Klei Aê Diê Blŭ: II Klei Yăl Dliê 31:11-19
Êlan kliăng: “Y‑Hêsêkia mtă kơ diñu brei mkra adŭ pioh mnơ̆ng hlăm sang yang Yêhôwa; leh anăn diñu mkra mơh. Hŏng klei sĭt suôr diñu ba mnơ̆ng myơr, dŏ sa kdrêč hlăm pluh, mnơ̆ng pioh brei kơ Yêhôwa” (II Klei Yăl Dliê 31:11-12a)
Klei êmuh ksiêm mĭn: Si ngă Mtao Hêsêkia mdưm phung kiă leh anăn bi mbha mnơ̆ng myơr? Hŏng si ai tiê diñu ngă leh? Ya klei hriăm drei mâo mơ̆ng knuih phung Lêwi myơr leh anăn mă bruă hŏng klei sĭt suôr?
Tơdah phung ƀuôn sang ngă tui si klei Mtao Hêsêkia mtă leh anăn myơr hŏng klei kmah snăn Aê Diê brei klei jăk jĭn kơ diñu leh anăn diñu ăt myơr hŏng klei êbeh dlai tơl dŏ êbeh mơ̆ng mnơ̆ng diñu myơr amâo mâo anôk pioh ôh. Mtao mtă brei mkra adŭ pioh mnơ̆ng hlăm sang Aê Diê leh anăn jao kơ phung Lêwi ngă bruă bi mbha mnơ̆ng myơr. Snăn yơh, phung Lêwi srăng klam bruă mă tŭ, kiă kriê leh anăn bi mbha mnơ̆ng arăng myơr. “Hŏng klei sĭt suôr” diñu ba mnơ̆ng myơr, dŏ sa kdrêč hlăm pluh, mnơ̆ng pioh brei kơ Yêhôwa kơ adŭ pioh mnơ̆ng, čiăng lač diñu ngă hŏng klei kpă, hŏng klei sĭt nik. Diñu amâo čŏng čiăng djă pioh kơ diñu pô amâodah kơ gŏ sang diñu ôh ƀiădah ba pioh jih hlăm hjiê.
Mtao jao kơ Y‑Kênania sa čô Lêwi jing khua kiă kriê jih jang mnơ̆ng hlăm hjiê, Y‑Simei adei ñu jing kơiăng pô đru, mbĭt hŏng pluh čô pô đru mkăn. Msĕ mơh mâo năm čô mkăn hŏng klei sĭt suôr đru Y‑Kôrê čiăng bi mbha mnơ̆ng myơr hlăm jih jang ƀuôn phung khua ngă yang, jing pluh tlâo boh ƀuôn brei kơ phung khua ngă yang ngă anôk dôk (Y‑Yôsuê 21:4). Leh anăn grăp čô phung mduôn amâodah hlăk ai hlăm ƀuôn anăn arăng mbha sơăi. Anăn jing jih jang phung arăng čih anăn hlăm hră găp djuê, hlăm anăn mâo phung khua ngă yang leh anăn phung Lêwi dôk hlăm ƀuôn kbưi mơ̆ng ƀuôn Yêrusalem, jih jang phung khua ngă yang leh anăn phung Lêwi dôk mă bruă hlăm SangAê Diê, wăt phung hđeh êkei nao mbĭt hŏng ama digơ̆ kơ Sang Aê Diê čiăng hriăm mă bruă kơ Aê Diê, leh anăn phung Lêwi mơ̆ng dua pluh thŭn kơ dlông. Diñu bi mbha msĕ mơh kơ gŏ sang phung khua ngă yang leh anăn phung Lêwi ti ƀuôn Yêrusalem, kơ gŏ sang phung khua ngă yang leh anăn gŏ sang phung Lêwi dôk hlăm ƀuôn digơ̆ pô (êlan 17-19).
Klei bi hmô mơ̆ng phung ƀuôn sang Aê Diê ênuk mphŭn dô myơr hŏng klei êbeh dlai leh anăn klei bi hmô kơ klei mă bruă hŏng klei sĭt suôr, kpă ênuah mơ̆ng phung Mtao Hêsêkia jao leh bruă lui pioh kơ drei lu klei hriăm năng kơ drei tui ngă. Phung Sang Aê Diê čiăng snăk mâo prăk pioh yua kơ lu bruă, kyuanăn brei phung đăo myơr hŏng klei kmah čiăng mkŏ mjing leh anăn bi mđĭ Ƀuôn ala mtao Aê Diê. Tơdah drei myơr hŏng jih ai tiê, Khua Yang srăng brei lu klei jăk jĭn čiăng kơ drei srăng myơr lu hĭn. Bi phung arăng jao leh bruă kiă kriê, yua prăk mah leh anăn dŏ ngăn Phung Sang Aê Diê, ngă bĕ hŏng klei sĭt suôr, hŏng jih ai tiê msĕ si mă bruă kơ Khua Yang, amâo djŏ kơ mnuih ôh (Kôlôs 3:23). Knuih phung Lêwi mă bruă hŏng klei sĭt suôr lŏ mñă kơ drei tơdah mă tŭ leh bruă klam, brei drei ngă “hŏng klei sĭt suôr”, kpă ênuah leh anăn hŏng klei sĭt nik čiăng bi mơak kơ Khua Yang leh anăn phung đăo mơak mơh tơdah myơr.
Drei dôk ngă bruă Khua Yang hŏng jih ai tiê leh anăn hŏng klei sĭt suôr mơ̆?
Wah lač: Ơ Khua Yang, brei kâo khăp kơ Ih, hŏng jih ai tiê myơr hŏng klei kmah kơ bruă Ih, leh anăn tui knuih phung Lêwi ngă jih jang bruă Ih jao leh hŏng klei sĭt suôr leh anăn kpă ênuah. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 1-2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
