Êsai 58:11
“Kră Yang ling lang gô chông ba ih ăn kơ ih tôm mah lăm anih teh hrĕng kro, pơm ăn kơ akâu jăn ih pran jăng. Ih thoi lĕ pơgar đe ruh đak ling lang, thoi tu đak glung ưh kơ đei laiyơ hrơ̆.” (Êsai 58:11)
Nơ̆r jet tơchĕng pơwao:
- Bơngai pơtruh nơ̆r ‘Bok Kei-Dei anăn Êsai tơbăt Kră Yang đei pơkă tơdrong kiơ hăm kon pơlei pơla Sư?
- Pơm thoi yơ wă kơ lu sư đei mơn kơ tơdrong pơkă noh?
- Lu bơ̆n đei băt mơn kơ tơdrong pơkă ‘nâu thoi yơ wă kơ hơđơ̆ng hiôk chơt lăm sơnăm ‘nao âu?
Lăm Êsai chăl 58, ‘Bok Kei-Dei hil kơ lu kon pơlei pơla Sư arih ưh kơ tơpăt, ưh kơ đei pơm tơpăt păng ưh kơ tôm mah lăm tơdrong ‘mêm mơnat mă khan lu sư oei pơm kiơ̆ thoi tơdrong juăt lu bơngai lui. Trong 11 noh jơ̆ nơ̆r pơkă Kră Yang gô ăn pŭn hiôk đơ̆ng tơdrong arih gah bơhngol truh tơ mŭk tơmam ăn kơ lu bơngai bu mă băt kơ tơ’bral, wih yak năm lăm tơdrong arih tơpăt.
Mă mônh, Kră Yang gô chông anhăk lu kon Sư. Nơ̆r “gô ling lang dui ba” wă khan tơdrong pơgơ̆r chông anhăk ling lang đơ̆ng Kră Yang, Sư ling lang tơ’bôh păng năm hơdai hăm lu bơ̆n lăm chăl arih yak năm kiơ̆ trong Sư. Đei Kră Yang chông anhăk lu bơ̆n ưh kơ hlih jrok trong. Mă ‘bar, Kră Yang gô ba ăn tơdrong tôm mah kơ lu bơ̆n. Nơ̆r “phĭ lăm jơhngơ̆m” wă khan tôm mah rơkah rơkai, lu bơ̆n gô băt mơn kơ tơdrong ba ăn tôm mah rơkah rơkai đơ̆ng Kră Yang mă khan lu bơ̆n oei “tŏk bŏk anih hrĕng kro tih”. ‘Nâu jơ̆ nơ̆r pơkă pơkăm kơ bơ̆n wă kơ bơ̆n chơ̆n jơhngơ̆m kiơ̆ Kră Yang mă tơ hơnăp ning mônh thoi yơ mă khan bơ̆n ưh kơ băt. Mă pêng, Kră Yang gô thim ăn jơ-hngơ̆m pran wă kơ yak hlôi đơ̆ng dôm tơdrong pơmat tat. Nơ̆r “Kră Yang gô pơm ăn hơrăng pran” wă khan pơm ăn kơ bơ̆n tih pran, păng thim jơ-hngơ̆m pran. Tơdrong tưk tơiung đơ̆ng Kră Yang gô tơgŭm bơ̆n yak hlôi dơ̆ng jơ mă jơhngơ̆m bơ̆n pă kĕ, dôm kơ trong năm mă pơmat tat wă kơ yak năm ding truh tơ tơ anih tuch luch. Mă puăn, Kră Yang oei wei rong. Nơ̆r “nhen thoi mir mă đei pruh đak” wă khan mir noh jơ̆ đei đak mah, na jing ba ăn tơdrong dreng ‘lơ̆ng kơ tơnơm ‘long păng đei plei lơ. Chăl arih gah bơhngol mă Kră Yang đei wei rong noh nhen thoi đak krong ro ‘bĕnh bla, rơngơp păng ưh kơ đei la yơ wă hrĕng kro dơ̆ng.
Kơplah lăng dôm tơdrong rŭng răng lăm teh đak âu, lu bơ̆n ưh kơ băt tơdrong kiơ wă truh lăm 365 năr tơ hơnăp, mă lei lu bơ̆n băt kơ năl lu bơ̆n oei kơ kuh kơ Kră Yang mă ưh kơ đei la yơ tŭk nơ̆r Sư đei pơkă, păng Sư ưh kơ la yơ đei tơ plih, nơ̆r pơkă Sư jơ̆ gĭt dêh đing truh tơ ning mônh ling lang. Lu bơ̆n lui tơpă tơdah lu bơ̆n đĭ jơ-hngơ̆m arih ‘lơ̆ng tơpăt păng ‘mêm mơnat, lei Kră Yang gô ling lang năm hơdai lu bơ̆n đĭ sơnăm ‘nao ‘lơ̆ng âu păng ding truh tơ năr Sư jur dơ̆ng. Lu bơ̆n kư̆m kăl kơ lui ngeh kơ Kră Yang gô ba ăn tơmam sa tôm mah rim năr (Mathiơ 6:11). Lu bơ̆n lui ngeh Kră Yang gô ăn tơdrong mơnat Sư, thim jơ-hngơ̆m pran wă kơ lu bơ̆n yak năm lăm tơdrong lui hăm jơ-hngơ̆m pran đơ̆ng Sư ăn. lu bơ̆n lui ngeh kơ Kră Yang gô wei rong, pre hơmet bơ̆n wă kơ lu bơ̆n đei plei rai lơ hloh, chăl arih bơ̆n jing đei yua păng ư-ang A-năn Kră Yang roi hloh dơ̆ng. Apinh Kră Yang ăn kơ lu bơ̆n chơ chă Kră Yang hăm nơ̆r Sư, bơwei tơdrong tơ’bưh hăm Sư, arih ‘mêm mơnat, bơ̆jang, wă kơ lăp đon dôm tơdrong Kră Yang ăn, hơđơ̆ng kơjăp lăm sơnăm ‘nao.
Kơkuh kơ Kră Yang tih hloh mơsêh mơyang, inh lui kơ Ih oei pơgơ̆r dôm tơdrong păng Ih oei hơdai inh mă đơ̆ng dang ei dah truh tơning mônh. Apinh Ih tơgŭm inh ling lang kơ hơđơ̆ng kơjăp wă yak kiơ̆ Ih lăm sơnăm ‘nao âu. Yua anăn Kră Yang Yêsu Krist. Amen
Hăm đei tơdrong kiơ pơm ăn kơ bơ̆n ưh kơ đei tơdrong hơđơ̆ng lăm sơnăm ‘nao âu ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Kôrintô 8
Kênh Youtube BHKTHN:
