Mathais 13:1-9
Nqe cim:
“Yexus ua lus pivtxwv qhia ntau zaj rau lawv mloog” (Mathais 13:3).
Lus nug rau sawvdaws xav:
– Tswv Yexus qhuab qhia cov neeg coob coob qhov chaw twg?
– Nws siv yam dabtsi los qhia?
– Vim licas tus Tswv hais tias “Leejtwg muaj pobntseg, cia li mloog?”
– Peb tau qhuab ntuas licas dhau zaj kawm no?
Thaum Tswv Yexus tawm hauv tsev mus zaum nram ntug hiavtxwv Kalilais, muaj neeg coob coob tuaj nyob puagncig Nws, vim li ntawd tus Tswv thiaj siv ntug hiavtxwv los qhuab qhia. Tswv Yexus nce mus hauv ib lub nkoj, cov neeg coob coob sawv ntawm ntug dej, qhov no ua rau Tswv Yexus yoojyim qhia tau rau sawvdaws hnov. Tus Tswv pheej siv “lus pivtxwv” lossis “lus pajlug” los qhia. Nyob hauv zaj lus pivtxwv hais txog tus tseb nplej thiab tej yam av, tus Tswv siv tej yam uas nyob ibncig cov uas mloog los qhia vim tiam ntawd lawv feem ntau yog neeg ua liaj ua teb, yog li ntawd lawv thiaj paub txog daim teb nplej thiab tej av rog nyob cheebtsam Kalilais, paub txog tus neeg tseb nplej tes haujlwm thiab paub meej txog tej noob nplej tuaj tsis taus kaus vim tej teb nplej nyob Palexatees tiam ntawd muaj ntau pob zeb, hauv paus pos thiab tseem muaj kev qawj hauv daim teb.
Vim licas tomqab piav zaj pivtxwv, Tswv Yexus hais tias “Yog leejtwg muaj pobntseg cia li mloog!” (nqe 9)? Vim feem ntau cov uas mloog yeej paub tej uas tus Tswv hais tiamsis tsis yog txhua tus puavleej totaub txog lub ntsiab lus tob tob hauv zaj lus pivtxwv ntawd yog hais tias tsis muaj neeg pab txhais. Cov neeg xav nug kom paub yog cov uas tsis yog tsuas hnov zaj lus xwb, lawv tseem ntshaw totaub txog lub ntsiab sab ntsujplig kom tau khaws mus coj hauv lub neej. Muaj coob leej tsis quavntsej txog Tebchaws Ceebtsheej vim lawv tsis nyiam qhov ntawd, thiab yeej muaj cov neeg tuaj mloog kom tau lus thuam, lus nkaug Tswv Yexus xwb. Lawv muaj pobntseg tiamsis tsis hnov tus Tswv tej lus yog li ntawd tomqab uas piav txog zaj pivtxwv, tus Tswv thiaj hais tias: “Yog leejtwg muaj pobntseg cia li mloog!”
Niaj hnub nimno, peb muaj pobntseg tiamsis puas mloog lus? Nyob hauv Pawg Ntseeg muaj coob tug ntseeg tuaj hauv tuamtsev tiamsis tsis yog tuaj pehawm, tsuas tuaj ncig ua si xwb. Lossis mloog qhia tiamsis tsis quavntsej txog Vajtswv Txojlus qhuab ntuas thiab tsis quavntsej nug saib vim licas tus Tswv qhuab ntuas yus li ntawd. Lawv tsuas xav txog qhov uas tau ntsib tus ub tus no, sib tham ua ke sab nraud lossis nyob hauv tuamtsev. Kuj muaj cov ntseeg uas tuaj hauv tuamtsev tsis yog mloog Vajtswv Txojlus rau tus kheej tiamsis mloog rau lwm tus, lawv tsuas xav siv Vajtswv Txojlus los qhia lwm tus xwb, tsis cia Vajtswv Txojlus txhim kho, qhuab ntuas, pauv hloov tus kheej lub neej. Kuj muaj ib txhia ntseeg tuaj hauv tuamtsev mloog Vajtswv Txojlus tiamsis tsuas xav mloog tej lus raws li lawv lub siabnyiam xwb,… Vajtswv Txojlus yeej niaj hnub tseb tawm tiamsis tsis mus rau hauv cov ntawd lub siab, lawv zoo tsis txawv cov neeg uas muaj pobntseg tiamsis tsis hnov lus.
Thov tus Tswv pab kom peb mloog thiab muaj lub siab ntshaw totaub Nws Txojlus txhua hnub. Peb kuj yuav tsum zeem paub tej uas Vajtswv Txojlus qhuab ntuas peb txog tej kev qaug zog, kev txhaum kom paub txhim kho dua tshiab. Yuavtsum yog tus neeg uas muaj “pobntseg” siv los mloog lus.
Thov Vajtswv,
Tus Tswv, thov pab nyuam yaus muaj lub pobntseg mloog lus, nqhis nqhawv thiab ntshaw totaub Koj Txojlus txhua hnub. Thov Koj Txojlus qhuab ntuas, taw kev, thiab qhia nyuam yaus txhua hnub. Amees.
Nej puas ntshaw tau mloog thiab totaub Vajtswv Txojlus txhua hnub?
Nyeem Vajluskub hauv peb lub xyoos: Mathais 20:20-21:22
Kênh Youtube BHKTHN:
