Klei Aê Diê Blŭ: Y-Ôsê 11:1-11
Êlan kliăng: “Kâo atăt diñu leh hŏng bră klei pap, hŏng mnal hyuă klei khăp,” (Y-Ôsê 11:4a)
Klei êmuh ksiêm mĭn: Si Khua Yang khăp kơ phung ƀuôn sang Ñu leh anăn si diñu dôk hdĭp hŏng Khua Yang? Ya ngă Khua Yang ngê̆n ƀiădah amâo bi rai diñu hlŏng lar ôh? Si knuih drei mâo tơdah thâo Khua Yang Pô Jăk dôk čang guôn drei wĭt kơ Ñu?
Khua pô hưn êlâo Y-Ôsê hdĭp hlăm gưl ênuk 8 Êlâo kơ Krist (thŭn 755-725 Ê.K.), hiu hưn Klei Aê Diê Blŭ ti ƀuôn ala mtao Israel tĭng kơ Dưr hlăk dơ̆ng dlưh rai. Hlăk anăn, klei hdĭp myang phung ƀuôn sang Aê Diê hroh trŭn kjham kjhuê̆ kyuadah diñu kkuh kơ rup yang leh anăn dôk hdĭp msĕ si phung tue amâo đăo. Phung mtao bi mlih bi plah mmiă jhưng mtao, bi mguôp leh anăn lŏ lhiăr hŏng phung Asiri leh anăn phung Êjip. Khua Yang tiŏ nao Khua pô hưn êlâo Y-Ôsê iêô mthưr phung ƀuôn sang Ñu kmhal kơ klei soh lŏ wĭt kơ Khua Yang jing Pô khăp kơ diñu msĕ si ama khăp kơ anak. Ƀiădah Ñu ăt hưn êlâo brei răng snei, diñu srăng tŭ klei mkra bi kmhal tơdah ăt dôk bi kdơ̆ng nanao, kyuadah Ñu jing Pô kpă ênô. Khua Yang yua anăn găp djuê Êphaim mâo ƀuôn prŏng Samari pioh iêô kơ kluôm jih ƀuôn ala mtao tĭng kơ Dưr (êlan 3-9).
Khua Yang lŏ mñă klei khăp Ñu hlăk bi mtlaih diñu kbiă mơ̆ng čar Êjip, atăt diñu mŭt hlăm čar Aê Diê ƀuăn pioh kkuh mpŭ kơ Ñu, msĕ si klei bi mguôp ngă leh ti Sinai (êlan 1). Ƀiădah hrô kơ khăp leh anăn kkuh mpŭ kơ Aê Diê, diñu ƀrư̆ hruê đuĕ kbưi hĭn hŏng Khua Yang leh anăn kkuh mpŭ kơ rup yang (êlan 2). Khua Yang mkra bi kmhal phung ƀuôn sang Ñu tui si klei kpă ênô Ñu, ƀiădah êdei kơnăn, ăt lŏ mdrao bi hlao diñu msĕ si sa čô ama bi hriăm anak ñu kčưm hriăm êbat (êlan 3). Khua Yang mkra bi kmhal čiăng kơ diñu đĭ hriê kơ prŏng khue hlăm klei hdĭp huĭ mpŭ kơ Khua Yang. Ƀiădah lĕ, Ñu yua leh bră klei pap leh anăn mnal hyuă klei khăp hdĭp hŏng diñu, msĕ si Sa Čô Mgăt jăk “bi hdjul knông ti ƀăng êgei diñu” amâodah msĕ si sa čô Ama khăp hơiêng “kkui čiêm diñu”. Sĭt nik amâo mâo mta klei mkăn dưi bi mđơr hŏng klei khăp Khua Yang! Ƀiădah phung ƀuôn sang Aê Diê khăng ai tiê amâo čiăng lŏ wĭt hŏng Ñu ôh. Kyuadah knuih kpă ênô Ñu, Ñu mkra bi kmhal hŏng klei jao diñu kơ mtao Asiri krĭng tĭng Dưr (êlan 5-7). Klei kpă ênô Khua Yang amâo brei diñu dưi ngă soh amâodah mjhua, jưh êlư kơ klei khăp hơiêng Ama ôh. Êjai dôk mkra bi kmhal diñu, Khua Yang tiŏ nao khua pô hưn êlâo nao mtô lač mtă mtăn kơ diñu ƀiădah amâo mâo sa čô kmhal ôh, diñu “hung kơ klei lui wir” Khua Yang (êlan 7)!
Wăt tơdah mkra bi kmhal sa phung ƀuôn sang gao klei bi mguôp leh anăn tlă anăp hŏng sa phung ƀuôn sang khăng kŏ, ƀiădah Khua Yang amâo čiăng bi rai luč diñu msĕ si Sêbôim leh anăn Adma ôh, jing dua boh ƀuôn prŏng ngă klei soh jhat tŭ klei bi rai mbĭt hŏng ƀuôn Sôđôm, Gômôrơ (Klei Mtô Mñă Klei Bhiăn 29:23). Khua Yang jing Pô kpă ênô ƀiădah Ñu wăt jing Pô jăk, Pô khăp, kyuanăn Ñu “hngah ngă klei anăn” leh anăn “amâo srăng ngă ôh tui si klei Ñu ngêñ hlơr” hŏng diñu (êlan 9). Khua Yang srăng iêô mthưr diñu lŏ wĭt msĕ si phung ktrâo mgăm wăt tơdah bi ktlah kbưi dưn mơh ăt lŏ wĭt kơ pông diñu nanao, čiăng kơ ti knhal tuč “Kâo srăng bi wĭt diñu kơ sang diñu pô, Yêhôwa lač.” (êlan 11).
Wăt tơdah yua klei khăng ktang nanao kyuadah Khua Yang jing kpă ênô, ƀiădah ăt pap ăt khăp nanao mơh. Akâo kơ Khua Yang brei drei thâo kmhal lŏ wĭt kơ Ñu mtam tơdah hmư̆ klei Khua Yang kčŭt ƀuah, mñă kơ drei.
Si ngă drei kmhal mtam mơ̆ tơdah ngă soh amâodah ăt khăng ai tiê ti anăp klei pap Khua Yang?
Wah lač: Ơ Ama Pô jăk! Kâo thâo lu blư̆ kâo weh nao êlan wê ngă soh hŏng Ama. Kâo kmhal leh anăn kwưh kơ Ama Pô jăk pap brei kơ kâo, atăt kâo lŏ wĭt čiăng kơ kâo dôk hdĭp hlăm sang Ama khăp hơiêng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
