II Kevcai 32:44-47
Nqe cim:
“Nej yuav tsum ua raws li tej lus uas hnub no kuv qhia rau nej lawm. Nej yuav tsum qhia tej lus no rau nej tej menyuam, lawv thiaj muab siab npuab thiab ua raws li Vajtswv tej lus qhia no txhua lo huv tibsi.” (II Kevcai 32:46)
Lus nug rau sawvdaws xav:
– Mauxes hais rau cov neeg Yixalayees kom yuav tsum ua ob yam tseemceeb twg tom qab uas mloog zaj nkauj no?
– Vim li cas Mauxes muab cov lus hauv zaj nkauj no piv zoo nkaus li cov neeg Yixalayees txojsia?
– Peb yuav tsum muaj tus cwjpwm zoo li cas rau Vajtswv Txojlus?
Tom qab uas nyeem tas cov lus hauv zaj nkauj no, Mauxes hais rau cov neeg Yixalayees kom lawv yuav tsum muaj tus cwjpwm thiab ua kom tsimnyog txojlus hauv zaj nkauj no qhia. Qhov no tsis yog ib zaj nkauj xwb tiamsis tseem yog cov lus ciaj sia thiab (II Kevcai 4:1), rau qhov Mauxes cov lus no yog Mauxes qhia Vajtswv Txojlus xwb. Yog li ntawd, Mauxes hais kom tus Tswv haivneeg yuav tsum “ua raws”, “qhia”, “ua txhua lo” li Vajtswv qhia (nqe 46). Lo lus “ua txhua lo” txhais tau hais tias ntsia ntsoov, cim nco cia, thaum twg los yuav tsum nco ntsoov hauv lub siab cia. Nov yog tus kheej nco ntsoov ua rau Vajtswv. Vajtswv Txojlus tsis yog cia “mloog kom txaus es rov dag tus kheej” tiamsis txhua tus tibneeg yuav tsum txais yuav ntawm tus kheej, kawm nco thiab ua raws li (Yakaunpaus 1:22).
Ib qhov feem xyuam hnyav zog uas yuav tau ua ntxiv yog txhua tus neeg Yixalayees khaws nkaus Vajtswv tej lus qhia rau hauv siab, ua raws li thiab muab tej lus ntawd los qhia rau tej menyuam paub. Qhov uas ua raws li Vajtswv txoj kevcai tsis yog cov ua pogyawg thiab niamtxiv xwb, tiamsis tej menyuam ua raws ib tiam dhau rau ib tiam ntawm tus Tswv haivneeg. Hnub twg cov Yixalayees tseem ua neej nyob hauv ntiajteb, ces hnub ntawd lawv yuav tsum ua raws li Vajtswv txoj kevcai tsis tso tseg. Mauxes cov lus ntuas no yog cia pab kom tus Tswv haivneeg tsis raug kev nyuaj siab lossis txhawj ntshai thaum raug tus Tswv cem. Tsuav yog tus Tswv haivneeg ua raws li tej uas Mauxes hais no, ces lawv yuav ua neej nyob ntev hauv lub tebchaws uas tus Tswv muab rau lawv (nqe 47).
Nimno, cia kom ua tau raws li Vajtswv Txojlus qhia, thawj qhov peb yuav tau khaws Nws Txojlus. Qhov no peb yuav tau siv sijhawm ntau los nyeem, kawm thiab nco cia. Hauv kev ua neej tiag, ntau tus ntseeg Yexus txog athiv nqa Phau Vajluskub mus tom tuamtsev, thaum rov los muab khaws cia twjywm, txog thiv rov nqa mus xwb! Muaj ntau leej vim haujlwm ntau txog qib uas tsis muaj sijhawm los thov Vajtswv txhua hnub. Yog peb tsis kawm thiab tsis nco Vajtswv Txojlus ces peb yuav ua li cas qhia tau peb cov menyuam paub Vajtswv Txojlus. Nco ntsoov hais tias kawm, ua raws thiab qhia Vajtswv Txojlus rau tej menyuam yuav pab tau peb txhua tus thiab tsevneeg tau txojsia.
Thov Vajtswv,
Tus Tswv, thov Koj pub kom nyuam yaus muaj lub siab nqhis nqhawv Koj Txojlus. Thov Koj pab kom txhua hnub nyuam yaus tswj tus kheej los nyeem, kawm Koj Txojlus thiab muab qhia rau tej menyuam. Tuav Tswv Yexus lub npe thov, Amees.
Nyeem Vajluskub hauv peb lub xyoo: I Vajntxwv 22
Kênh Youtube BHKTHN:
