Klei Aê Diê Blŭ: Y‑Mathiơ 11:28-30.
Êlan kliăng: “Brei diih đua knông Kâo leh anăn hriăm mơ̆ng Kâo, kyuadah Kâo jing ênang leh anăn mâo ai tiê luă gŭ; leh anăn mngăt diih srăng mdei” (Y‑Mathiơ 11:29)
Klei êmuh ksiêm mĭn: Si Khua Yang Yêsu lač kơ Ñu pô? Ya klei Ñu čiăng phung tui hlue Ñu brei ngă? Ya boh tŭ mơ̆ng phung hlue ngă klei Aê Diê mtă? Si drei dôk hlue ngă klei Aê Diê čiăng?
Lŏ čuê asăp brei đăo kơ Khua Yang hlăm êlan 28, Khua Yang Yêsu lŏ dơ̆ng iêô mthưr phung đăo kơ Ñu brei tui hriăm Ñu hlăm klei mă bruă. Khua Yang Yêsu bi hmô hlăm klei luă gŭ, êdu êun leh anăn Ñu čiăng kơ drei đua knông Ñu leh anăn tui hriăm Ñu. Rup mnơ̆ng đua knông lač kơ klei hlue gưt leh anăn mă bruă, Khua Yang Yêsu gưt asăp Aê Diê Ama hriê ti lăn ala čiăng mă bruă leh anăn jao jih klei hdĭp pô jing ênoh bi tui kơ lu mnuih (Y‑Mathiơ 20:28). Khua Yang čiăng drei tui hriăm klei mă bruă kơ phung amâo đăo msĕ si Ñu ngă leh. Klei jăk mơak sĭt drei tui hriăm Khua Yang jing srăng dưi mdei. “Mdei” jing amâo hroh ai, Khua Yang srăng thiăm klei ktang kơ drei bi leh ya bruă dưi jao leh anăn Ñu pô ăt ngă kơ drei mơak hlăk êjai ngă bruă. Khua Yang rơ̆ng hŏng drei, “Kyuadah knông kâo ênưih leh anăn mnơ̆ng kâo brei gui jing hdjul”(êlan 30), Ñu amâo brei drei đua knông ktrŏ hjăn păn pô ôh ƀiădah Ñu đua mbĭt hŏng drei.
Phung đăo kơ Krist hruê anei dưi iêô dưm klei đăo sĭt pô kơ Khua Yang Yêsu leh anăn ăt dưi iêô mthưr hlue si klei Khua Yang bi hmô hlăm klei mă bruă. Brei drei thâo ƀuh phung Khua Yang dôk dưm riêng gah pô čiăng dưi mă bruă. Boh nik hlăm boh klei ruă tưp, bruă duh mkra toh hroh, yan adiê ngă… lu mnuih dôk hlăm klei dleh dlan, luč klei čang hmăng, anei jing klei găl čiăng kơ Sang Aê Diê leh anăn phung đăo bi êdah ai tiê mđing dlăng hdơ̆ng bi đru.
Khua Yang Yêsu ăt čang hmăng drei tui hriăm Ñu mă bruă hlăm ai tiê êdu êun leh anăn luă gŭ. Drei amâo gĭr bi mklă pô jing mnuih yuôm bhăn hlăk êjai mă bruă kơ pô mkăn ôh, drei amâo mă bruă kyua klei tŭ dưn amâodah čiăng dưi bi mni ôh, drei ăt kăn bi myuôm dưi mâo klei hdơr knga amâodah hơăi, amâodah phung drei mă bruă anăn năng amâodah tlaih. Drei klă sĭt dưi “mdei” amâodah “mơak” sĭt drei tui hriăm ai tiê mă bruă Khua Yang Yêsu. Ƀrư̆ hriăm hlue si klei Khua Yang bi hmô, drei lŏ ƀrư̆ thâo lu hĭn klei Ñu brei ai ktang leh anăn Ñu hrăm mbĭt sĭt drei jih ai tiê mă bruă kơ pô mkăn. Akâo kơ Khua Yang đru drei thâo bi mđing dlăng čiăng ƀuh klei čiăng phung riêng gah čiăng dưi đru, mă bruă hlăm klei khăp. Leh anăn akâo kơ Khua Yang ăt brei drei tui hriăm klei Khua Yang bi hmô čiăng mă bruă hlăm ai tiê luă gŭ leh anăn êdu êun.
Drei thâo leh klei mdei hlăm Khua Yang brei hlăk êjai jih ai tiê mă bruă kơ pô mkăn mơ̆?
Wah lač: Ơ Khua Yang, kâo bi mni kơ Ih kyua kâo dưi bi tui sĭt đăo kơ Ih. Akâo kơ Ih brei kơ kâo ai tiê mă bruă kơ pô mkăn msĕ si Khua Yang mă leh, leh anăn dưi thâo klei mdei hlăk êjai kâo mă bruă.
Dlăng Klei Aê Diê Blŭ hlăm tlâo thŭn: Y‑Yêrêmim 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
