Klei Aê Diê Blŭ: Y-Yêrêmi 3:11-13
Êlan kliăng: “Yêhôwa lač, Kâo amâo srăng dlăng kơ ih hŏng klei ngêñ ôh, kyuadah Kâo thâo pap, Yêhôwa lač; Kâo amâo srăng ngêñ nanao ôh.” (Y-Yêrêmi 3:12b)
Klei êmuh ksiêm mĭn: Ya klei Aê Diê brei Khua pô hưn êlâo Y-Yêrêmi thâo kơ phung ƀuôn sang Israel? Ya klei Aê Diê mtă brei ñu hưn hŏng phung ƀuôn sang? Si klei bi mđĭ ai drei êbat nao hlăm klei thâo kmhal leh anăn bi mlih mrâo mơ̆ng klei Khua Yang iêô jak “lŏ wĭt”?
Klei hưn mơ̆ng Khua pô hưn êlâo Y-Yêrêmi khăng atăt drei kơ klei amâo mơak ôh kyua klei soh, klei bi kdơ̆ng leh anăn boh jhat mơ̆ng klei lui wir Khua Yang. Ƀiădah lĕ, hlăm lam klei blŭ phat kđi ktang tĭt anei, drei ƀuh mơh klei Khua Yang iêô jak phung ƀuôn sang Ñu ruah hŏng klei pap êdu êun. Anei jing sa hlăm lu trăn kdrêč Klei Aê Diê Blŭ bi êdah klei pap tloh ênoh Aê Diê pioh brei kơ phung ƀuôn sang Ñu.
Khua Yang brei Khua pô hưn êlâo Y-Yêrêmi thâo phung ƀuôn sang Israel wăt tơdah bi kdơ̆ng dưn ƀiădah ăt kpă ênô hĭn kơ phung ƀuôn sang Yuđa (Y-Yêrêmi 3:8, 11). Hlăm klei jing sĭt, phung ƀuôn sang lĕ hlăm klei soh kkuh kơ rup yang leh anăn gao klei bi mguôp hŏng Aê Diê. Ƀiădah klei soh phung ƀuôn sang Yuđa jing kjham hĭn, kyuadah klei diñu dlăng hơăi mang leh anăn ngă hŏng klei mgưt ai ngăm (Y-Yêrêmi 3:9-10).
Kyua klei Khua Yang pap, Ñu yua Khua pô hưn êlâo Y-Yêrêmi hưn klei Khua Yang iêô jak phung ƀuôn sang Israel hŏng klei klă mngač: “Lŏ wĭt bĕ! Kâo amâo srăng dlăng kơ ih hŏng klei ngêñ ôh” (êlan 12). Klei anei brei ƀuh êlam hĭn kơ knuih Aê Diê jing. Kyua klei kpă ênô Ñu brei tŭ klei jing soh. Khua Yang iêô mthưr phung ƀuôn sang Israel: “Knŏng brei ih tŭ klei ih jing soh” (êlan 13) snăn Ñu srăng mđing dlăng leh anăn pap brei klei soh. Ai tiê Khua Yang amâo tuôm čiăng bi rai phung ƀuôn sang Ñu ôh, ƀiădah čiăng diñu thâo kmhal leh anăn lŏ bi mrâo klei bi mguôp hŏng Khua Yang. Mta čuăn čiăng dưi mâo klei pap brei leh anăn lŏ bi mrâo amâo djŏ ôh hŏng mnơ̆ng myơr ngă yang, ƀiădah hŏng klei kmhal sĭt: Tŭ klei jing soh, lui phung yang mgưt, leh anăn lŏ wĭt kơ Khua Yang pô. Mtao Y-Đawit wăt tơdah ngă klei soh prŏng hŏng Khua Yang, ƀiădah tơdah ñu kmhal sĭt leh anăn lŏ wĭt kơ Khua Yang, Khua Yang pap brei leh leh anăn lŏ bi mrâo ñu. Ñu čih leh klei ñu pô bi knal: “Mnơ̆ng ngă yang bi mơak kơ Aê Diê jing ai mĭn mčah; Ơ Aê Diê, Ih amâo bi êmut ôh kơ ai tiê mčah leh anăn kmhal kơ klei soh.” (Klei Mmuñ Hđăp 51:17). Leh anăn mơ̆ng klei bi knal anăn mơh, mtao Y-Đawit kñăm klă: “Yêhôwa jing jăk leh anăn thâo pap, amâo djăl ăl ôh, mdrŏng hŏng klei khăp.” (Klei Mmuñ Hđăp 103:8). Ai tiê thâo kmhal “lŏ wĭt” kơ Khua Yang, Ñu jum drông nanao leh anăn jing klei hưn amâo tuôm mlih ôh kơ anak mnuih.
Hruê anei, klei Khua Yang iêô jak: “Lŏ wĭt bĕ!” ăt amâo tuôm mlih ôh. Khua Yang knŏng čiăng kơ drei hŏng klei sĭt kpă tŭ klei drei jing soh leh anăn “lŏ wĭt”. Ñu srăng jum drông drei hŏng klei sĭt suôr, klei pap leh anăn lŏ bi mrâo. Klei Aê Diê ngêñ amâo dôk nanao ôh; leh anăn ai tiê pap Ñu dôk nanao hlŏng lar.
Si ngă drei wĭt lač leh mơ̆ kơ klei Khua Yang iêô jak “lŏ wĭt”? Si ngă drei kăp kmhal mtam čiăng kơ Khua Yang lŏ bi mrâo mơ̆?
Wah lač: Ơ Khua Yang, grăp blư̆ kâo đuĕ kbưi mơ̆ng Ih, akâo Ih đru kâo tŭ sĭt klei kâo jing soh, thâo kmhal kơ klei soh, leh anăn lŏ wĭt hŏng Ih, čiăng kơ Khua Yang pap brei leh anăn lŏ bi mrâo klei bi mguôp hŏng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 4-5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
