Klei Aê Diê Blŭ: Y-Amôs 5:21-27
Êlan kliăng: “Ƀiădah brei klei kpă klŭng trŭn msĕ si êa, leh anăn klei kpă ênô msĕ si sa hnoh êa đoh nanao” (Y-Amôs 5:24)
Klei êmuh ksiêm mĭn: Hlăm hbĭl ênuk Khua pô hưn êlâo Y-Amôs hdĭp? Ya bruă klam Khua Yang jao kơ ñu? Si klei bi sĭt leh klei blŭ hưn êlâo brei răng mơ̆ng khua pô hưn êlâo? Ya klei hriăm kơ drei mơ̆ng klei blŭ Khua pô hưn êlâo Y-Amôs?
Khua pô hưn êlâo Y-Amôs hdĭp hlăm plah wah gưl ênuk tal sapăn êlâo kơ Krist. Leh mtao Y-Salômôn djiê, lăn čar Israel bi mbha jing dua, tĭng Dhŭng jing ƀuôn ala mtao Yuđa mtao Usia kiă kriê, tĭng Dưr jing ƀuôn ala mtao Israel, mtao Y-Jêrôbôam II kiă kriê. Khua pô hưn êlâo Y-Amôs hdĭp ti ƀuôn Têkôa, sa boh ƀuôn điêt hlăm čar Yuđa. Ñu ngă bruă mgăt biăp leh anăn kiă kriê ana boh hra. Ñu amâo jing anak čô phung khua pô hưn êlâo amâodah phung khua ngă yang ôh. Hlăk Y-Amôs dôk mgăt biăp ti ƀuôn Têkôa, čar Yuđa, snăn Khua Yang iêô ñu ngă bruă khua pô hưn êlâo. Ñu amâo tuôm mâo klei bi hriăm amâodah mprăp kơ bruă jing khua pô hưn êlâo ôh hlăk Khua Yang iêô ñu (Y-Amôs 7:14-15).
Wưng ênuk Khua pô hưn êlâo Y-Amôs blŭ klei hưn êlâo jing ênuk dôk êđăp ênang, bruă čhĭ mnia blei čăt đĭ sơăi ti jih dua tĭng ƀuôn ala mtao. Phung khua kiă kriê tĭng čar Israel jing mdrŏng sah, dôk hdĭp hlăm klei knhŭk knhŭl. Hlăm klei đăo, ti êngao diñu djă pioh klei bhiăn kƀĭn hŏng klei mpŭ (êlan 21-23). Ƀiădah hlăm klei hdĭp sĭt, diñu ngă klei knhŭk knhŭl, ktư̆ juă phung ƀun ƀin knap mñai (Y-Amôs 2:6-7; 4:1; 5:11-12). Kyuanăn Khua Yang tiŏ nao Khua pô hưn êlâo Y-Amôs nao truh ti ƀuôn Bêthel, anôk phŭn phung Israel kkuh mpŭ, hưn klei sĭt nik ktrŏ kjham: Khua Yang bi êmut kơ mnơ̆ng myơr ngă yang, Khua Yang amâo mơak ôh hŏng jing klei diñu bi kƀĭn prŏng, Khua Yang amâo tŭ ôh mnơ̆ng diñu myơr, Khua Yang amâo hmư̆ ôh klei diñu mmuñ mni kơ Ñu… (êlan 21-23). Ñu blŭ klei hưn êlâo hŏng Anăn Aê Diê, hưn êlâo brei phung khua kiă kriê kmhal kơ klei soh, amâo lŏ ktư̆ juă phung ƀun ƀin knap mñai ôh, dôk hdĭp kpă ênô, amâo dlăng mnuih mdê mdê, pah mưn leh anăn bi kmhal hŏng klei djŏ klă mngač hŏng jih jang mnuih hlăm ƀuôn sang (êlan 24). Tơdah diñu amâo kmhal ôh, Khua Yang srăng brei arăng ba mđuĕ diñu jing mnă (êlan 27). Klei hưn êlâo brei răng anei bi sĭt leh êjai diñu ăt khăng ai tiê. Thŭn 722 Ê.K., čar Asirir tĭng Ngŏ Dưr nao plah ma čar Israel, mă jing mnă jih jang phung khua êmua ba kơ čar Asirir, knŏng phưi lui phung ƀun ƀin adôk hlăm čar. Khua Yang kpă ênô mkra bi kmhal, wăt tơdah snăn dưn Ñu ăt ƀuăn mâo sa hruê Ñu srăng lŏ ba wĭt phung ƀuôn sang Ñu buh pla mnơ̆ng ti dlông lăn diñu pô leh anăn amâo lŏ buč diñu mơ̆ng lăn čar Aê Diê ƀuăn ôh (Y-Amôs 9:11-15).
Klei hưn mơ̆ng Khua pô hưn êlâo Y-Amôs kñăm snei Aê Diê, Pô mâo jih klei dưi ti dlông kluôm jih jang mnuih, jing Pô kpă ênô, ngă klei kpă ênô mtăp mđơr nanao, amâo dlăng kơ mnuih mdê mdê ôh, ƀiădah Ñu ăt jing Aê Diê Pô khăp, ngă klei jăk hŏng anak mnuih. Drei jing phung anak Ñu, brei ngă jăk hŏng mnuih mkăn msĕ mơh, dôk hdĭp bi êdah knuih jăk siam Ama drei. Akâo Khua Yang đru drei dôk hdĭp kpă ênô tui si hnơ̆ng Aê Diê čuăn mtô leh hlăm Klei Aê Diê Blŭ, mbĭt hŏng klei anăn dôk hdĭp thâo bi khăp msĕ si Khua Yang khăp leh kơ drei. Brei klei hdĭp drei bi guh kơang kơ Anăn Aê Diê Pô drei dôk kkuh mpŭ.
Si ngă drei dôk hdĭp kpă ênô leh anăn thâo bi khăp msĕ si Klei Aê Diê Blŭ mtô leh mơ̆?
Wah lač: Ơ Ama khăp hơiêng, akâo Ih đru kâo hur har hriăm leh anăn răk dlăng Klei Aê Diê Blŭ grăp hruê, čiăng kơ Klei Blŭ Ih ƀuah mkra, tơdah kâo ngă soh, mtô bi hriăm kâo dôk hdĭp bi êdah klei kpă ênô leh anăn klei khăp Khua Yang kơ jih jang mnuih hlăm klei dôk hdĭp grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 2-3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
