Yaxayas 30:18-26
Nqe cim:
“Rau qhov tus TSWV yog Vajtswv tus uas ncaj ncees; cov neeg uas tos nws yuav tau txais koob hmoov!” (Yaxayas 30:18b)
Lus nug xav:
– Tus Cevlus Yaxayas qhia hais tias tus Tswv yuav ua li cas rau Nws haivneeg?
– Tus Tswv tej lus cogtseg ntawd muaj qabhau li cas?
– Qhov no pub rau peb muaj kev cia siab li cas thaum ntsib kev mob siab, ntxhov siab lossis raug teebmeem vim kev txhaum hauv lubneej?
Nyob hauv ntu ua ntej ntawd (Yaxayas 30:8-17), tus Cevlus Yaxayas tau qhia txog ib haivneeg uas ntxeev siab, tig nruabqaum rau tus Tswv. Tsimnyog yuav tsum tso siab rau tus Tswv, tiamsis haivneeg Yudais ho tig mus nrhiav tebchaws Iziv kom tau kev tiv thaiv dim ntawm lawv tej yeebncuab. Lawv txojkev ntxeev siab tsimnyog yuav raug txiav txim. Tiamsis, thaum pib ntu no (nqe 18-26), tus Cevlus Yaxayas tau hais ib zaj lus uas muaj kev cia siab hais tias: “Tus TSWV tos ntev loo yuav foom koob hmoov rau nej; yog li ntawd, nws thiaj los hlub nej” (nqe 18a).
Txawm tias tus Tswv haivneeg rov tawmtsam Nws, los tus Tswv tseem qhia tshwm Nws lub siab hlub tshua rau lawv. Nws “los” tsis yog los rhuav tshem, tiamsis yog los nchuav kev hlub rau lawv. Txawm yog Vajtswv cov menyuam mus yuamkev, los Nws tseem xav rub lawv rov los, kho lawv zoo mob thiab foom koobmoov rau lawv. Tus Tswv txojkev hlub tshua niaj hnub nrog nraim peb (Ntawv Nkauj 23:6). Tus Tswv yeej txaus siab hlo zam txim thiab hloov peb lub neej dua tshiab. Nws tos peb tig rov los, kom Nws tau muab peb qhwv rau hauv Nws txojkev hlub.
Tiamsis, txojkev hlub npog tsis tau txojkev ncaj ncees. Hauv nqe 18, tus Cevlus Yaxayas kuj hais meej hais tias: “Tus TSWV yog Vajtswv tus uas ncaj ncees.” Vajtswv yuav tsis cim civ zam rau tej kev txhaum, “kuj tsis suav tias tsis txhaum” (Khiavdim 34:7). Tus Tswv txojkev ncaj ncees yog Nws yuav rov txhim kho lossis hloov txhua yam dua tshiab. Tiamsis tus Tswv txojkev hlub tshua thiab txojkev ncaj ncees yeej tsis sib cuamtshuam li. Tus Tswv txojkev ncaj ncees ua tabpov hais tias kev txhaum yuav tsum raug txiav txim, tiamsis tus Tswv txojkev hlub tshua ua tabpov hais tias tus Tswv muaj peevxwm txhim kho tus Tswv haivneeg lubneej thaum lawv hloov siab tig rov los thiab tos ntsoov Nws.
Tus Cevlus Yaxayas tau tshajtawm tus Tswv tej lus cogtseg uas zoo kawg nkaus rau Nws haivneeg. Tus Tswv yuav teb thaum Nws haivneeg taij thov (nqe 19). Nws yuav coj lawv kev thiab qhia hais tias: “Txojkev tseeb yog txoj no. Cia li taug txoj no ntag!” (nqe 21). Tus Tswv yuav foom koobmoov rau lawv tes haujlwm thiab pub rau lawv muaj npluamias (nqe 23-24). Nws kuj yuav qhwv thiab kho lawv tej qhov txhab kom zoo (nqe 26).
Niaj hnub nimno, txhua zaus uas ntsib kev mob siab, ntxhov siab lossis raug teebmeem vim kev txhaum hauv lubneej, peb txhob mus nrhiav tej qhov chaw nyab xeeb cuav, txhob khiav raws tibneeg, tshwjxeeb yog txhob khiav raws hwjchim, meejmom li haivneeg Yudais yav thaum ub tau ua, peb tau nqua hu kom cia li tos ntsoov thiab tso siab rau Vajtswv tus uas muaj lub siab hlub tshua thiab ncaj ncees. Txojkev ncaj ncees tsis pab peb qaij dhau lub txim thaum ua txhaum, tiamsis txojkev hlub tshua yuav kho kom peb zoo mob. Txojkev ncaj ncees tawmtsam kev txhaum, tiamsis txojkev hlub tshua qhib txojkev rau yav tom ntej thiab pub muaj kev cia siab. Thov tus Tswv pab peb paub khiav los cuag Nws los ntawm txojkev tso siab, nkaum hauv tus Tswv txojkev hlub thiab tos ntsoov kev pab ntawm Nws.
Thov Vajtswv,
Tus Tswv, thov pab nyuam yaus niaj hnub tos ntsoov Koj txhua lub tsamthawj, kom nyuam yaus niaj hnub txais tau Koj tej koobmoov thiab txojkev hlub tshua nrog nraim nyuam yaus lubneej. Nyuam yaus tuav Yexus Khetos lub npe thov, Amees
Thaum ntsib kev sim siab, peb pheej tos ntsoov kev pab ntawm tus Tswv lossis ntawm lwm tus tibneeg?
Nyeem Vajluskub hauv peb lub xyoos: Exekees 6
Kênh Youtube BHKTHN:
