Xakhaliyas 1:14-17
Nqe cim:
“…kuv tuaj deb deb tshwm rau lawv pom. Cov Yixalayees, kuv yeej ibtxwm hlub nej, kuv yuav hlub nej mus ibtxhis.” (Yelemis 31:3)
Lus nug xav:
– Tus Cevlus Xakhalias tau tus Tswv pub pom tej zaj yogtoog no ncaj lub sijhawm twg?
– Nws tshajtawm hais tias tus Tswv yuav ua dabtsi?
– Peb zeem paub txog Vajtswv tus mojyam twg hauv ntu Vajluskub no?
Tus Cevlus Xakhalias tau tus Tswv pub pom tej zaj yogtoog ncaj lub sijhawm haivneeg Yixalayees tabtom nkees, qaug zog thiab raug sib faib vim tej kev tawmtsam ibncig tomqab uas lawv dim kev ua cev qhev rov los. Lawv twb raug ntes mus vim lawv tej kev txhaum, nimno lawv thiaj nug tus kheej hais tias tus Tswv puas tso lawv tseg lawm. Thaum tsis muaj kev cia siab zoo li ntawd, tus Tswv tau hais tej lus puvnpo kev cia siab tuaj hais tias: “Kuv thiaj rov los rau hauv lub nroog Yeluxalees thiab qhia kuv txojkev hlub rau lub nroog ntawd” (nqe 16). “Txoj hlua ntsuas” yog yam cuabyeej ntawm cov kws ua tsev, qhia hais tias lub nroog yuav tau txhim kho dua tshiab. Thiab Yeluxalees yuav muaj Vajtswv haivneeg rov los nyob zoo li yav thaum ub (Yelemis 31:38-40).
Txojkev hlub tshua yog lub siab khuvleej tob tob ntawm tus Tswv rau haivneeg Yixalayees txawm tias lawv tsis tsimnyog tau txais. Txojkev hlub tshua tsis tshem tej kev txhaum povtseg tiamsis coj kev txhim kho los rau lawv tomqab uas lawv twb hloov siab lees txim lawm. Tus Tswv tsis yog tsuas coglus hais tias Nws yuav rov qab los nrog Nws haivneeg nyob xwb, tiamsis Nws tseem yuav txhim kho tej uas twb raug puastsuaj lawm. Qhov chaw uas lawv ntsia pom tsuas yog tej vaj tse pob sis tsub sis nias, tiamsis tus Tswv saib pom yuav muaj ib lub Tuamtsev tau txhim tsa rau qhov chaw ntawd. Qhov chaw uas lawv hnov hais tias tsis muaj kev cia siab, ces tus Tswv coglus tias yuav pub kev vammeej thiab kev nplij siab rau qhov ntawd (nqe 17). Tus Tswv txojkev hlub tshua coj kev txhim kho, kev tsim dua tshiab thiab kev hloov tshiab rov los.
Tiamsis, nrog rau txojkev hlub tshua, tus Tswv kuj hais txog txojkev chim rau lwm haivneeg. Nws hais tias: “Kuv chim heev rau cov tebchaws uas tau zoo nyob kawg li, vim yog thaum kuv chim me me xwb lawv tseem ua rau tej xwm txheej phem loj zuj zus tuaj” (nqe 15). Tus Tswv twb siv lwm haivneeg los nplawm haivneeg Yixalayees, tiamsis tej haivneeg ntawd ho khavtheeb, ua nruj ua tsiv, thiab ua dhau tus Tswv txojkev ncaj ncees tus cej ciam. Tej nqe Vajluskub no qhia ib qho tseemceeb txog tus Tswv tus mojyam: Nws yuav tsis fee plhu tsis pom qhov tsis ncaj ncees, Nws yuav tsis cia cov neeg uas khavtheeb, tsimtxom lossis quabyuam Nws haivneeg nyob zoo tsis raug txiav txim. Thaum tibneeg ua mus deb dhau lawm, tus Tswv yuav nqis tes los txiav txim ncaj ncees. Tus Tswv txojkev ncaj ncees yog qhov dawbhuv siv los tiv thaiv Nws haivneeg thiab tawmtsam tej yam phem.
Tus Cevlus Xakhalias tej zaj yogtoog coj kev cia siab los rau peb lubneej niaj hnub nimno. Muaj coob leej hauv peb muaj tej kev iab siab, muaj tej kev sib raug zoo raug tu ncua, muaj kev txhaum, muaj kev khuv xim, lossis muaj tej qhov txhab vim tej kev tsis ncaj ncees. Tus Tswv Txojlus txhawb peb lub zog hais tias: “Kuv rov qab los…thiab khuvleej lawv” (nqe 16 HMOWSV). Tus Tswv yuav tsim dua tshiab tej uas peb tsis muaj cuabkav ua tau. Nws yuav txhim kho tej uas zoo li twb ploj mus lawm. Vim li ntawd, peb cia li nyob thajyeeb hauv tus Tswv txojkev ncaj ncees.
Thov Vajtswv,
Tus Tswv, ua Koj tsaug vim Koj tau los cuag nyuam yaus ntawm txojkev hlub thaum nyuam yaus mus yuamkev. Thov qhia nyuam yaus paub tso siab rau Koj txojkev hlub tshua thiab nyob thajyeeb hauv Koj txojkev ncaj ncees hauv lub ntiajteb uas muaj kev tsis ncaj ncees no. Thov pab nyuam yaus ua lubneej qhia tshwm Koj txojkev hlub thiab kev ncaj ncees rau lwm tus dhau ntawm nyuam yaus lub neej txhua hnub. Nyuam yaus tuav Yexus Khetos lub npe thov, Amees.
Peb tau txais tus Tswv txojkev hlub tshua hauv peb lubneej thiab peb haivneeg li cas lawm?
Nyeem Vajluskub hauv peb lub xyoos: Exekees 7
Kênh Youtube BHKTHN:
