Klei Aê Diê Blŭ: Y-Mathiơ 13:1-9
Êlan kliăng: “Ñu mtô kơ digơ̆ lu mta hŏng klei bi hriêng” (Y-Mathiơ 13:3)
Klei êmuh ksiêm mĭn: Ti anôk Khua Yang Yêsu mtô kơ phung lu? Ya hdră êlan Ñu yua pioh mtô? Ya ngă Khua Yang lač, “Hlei pô mâo knga, hmư̆ bĕ”? Ya klei hriăm drei mâo mơ̆ng klei hriăm hruê anei?
Tơdah Khua Yang Yêsu kbiă mơ̆ng sang, dôk gŭ ti hang êa ksĭ Galilê, mâo phung lu bi kƀĭn jŭm Ñu, kyuanăn Ñu yua hang êa ksĭ Galilê pioh mtô lač. Ñu dôk gŭ hlăm čhŏng, leh anăn jih jang phung lu dôk dơ̆ng ti hang, klei anei đru Khua Yang Yêsu mtô hŏng klei ênưih, jih jang phung lu dưi hmư̆ sơăi. Khua Yang yua “klei bi hriêng” amâodah “klei bi hmô” pioh mtô. Hlăm klei bi hmô kơ mnuih rah mjeh leh anăn lu mta lăn, Khua Yang yua rup jĕ giăm hŏng phung dôk hmư̆ ênuk anăn păt čiăng jih jang ngă bruă pưk hma sơăi, kyuanăn digơ̆ mưng juăt hŏng lŏ hma jing mdiê kuê hlăm krĭng Galilê, mưng hŏng rup mnuih ngă hma nao rah mjeh leh anăn thâo klă kơ mjeh khăng luh liê kyua lŏ hma hlăm čar Palestin ênuk anăn mâo lu êga, boh tâo, pum êruê leh anăn mâo wăt êlan êbat mơh.
Ya ngă ruĕ yăl dliê klei bi hriêng, Khua Yang Yêsu lač, “Hlei pô mâo knga, hmư̆ bĕ!” (êlan 9)? Kyuadah păt čiăng jih jang phung dôk hmư̆ săng kơ boh phŭn klei yăl dliê ƀiădah amâo djŏ jih jang thâo săng sơăi ôh kơ klei mblang êlam kơ klei bi hriêng tơdah amâo mâo mblang. Phung mâo klei êmuh jing phung thâo săng kơ klei bi hriêng amâo djŏ knŏng mjưh mă tăp klei yăl dliê ôh ƀiădah mâo klei êpa mhao čiăng thâo săng klă kơ klei mblang hlăm klei hdĭp myang pioh mă yua. Mâo lu mnuih hlăm phung lu anăn hriê kơ Khua Yang amâo djŏ hŏng ai tiê êpa hmao tui duah klei thâo săng ôh, kăn diñu uêñ mĭn kơ Ƀuôn Ala Mtao Adiê lei kyuadah klei anăn amâo guôp ôh hŏng diñu, tơl hnơ̆ng mâo mnuih knŏng hmư̆ Khua Yang Yêsu čiăng dưi kčŭt hlăm klei Gơ̆ blŭ. Diñu mâo knga ƀiădah amâo hmư̆ ôh asăp Khua Yang kyuanăn ruĕ klei mtô Ñu mñă: “Hlei pô mâo knga, hmư̆ bĕ!”
Hruê anei, djŏ mơ̆ drei mâo knga ƀiădah amâo hmư̆ ôh? Hlăm Phung Sang Aê Diê mâo lu phung bi đru đăo nao Sang Aê Diê ƀiădah amâo mâo kkuh mpŭ kơ Aê Diê ôh knŏng dôk ti êngao wăl Sang Aê Diê. Amâodah hmư̆ ƀiădah amâo mđing ôh ya klei Klei Aê Diê Blŭ čiăng bi hriăm pô leh anăn ya ngă Khua Yang mñă msĕ snăn lĕ. Diñu knŏng mđing mĭn kơ klei bi tuôm hŏng pô anei pô dih đuč, bi yăl dliê hdơ̆ng găp hlăm lam wăt ti êngao Sang Aê Diê. Mâo mơh phung đăo nao bi kƀĭn amâo djŏ čiăng hmư̆ Klei Aê Diê Blŭ kơ diñu pô ôh, ƀiădah hmư̆ brei kơ mnuih mkăn, diñu knŏng ciăng yua Klei Aê Diê Blŭ pioh mtô pô mkăn, ƀiădah amâo brei ôh Klei Aê Diê Blŭ ƀuah mkra, bi hriăm diñu pô. Mâo đa đa phung đăo mkăn nao Sang Aê Diê knŏng čiăng hmư̆ mă đơ klei mtô djŏ tui si diñu čiăng đuč…Klei Aê Diê Blŭ ăt rah nanao ƀiădah amâo mŭt hlăm ai tiê diñu ôh, diñu amâo mdê ôh hŏng mnuih mâo knga ƀiădah amâo hmư̆.
Akâo Khua Yang đru drei hmư̆ leh anăn mâo klei êpa mhao ƀrư̆ hruê thâo săng êlam hĭn kơ Klei Aê Diê Blŭ. Brei drei hmư̆ bi hmăr klei bi hriăm mơ̆ng Klei Aê Diê Blŭ kơ klei awăt, klei soh drei čiăng kmhal hĕ. Brei drei jing mnuih “mâo knga” pioh hmư̆.
Si ngă diih êpa mhao čiăng dưi hmư̆ leh anăn thâo săng kơ Klei Aê Diê Blŭ ƀrư̆ hruê ƀrư̆ êlam hĭn mơ̆?
Wah lač: Ơ Khua Yang, đru kâo mâo knga pioh hmư̆, êpa mhao nanao kơ Klei Ih Blŭ leh anăn čiăng thâo săng kơ Klei Ih Blŭ ƀrư̆ hruê ƀrư̆ êlam hĭn. Brei klei Ih blŭ ƀuah, mkra leh anăn bi hriăm kâo grăp hruê.
Dlăng Klei Aê Diê Blŭ hlăm tlâo thŭn: Y-Mathiơ 20:20-21:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
