Klei Aê Diê Blŭ: Y-Sakari 1:14-17
Êlan kliăng: “Yêhôwa bi êdah leh kơ ñu mơ̆ng đưm, lač: “Kâo khăp leh kơ diih hŏng klei khăp hlŏng lar; kyuanăn Kâo êwak diih hŏng klei jăk.” (Y-Yêrêmi 31:3)
Klei êmuh ksiêm mĭn: Hbĭl wưng Khua Yang brei klei bi êdah kơ Khua pô hưn êlâo Y-Sakari? Ñu hưn kơ ya klei Khua Yang srăng ngă? Drei thâo kral kơ ya knuih Khua Yang hlăm trăn anei?
Khua pô hưn êlâo Y-Sakari mâo klei Khua Yang bi êdah hlăk wưng phung ƀuôn sang Israel dôk êgah êmăn, êdu ai kyua klei bi kdơ̆ng mơ̆ng phung riêng gah, leh diñu lŏ wĭt mơ̆ng mnă. Arăng mă ba diñu jing mnă kyua klei diñu ngă soh, kyuanăn ară anei diñu bi êmuh diñu pô Khua Yang lui diñu mơ̆. Hlăm klei luč klei čang hmăng anăn, Khua Yang lač kơ diñu bŏ hŏng klei čang hmăng: “Kâo srăng lŏ wĭt kơ ƀuôn Yêrusalem hŏng klei pap” (êlan 16). “Klei mkă” jing mnơ̆ng yua kơ phung mdơ̆ng ngă sang, čiăng lač kơ ƀuôn prŏng srăng lŏ mdơ̆ng. Leh anăn Yêrusalem lŏ sa blư̆ dơ̆ng phung ƀuôn sang Aê Diê srăng hriê dôk msĕ si mphŭn dô (Y-Yêrêmi 31:38-40).
Ai tiê khăp pap jing klei Khua Yang mđing uêñ prŏng êlam kơ phung ƀuôn sang Israel wăt êjai diñu amâo năng ôh. Klei pap amâo lui hgao hĕ klei soh ôh ƀiădah ba hriê klei lŏ bi mrâo tơdah leh thâo kmhal. Khua Yang amâo knŏng ƀuăn srăng lŏ wĭt hŏng phung ƀuôn sang Ñu, ƀiădah wăt lŏ rŭ mdơ̆ng ya mnơ̆ng mčah rai leh. Anôk diñu ƀuh jing klei mčah rai, bi Khua Yang ƀuh srăng mâo sa boh sang yang. Anôk diñu ƀuh jing luč klei čang hmăng, Khua Yang ƀuăn brei diñu čăt đĭ leh anăn klei bi juh (êlan 17). Klei pap Khua Yang ba hriê klei rŭ mdơ̆ng, klei lŏ bi mrâo leh anăn klei bi mlih mrâo.
Ƀiădah lĕ, mđrĭng hŏng klei pap, Khua Yang ăt lač mơh kơ klei Ñu ngêñ kơ phung găp djuê mkăn: “Ƀiădah Kâo ngêñ snăk kơ phung găp djuê mnuih dôk êđăp ênang; kyuadah êjai Kâo čôñ knŏng ƀiă, diñu lŏ thiăm klei bi rai.” (êlan 15). Khua Yang yua leh phung ƀuôn sang tue pioh mkra bi kmhal phung ƀuôn sang Israel, ƀiădah phung găp djuê anăn mgao, ngă klei jhat ƀai, leh anăn ktư̆ juă êgao hnơ̆ng klei kpă Khua Yang. Jih jang êlan Klei Aê Diê Blŭ anei brei ƀuh sa klei yuôm bhăn kơ knuih Khua Yang: Ñu amâo dlăng hơăi mang ôh kơ klei amâo mtăp mđơr, Ñu amâo brei ôh phung ngă klei mgao, ngă klei ktư̆ juă amâodah klei mjhua ƀiădah amâo tŭ boh jhat diñu ngă. Tơdah anak mnuih ngă êgao hnơ̆ng đei, Khua Yang srăng phat kđi kpă. Klei kpă ênô Khua Yang jing doh jăk čiăng răng mgang phung ƀuôn sang Ñu leh anăn bi kdơ̆ng hŏng klei jhat ƀai.
Klei bi êdah kơ Khua pô hưn êlâo Y-Sakari ba klei čang hmăng kơ drei hruê anei. Lu hlăm phung drei dôk djă pioh klei ruă phĭ, luč klei bi mguôp, klei soh, klei hơưi, amâodah klei êka kyua klei ngă amâo mtăp mđơr. Klei Aê Diê Blŭ bi mđĭ ai drei: “Kâo srăng lŏ wĭt … hŏng klei pap” (êlan 16). Khua Yang srăng lŏ hrih mjing djăp mta klei drei amâo dưi ngă. Ñu lŏ bi mrâo jih jang mnơ̆ng mĭndah rai luč leh. Hŏng klei anăn yơh, drei dưi dôk mdei hlăm klei kpă ênô Ñu.
Si drei thâo kral klei pap Khua Yang mđing uêñ kơ klei hdĭp drei pô leh anăn kơ găp djuê ƀuôn sang drei?
Wah lač: Ơ Khua Yang, lač jăk kơ Khua Yang lŏ wĭt hŏng kâo tŭ ư pap brei êjai kâo soh wê. Akâo Ih bi hriăm kâo đăo knang kơ klei pap Khua Yang leh anăn dôk mdei hlăm klei kpă ênô Ih ti krah lăn ala bŏ hŏng klei amâo mtăp mđơr anei. Akâo Khua Yang đru kâo dôk hdĭp bi êdah klei pap leh anăn klei kpă ênô Khua Yang hlăm klei dôk dơ̆ng ƀơ̆ng huă grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
