II Xwmtxheej Vajntxwv 31:11-19
Nqe cim:
“Vajntxwv hais kom lawv ua ib co chav rau khoom rau hauv lub Tuamtsev, thiab lawv muab tej khoom pub thiab tej ib feem kaum coj mus cia rau hauv cov chav ntawd.” (II Xwmtxheej Vajntxwv 31:11, 12a)
Lus nug rau sawvdaws xav:
– Vajntxwv Hexekiyas faib haujlwm thiab tsa cov saib xyuas tej khoom fij li cas?
– Cov neeg ntawd ua haujlwm nrog tus cwjpwm zoo li cas?
– Peb kawm tau dabtsi ntawm cov pejxeem kev fij khoom thiab cov Levis kev ncaj ncees?
Thaum cov pejxeem teb Vajntxwv Hexekiyas tej lus nqua hu thiab fij khoom los ntawm nplooj siab dav, ces Vajtswv foom koob hmoov rau lawv fij ntau ntxiv txog qib uas tsis muaj chaw txaus rau tej khoom. Vajntxwv thiaj hais kom tu thiab npaj tej chav ze ntawm lub Tuamtsev los ua chaw rau tej khoom thiab tsa cov Levis los saib xyuas. Yog li ntawd, cov Levis muaj feemxyuam txais, saibxyuas thiab faib tej khoom fij. Lawv coj tej khoom fij, feem kaum, thiab tej khoom dawbhuv mus rau tej chav rau khoom los ntawm “kev ncaj ncees”, txhais tias lawv muab siab npuab thiab ua tiag tiag. Lawv tsis khaws cia rau lawv tus kheej lossis lawv tsev neeg, tiamsis muab tagnrho coj mus rau hauv lub txhab.
Kaunaniyas, uas yog neeg Levis, tau vajntxwv cob haujlwm ua tus thawj saibxyuas tej khoom hauv lub txhab, nws tus kwv Sime-is ua tus pab nws, thiab muaj kaum leej nrog nkawd ua haujlwm. Kaules kuj tau rau leej pab, “lawv muaj lub siab ncaj ncees faib tej zaub mov” rau cov Levis tej nroog, uas yog kaum peb lub nroog tau muab faib rau cov Levis nyob (Yausuas 21:4), thiab txhua tus tsis hais laus hluas pauvleej tau faib sib npaug zos. Lawv yog cov uas muaj npe raws li tej cuab kwvtij, muaj cov Levis uas nyob tej nroog deb Yeluxalees, cov povthawj hlob thiab cov Levis uas tabtom ua haujlwm hauv Tuamtsev, tsis hais tej menyuam uas nrog lawv txiv mus xyaum ua haujlwm hauv Tuamtsev, thiab cov Levis uas muaj hnub nyoog nees nkaum xyoo rov saud. Tsis tas li ntawd xwb, cov tsev neeg uas yog cov povthawj thiab cov Levis uas nyob hauv Yeluxalees thiab tej zej zog sab nraud kuj tau faib ib yam nkaus thiab (nqe 17-19).
Vajtswv haivneeg tus qauv fij siab dawb dav thiab cov neeg tau vajntxwv txib tus qauv ua haujlwm qhia rau peb tej zaj kawm uas zoo heev. Vajtswv Pawg Ntseeg yeej ib txwm cheemtsum nyiaj txiag los txhawj rau ntau yam haujlwm, vim li ntawd, Vajtswv haivneeg yuav tsum muaj nplooj siab dawb fij nyiaj txiag los pab txhim kho thiab ua kom Vajtswv lub tebchaws nthuav dav. Thaum fij los ntawm nplooj siab dawb dav, Vajtswv yuav foom koob hmoov kom peb fij ntau heev ntxiv. Tshuav cov uas tau muab tsa ua tes haujlwm saibxyuas thiab siv Pawg Ntseeg tej nyiaj txiag, yuav tsum ncaj ncees thiab ua haujlwm kawg siab kawg ntsws zoo li ua rau Vajtswv, tsis yog ua rau tibneeg (Kaulauxais 3:23). Cov Levis tus qauv ua haujlwm ncaj ncees qhuab ntuas peb hais tias thaum peb tau txais haujlwm lawm, yuav tsum ua kom “ncaj ncees”, tseebmeej thiaj yuav haum Vajtswv siab thiab tus Tswv cov menyuam thiaj zoo siab fij ntxiv.
Thov Vajtswv,
Tus Tswv, thov pab kom nyuam yaus paub hlub Koj, fij txhua yam los ua Koj tes haujlwm los ntawm nplooj siab dawb dav, thiab kawm cov Levis tus qauv ua haujlwm kom nyuam yaus ua tau Koj tes haujlwm ncaj ncees txhua lub sijhawm. Nyuam yaus tuav Yexus Khetos lub npe thov, Amees.
Peb puas tabtom ua tus Tswv haujlwm ncaj ncees thiab kawg siab kawg ntsws lawm tau?
Nyeem Vajluskub hauv peb lub xyoos: I Xwmtxheej Vajntxwv 1-2
Kênh Youtube BHKTHN:
https://www.youtube.com/c/bhkthn
