Sachari 1:14-17
“Sơ̆ Kră Yang tơ’bôh boih kơ bơ̆n khan: Inh ‘mêm mơnat kơ iĕm hăm tơdrong ‘mêm ling lang hlŏng-hloi, Thoi noh na Inh oei wei kơjăp ‘mêm kơ iĕm.” (Jêrêmi 31:3)
Nơ̆r jet tơchĕng pơwao:
– Sachari ‘bok khan lê̆ adrol đei Kră Yang tơ’bôh păng khan kơ sư kơplah jơ ayơ?
– Sư khan tơbăt Kră Yang gô pơm kiơ?
– Bơ̆n băt kơnăl tơdrong ayơ Kră Yang lăm chăl nơ̆r ‘Bok Kei-Dei ‘nâu?
Sachari ‘bok khan lê̆ adrol đei Kră Yang tơ’bôh păng khan kơ sư kơplah kon pơlei Isơrael đei tơdrong gleh lap, bơ̆l hăl păng tơklah tơklang yua kơ tơdrong blah găn tơduă băl đơ̆ng rŏng kơ brŏk đơ̆ng pơm bơnă. Đe rôp lu sư pơm bơnă yua kơ tơdrong yoch thoi noh dang ei lu sư jet kơdih akâu Kră Yang hăm achăng lê̆ lu sư ưh. Lăm tơdrong ưh pă hơmĕng noh, Kră Yang khan hăm dôm nơ̆r ‘bĕnh tơdrong hơmĕng: “Inh iŏk jơhngơ̆m ‘mêm mơnat dơ̆ng kơ Jêrusalem” (trong 16). “Tơlei đak mơ̆k” noh tơmam tơlei lu bơngai jang thơ̆, pơma kơ pơlei tih gô pơm hơmet ming dơ̆ng. păng Jêrusalem pă minh ‘măng dơ̆ng gô năm oei tơ noh thoi sơ̆ dơ̆ng (Jêrêmi 31:38-40).
Jơhngơ̆m ‘mêm mơnat noh jơhngơ̆m Kră Yang mơnat jrŭ dêh hăm kon pơlei Kră Yang, mă khan lu sư ưh kơ trŏ kơ wă mơnat. Jơhngơ̆m ‘mêm mơnat ưh kơ lon lê̆ ôh tơdrong yoch mălei ba ăn tơdrong hơmet ming đơ̆ng rŏng kơ tơbral. Ưh kơ sĭ Kră Yang pơkă gô wih brŏk tơ kon pơlei Sư đĕch ôh na kư̆m wă pơjing ming dôm tơdrong kiơ đêl pơchah. Anih mă lu sư ‘bôh noh teh pơchah hĕch hoch, Kră Yang ‘bôh gô đei minh pôm Hnam akŭm. Anih mă lu sư ưh pă hơmĕng, Kră Yang pơkă ăn tơdrong hiôk hian păng pơlung (trong 17). Jơhngơ̆m ‘mêm mơnat Kră Yang ba tơdrong pơjing, hơmet ming păng tơplih ‘nao.
Mălei, lei lăi hăm tơdrong ‘mêm mơnat, Kră Yang kư̆m khan gah tơdrong Sư hil mĭl hăm lu kon pơlei nai: “Păng Inh ưh kơ lăp jơhngơ̆m đon kơ adrĕch adrung mă oei hiôk. Sơ̆ Inh hli kơ kon pơlei pơla Inh lăp ai đĕch, mă-lei lu adrĕch adrung sư thim tơdrong pơmat kơ lu sư.” (trong 15). Kră Yang yua lu bơngai tơmoi wă pơhrăm pơjuăt kon pơlei Isơrael, mălei lu kon pơlei noh pơang pơm kơnê̆, păng pơgŏ pơđep, pơm hloh kơ ai tơdrong tơpăt Kră Yang. Dôm lu nơ̆r trong ‘Bok Kei-Dei ‘nâu tơ’bôh minh tơdrong gĭt găl gah Kră Yang: Sư ưh kơ lăng đĕch ‘bơ̆t tơdrong pơm ưh kơ tơpăt ưh kơ wă ăn tơdrong pơang, pơm kơnê̆ dah mă wă kơ lơi yua kơdih na bơngai mă pơm dôm tơdrong noh ưh ơ iŏk dôm tơdrong đêl sư pơm. Kơplah kon bơngai rai năm ataih, Kră Yang gô sek tơlang tơpăt. Tơdrong tơpăt Kră Yang bơih ‘lơ̆ng rơgoh wă bơwei kon pơlei Sư păng blah tơdrong kơnê̆.
Tơdrong ‘Bok Kei-Dei tơ’bôh Sachari bơngai khan lê̆ adrol ‘bôh ba ăn tơdrong hơmĕng kơ tơdrong arih lu bơ̆n dang ei. Lơ bơngai lăm bơ̆n đei tơdrong chhur nuih, dôm tơdrong ŭnh om, dah ‘nhŏng oh pơchah, tơdrong yoch, tơdrong hmach dêh, dah dôm jĭ rơka kơ đơ̆ng tơdrong ưh kơ ‘lơ̆ng. Nơ̆r Kră Yang pơlung kơ bơ̆n: “Inh gô iŏk jơhngơ̆m ‘mêm mơnat” (trong 16). Kră Yang gô pơm ming tơdrong kiơ mă bơ̆n ưh kơ gơh pơm. Sư hơmet ming dôm tơdrong kiơ nhen thoi wă hiong. Đơ̆ng tơdrong noh, bơ̆n gơh pơdơh lăm tơdrong tơpăt Sư.
Kơkuh kơ Ih Kră Yang, bơnê kơ Ih đei ‘mêm kơ inh hăm jơhngơ̆m ‘mêm mơnat kơplah inh jrok kơ trong. Apinh Kră Yang tơgŭm inh gơnang kơ jơhgơ̆m ‘mêm mơnat Ih păng pơdơh lăm tơdrong tơpăt Ih lăm teh đak ưh kơ tơpăt ‘nâu. Apinh Kră Yang tơgŭm inh arih băt tơ’bôh tơdrong ‘mêm păng tơdrong tơpăt Ih đơ̆ng tơdrong arih sa rim năr, krao khan yua anăn Kră Yang Yêsu Krist, Amen.
Bơ̆n hlôi mơn bơih tơdrong Kră Yang ‘mêm kơ bơ̆n păng kon pơlei bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 7
Kênh Youtube BHKTHN:
