Klei Aê Diê Blŭ: Y-Êsai 1:1-19
Êlan kliăng: “Ñu srăng dôk gŭ jing msĕ si pô tuh tia leh anăn pô bi doh prăk; Ñu srăng bi doh phung anak êkei Y-Lêwi leh anăn bi doh digơ̆ msĕ si mah leh anăn prăk, tơl diñu ba kơ Yêhôwa mnơ̆ng myơr hŏng klei kpă ênô.” (Y-Malaki 3:3)
Klei êmuh ksiêm mĭn: Ya ngă Khua Yang mkra bi kmhal phung anak ƀuôn sang Ñu? Ya klei kñăm kơ klei Khua Yang bi kmhal? Si knuih drei mâo tơdah Khua Yang mkra bi kmhal?
Y-Êsai ngă bruă khua pô hưn êlâo hlăm brô thŭn 740-686 Êlâo kơ Krist, găn lu ênuk mtao Yuđa (êlan 1), leh anăn hlăm brô 100 thŭn êlâo kơ ƀuôn ala mtao dlưh rai. Hŏng Khua pô hưn êlâo Y-Êsai, Khua Yang lač Ñu mâo sa “phung anak” brei čiêm rông leh anăn mtô lač ƀiădah diñu mâo čiăng thâo săng ôh leh anăn ngă nanao klei ƀai, klei wê (êlan 2-4). Boh jhat diñu tŭ jing klei Ama mkra bi kmhal hŏng klei khăng ktang, dơ̆ng mơ̆ng grăp čô truh kơ lăn čar (êlan 5-7). Phŭn knhal kơ klei Khua Yang bi kmhal phung ƀuôn sang Ñu kyuadah tui si klei bi mguôp ngă leh, Khua Yang mtă leh snei, diñu knŏng kkuh mpŭ kơ hjăn sa Aê Diê leh anăn hdĭp kpă ênô, mblang jing gưt klei bhiăn, ngă klei kpă ênô (Klei Mtô Mñă Klei Bhiăn 10:12-13; Y-Mika 6:8). Klei Khua Yang mkra bi kmhal bi êdah knuih kpă ênô Ñu.
Lu mnuih êmuh, si ngă phung ƀuôn sang Aê Diê ruah, tŭ lu klei mkra bi kmhal đei! Mta phŭn tal sa lač klă leh hlăm êlan 2 kyuadah diñu bi kdơ̆ng hŏng Khua Yang: “Kâo čiêm leh anăn rông leh phung anak êkei, ƀiădah diñu bi kdơ̆ng hŏng Kâo leh”. Mta phŭn tal dua, jih jang thâo sơăi, boh tâo yuôm srăng tŭ klei sah tia sui snăk yơh, prăk mah tuh tia tơl bi doh kơh jing yuôm. Khua Yang lač: “Kâo srăng wir ngă kơ ih, Kâo srăng bi lik hĕ jih djah djâo ih, leh anăn mă hĕ jih ƀruih ƀram ih.” (Y-Êsai 1:25; Y-Malaki 3:3).
Ƀiădah lĕ, êjai mkra bi kmhal, Khua Yang amâo brei tơl êgao hnơ̆ng dưi tŭ ôh: “‘Kyuadah Kâo dôk mbĭt hŏng ih čiăng bi mtlaih ih’ Yêhôwa lač, ‘Jih jang phung găp djuê mkăn Kâo srăng bi rai jih, ti krah phung găp djuê anăn, Kâo suôt ih leh, ƀiădah Kâo amâo srăng bi rai ih jih ôh. Kâo srăng mkra ih tui si klei năng, leh anăn Kâo amâo srăng lui ôh ih tlaih kơ klei bi kmhal.’” (Y-Yêrêmi 30:11). Tơdah phung ƀuôn sang Aê Diê hriăm thâo kral leh klei kpă ênô Khua Yang, Ñu čiăng kơ diñu thâo kmhal kơ klei soh, mblang jing lŏ wĭt leh anăn bi mlih, čiăng kơ klei soh diñu “srăng jing kô̆ msĕ si pliêr” leh anăn diñu “srăng ƀơ̆ng boh jăk hĭn hlăm čar” (êlan 18-19)! Msĕ si klei hưn mơ̆ng Khua pô hưn êlâo Y-Êsêkiêl êdei kơ ñu 100 thŭn, “Kyuanăn Kâo srăng phat kđi diih, ‘Ơ sang Israel, grăp čô tui si êlan ñu êbat, Yêhôwa Aê Diê lač. Kmhal bĕ leh anăn lui wir hĕ jih jang klei soh diih, huĭdah klei wê diih bi rai diih.” (Y-Êsêkiêl 18:30). Phung ƀuôn sang Aê Diê mâo klei čang hmăng prŏng prĭn, leh tŭ klei mkra bi kmhal. “Bơ bĕ drei, brei drei lŏ wĭt kơ Yêhôwa. Kyuadah Ñu hiêk drei leh, ƀiădah Ñu srăng bi hlao drei; Ñu bi êka drei leh, ƀiădah Ñu srăng păn anôk êka drei.” (Y-Ôsê 6:1). Hlăm kdrêč knhal tuč kdrêč 1 (Y-Êsai 1:20-31), Khua pô hưn êlâo Y-Êsai ăt hưn êlâo brei diñu răng, klei kpă ênô Khua Yang srăng mkra bi kmhal diñu tơdah diñu lŏ ngă soh (êlan 20-25, 28-31). Bi tơdah diñu dôk hdĭp ênuah ênô, kpă sĭt snăn srăng mâo klei bi tui (êlan 27).
Khua Yang sah tia phung anak ƀuôn sang Ñu čiăng dưi jing jăk hĭn, tŭ dưn hĭn kơ Khua Yang. Brei drei dôk răng čiăng thâo kral klei khăp Ama ti dlông adiê hŏng klei Ñu mkra bi kmhal, čiăng kơ drei kmhal kơ klei soh, lŏ wĭt kơ Ñu êlâo kơ êla đei.
Si ngă drei thâo kral mơ̆ klei Khua Yang mkra bi kmhal, čiăng kơ drei djăl kmhal mtam?
Wah lač: Ơ Ama kpă ênô leh anăn khăp hơiêng! Bi mni kơ Khua Yang mkra mjuăt kâo nanao čiăng kơ kâo dưi jing doh hĭn. Akâo kơ Khua Yang mkra bi hriăm kâo grăp blư̆ kâo weh đuĕ mơ̆ng êlan Ih, čiăng kơ grăp hruê kâo dưi jing msĕ si Khua Yang hĭn, dôk hdĭp kpă ênô hĭn, doh jăk hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 85-86
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
