Klei Aê Diê Blŭ: Klei Mtô Mñă Klei Bhiăn 32:44-47
Êlan kliăng: “Djă pioh bĕ hlăm ai tiê jih jang klei blŭ kâo mtă kơ diih hruê anei, čiăng kơ diih dưi mtă klei anăn kơ phung anak diih, čiăng kơ digơ̆ dưi răng ngă tui hlue jih jang klei blŭ hlăm klei bhiăn anăn.” (Klei Mtô Mñă Klei Bhiăn 32:46)
Klei êmuh ksiêm mĭn: Ya dua mta klei yuôm bhăn Y‑Môis mtă kơ phung ƀuôn sang Israel ngă leh hmư̆ klei mmuñ anei? Ya ngă Y‑Môis bi hmô klei blŭ hlăm klei mmuñ anei msĕ si klei hdĭp phung ƀuôn sang Israel? Si knuih brei drei mâo hŏng Klei Aê Diê Blŭ?
Leh dlăng klei blŭ hlăm klei mmuñ, Y‑Môis mtă kơ phung ƀuôn sang Israel brei mâo knuih leh anăn bruă ngă bi djŏ ti anăp klei mmuñ anăn mñă. Anei amâo djŏ knŏng jing klei mmuñ ôh ƀiădah lŏ jing klei blŭ hdĭp (Klei Mtô Mñă Klei Bhiăn 4:1), kyua klei Y‑Môis blŭ jing klei ñu lŏ hưn mơ̆ng Aê Diê. Kyua anăn, ñu mñă kơ phung ƀuôn sang Aê Diê brei “Djă pioh bĕ hlăm ai tiê”, “mtă klei anăn kơ phung anak”, leh anăn “răng ngă tui hlue” jih jang klei blŭ hlăm klei bhiăn anei (êlan 46). Boh blŭ “djă pioh bĕ hlăm ai tiê” jing mđing ai tiê, gĭr bi hdơr, čiăng lač grăp mnĭt grăp mmông kđăm hlăm lam ai tiê jih jang klei blŭ hlăm klei bhiăn hlăm ai tiê. Anei jing klei hdơr mdê mdê mơ̆ng grăp čô mnuih hŏng Aê Diê. Klei Aê Diê Blŭ amâo djŏ knŏng “hmư̆ leh anăn mplư diih pô ôh” ƀiădah grăp čô mâo klei hriăm mdê mdê, kma hlăm ai tiê klei mĭn pô čiăng gưt leh anăn hlue ngă (Y‑Yakơ 1:22).
Sa bruă klam mkăn ktrŏ mơh jing grăp čô phung ƀuôn sang Israel amâo djŏ knŏng tuč jih jang klei Aê Diê mtô đuč ôh, ƀiădah brei diñu lŏ mtô, bi hriăm jih jang klei anăn kơ anak čô pô. Klei gưt hdĭp hlue si klei bhiăn amâo djŏ knŏng mâo hlăm ênuk aduôn aê amâodah amĭ ama ôh, ƀiădah brei jing klei lŏ čuê mơ̆ng ênuk anei truh ênuk mkăn mơ̆ng phung ƀuôn sang Aê Diê. Ti hruê phung ƀuôn sang Israel dôk hdĭp ti lăn ala anei, snăn hruê anăn brei diñu hlue ngă klei bhiăn Aê Diê. Klei Y‑Môis mtă anei kñăm đru kơ phung ƀuôn sang Aê Diê tlaih mơ̆ng klei rŭng răng kjham snăk amâodah klei huĭ hyưt leh hmư̆ klei hưn êlâo knap mñai snăk hlăm klei mmuñ Y‑Môis. Kyua knŏng čiăng phung ƀuôn sang Aê Diê hlue ngă ya klei Y‑Môis mtă mtăn, snăn diñu srăng hdĭp sui ti Lăn Ƀuăn Aê Diê brei (êlan 47).
Hruê anei, čiăng dưi hlue ngă Klei Aê Diê Blŭ, êlâo hĭn brei drei kđăm Klei Aê Diê Blŭ hlăm lam ai tiê. Klei anăn brei drei pioh mmông dlăng, ksiêm mĭn Klei Aê Diê Blŭ leh anăn hriăm tuč. Hlăm boh sĭt, lu phung đăo truh knăm kjuh djă Hdruôm Hră Klei Aê Diê Blŭ nao ti Sang Aê Diê, tơdah wĭt dưm sa anôk, leh anăn knăm kjuh hruê kăm êdei lŏ djă ba! Lu mnuih kyua mâo lu đei bruă hlăm klei hdĭp tơl amâo lŏ mâo mmông wah lač hjăn grăp hruê. Tơdah drei amâo hriăm leh anăn hdơr Klei Aê Diê Blŭ snăn si ngă dưi mtô hĕ anak čô pô hriăm Klei Aê Diê Blŭ. Brei hdơr klei hriăm, hlue ngă leh anăn mtô Klei Aê Diê Blŭ kơ ênuk lŏ čuê hmăi kơ klei djiê hdĭp grăp čô drei leh anăn gŏ sang drei.
Drei pioh mmông hlăm hruê čiăng dlăng leh anăn ksiêm mĭn Klei Aê Diê Blŭ mơ̆?
Wah lač: Ơ Khua Yang, akâo kơ Ih đru kâo mâo ai tiê êpa hmao Klei Aê Diê Blŭ. Akâo kơ Ih đru kâo grăp hruê kpĭ kjăp hlăm bruă pioh mmông dlăng, ksiêm mĭn Klei Aê Diê Blŭ čiăng kâo hdĭp hŏng Klei Aê Diê Blŭ leh anăn mtô anak čô pô hdĭp hlue si Klei Aê Diê Blŭ. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
