjuh čiăng bi hdơr Khua Yang Yêsu kbiă lŏ hdĭp (Bruă Phung Khua Ƀĭng Kna 20:7). Leh anăn hruê Kjuh jing “Hruê Khua Yang” (Klei Bi Êdah 1:10). Drei bi kƀĭn hruê Kjuh ăt hŏng hdră kñăm jing mdei leh anăn kkuh mpŭ kơ Aê Diê Tlâo Yang, Pô hrih mjing jih jang mnơ̆ng, Pô bi tui leh anăn dôk mbĭt hŏng phung ƀuôn sang Ñu. Thâo kral djŏ klă kơ Aê Diê đru kơ phung ƀuôn sang mâo sa knuih djŏ hŏng Aê Diê, hŏng ayŏng adei leh anăn jih jang mnơ̆ng dhơ̆ng Ñu hrih leh.
Ti anăp jih jang mnơ̆ng Aê Diê hrih mjing, drei jing điêt dhiêt ƀiădah Aê Diê khăp kơ drei hĭn kơ jih jang mnơ̆ng; Ñu brei kơ drei klei pap dưi bi mguôp hŏng Ñu, leh anăn brei klei dưi kriê dlăng djăp mta mnơ̆ng. Phung đăo thâo mâo Aê Diê khăp srăng hdĭp mơak, mâo ai tiê đua klam hŏng Aê Diê, hŏng pô, hŏng pô mkăn, ăt msĕ mơh hŏng jih jang mnơ̆ng Ñu hrih leh. Anak mnuih srăng hdĭp êđăp ênang leh anăn jăk mơak snăk tơdah grăp čô mnuih thâo Aê Diê jing Pô Hrih Mjing leh anăn grăp čô mâo Aê Diê Khăp kyua dưi hrih mjing tui si rup Ñu, hrăm mbĭt kkuh mpŭ kơ Ñu hlăm “Hruê Khua Yang”.
Drei pioh hjăn leh hruê mdei doh jăk kluôm ênŭm kơ Aê Diê mơ̆ amâodah ka?
Wah lač: Ơ Khua Yang! Klei bhăn Ih jing kluôm ênŭm, ba klei tŭ dưn kơ phung ƀuôn sang Ih ! Kâo mơak hlăm hruê Kjuh kkuh mpŭ kơ Ih, thâo klei êđăp ênang, klei đru mơ̆ng Ih leh anăn bi mguôp sĭt suôr hlăm Khua Yang. Bi mni lač jăk kơ Ih kơ djăp mta klei jăk Ih brei leh kơ kâo.
Dlăng Klei Aê Diê Blŭ hlăm tlâo thŭn: Y‑Mathiơ 2:7-3:17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
