Êsai 30:18-26
“Kră Yang jơ̆ Kră Yang ‘Bok Kei-Dei ‘lơ̆ng tơpăt. Pŭn hiôk dêh kơ bơngai bu oei chang gô Sư!” (Êsai 30:18b)
Nơ̆r jet tơchĕng pơwao:
– ‘Bok Êsai bơngai khan lê̆ adrol tơbăt Kră Yang gô pơm kiơ kơ kon pơlei Sư?
– Dôm nơ̆r Kră Yang pơkă wă khan thoi yơ?
– Tơdrong ‘nâu ăn kơ bơ̆n tơdrong hơmĕng kiơ kơplah tơ’bơ̆p tơ’bưh hăm tơdrong pơmat, hiong hiach yua kơ lĕch đơ̆ng tơdrong yoch lăm tơdrong arih?
Lăm chăl nơ̆r ‘Bok Kei-Dei adrol (Êsai 30:8-17), ‘Bok Êsai chhơ̆ tơ’bôh rup gah kon pơlei rŭng răng, achăng Kră Yang. Tơplih kơ tơdrong lui gơnang kơ Kră Yang, kon pơlei Juđa brŏk tơ dêh Êyiptơ wă hơmĕng kơ đei dŏng đơ̆ng bơngai ayăt. Tơdrong lu sư ưh kơ chu pơm tơplơ̆ kơ sek tơlang. Mălei ră, pơih blŭng a lăm chăl nơ̆r ‘Bok Kei-Dei ‘nâu (trong 18-26), ‘Bok Êsai tơbăt hơđăl minh tơdrong ‘bĕnh tơdrong hơmĕng: “Mă tơpă, Kră Yang oei gô wă pơm ‘lơ̆ng kơ lu iĕm, Tơpă Sư gô ‘mêm mơnat kơ lu iĕm.” (trong 18a).
Mă khan kon pơlei blah găn Kră Yang, sư oei tơ’bôh tơdrong ‘mêm mơnat hăm lu sư. Sư “Iung hloi” ưh kơ sĭ wă pơrăm na wă tuh tơdrong ‘mêm mơnat. Mă khan kơplah ‘bơ̆t kon pơlei năm jrok trong, Kră Yang kư̆m hơpơi wă dui lu sư wih brŏk, pơklaih păng ăn pŭn hiôk kơ lu sư. Tơdrong ‘mêm mơnat Kră Yang ling lang druh kiơ̆ bơ̆n (Hơriso 23:6). Kră Yang wă mơnat păng hơmet ming. Sư chang gô bơ̆n wih brŏk wă kơ Sư krôp gom bơ̆n lăm tơdrong mơnat Sư.
Mă khan lei ră, tơdrong ‘mêm mơnat ưh kơ klơ̆p lê̆ tơdrong tơpăt. Lăm trong 18, ‘bok Êsai khan tơbăt hơđăl thoi âu: “Kră Yang bơih Kră Yang ‘Bok Kei-Dei ‘lơ̆ng tơpăt.” ‘Bok Kei-Dei ưh kơ đei hŭt lon lê̆ tơdrong yoch ôh. “Mălei Inh ưh kơ lê̆ ôh gô phak bơngai pơm yoch” (LĐ Êyiptơ 34:7). Tơdrong tơpăt Kră Yang wă pơma khan Sư gô hơmet ming dôm tơdrong. Mălei tơdrong ‘mêm păng tơdrong tơpăt Sư ưh kơ đei layơ hơtŭt băl. Tơdrong tơpăt Kră Yang khan tơdrong yoch gô pŭ iŏk đêl tơdrong sư pơm, mălei tơdrong ‘mêm mơnat khan Kră Yang gơh hơmet ming dah kon pơlei Kră Yang tơbral năm tơkan tơ Kră Yang păng chang gô Sư. J
‘Bok Êsai tơbăt dôm nơ̆r pơkă ‘lơ̆ng dêh đơ̆ng Kră Yang ‘măn kơ kon pơlei Sư. Kră Yang gô tơl tơwih dah kon pơlei Sư krao chă (trong 19). Kră Yang gô chông bơrơng lu sư păng khan thoi âu: “Âu jơ̆ trong mă lu iĕm athei rok kiơ̆” (trong 21). Kră Yang gô ăn pŭn hiôk kơ tơdrong jang lu sư păng ăn kơ lu sư rơkah rơkai (trong 23-24). Kră Yang kư̆m gô pơklaih ming rơka jĭ kon pơlei Sư păng ming hơmet pơklaih đêl rơka sư teh (trong 26).
Dang ei, rim wơ̆t bơ̆n tơ’bơ̆p tơ’bưh hăm tơdrong jĭ pơmat, hiong hiach dah mă đơ̆ng tơdrong yoch bơ̆n pơm, tơplih kơ tơdrong chơ chă tơ anih hơđơ̆ng mă ưh kơ tơpăt, druh kiơ̆ kon bơngai, mă kăl loi sư druh kiơ̆ tơdrong pơgơ̆r, anih jang thoi kon pơlei Juđa sơ̆ đei pơm, krao bơ̆n athei chang gô păng lui kơ Kră Yang ‘mêm mơnat pơih tơdrong arih tơ anăp păng hơmĕng. Apinh Kră Yang ăn kơ bơ̆n năm tơkan tơ Kră Yang păng chang gô Sư.
Kơkuh kơ Ih Kră Yang, apinh Ih tơgŭm inh ling lang băt chang gô Ih lăm rim tơdrong lăm chăl arih, wă kơ inh băt mơn đơ̆ng tơdrong pŭn hiôk păng tơdrong mơnat Kră Yang lăng lăm tơdrong arih inh. Krao khan yua anăn Kră Yang Yêsu Krist, Amen.
Kơplah tơ’bưh hăm tơdrong yoch, bơ̆n ngăl chang gô Kră Yang dah chang gô tơdrong tơgŭm đơ̆ng kon bơngai?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 6
Kênh Youtube BHKTHN:
